Read Biblija - Pe Baltitko Romani čib (Romanes) 2019 Baltic Romani Bible Jezekiljo 48 Bible Online

Jezekiljo 48 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 48

¹Ake, syr kharenpe ródycy (čangá/kolieny). Pe paš-ratítko rig piró drom Xietlonostyr, savó lydžála dre Jemafo, Gacar Jenono, paš-ratitkoné miežatyr Damaskostyr piró drom ke Jemafo, sarí daja phuv vastokóstyr ke mórjo (derjáv), isyn jekh phuvjákiri paš Danoske.

²Pašýl Danoskiri miéža vastočnone rigátyr ke západno jagóro (krajo) isyn jekh Asiroskiro paš.

³Pašýl Asiroskiri miéža vastočnone rigátyr ke západno jagóro isyn jekh Niefalimoskiri paš.

⁴Pašýl Niefalimoskiri miéža vastočnone rigátyr ke západno jagóro isyn jekh Manasijáskiro paš.

⁵Pašýl Manasijaskiri miéža, vastočnone rigátyr ke západno jagóro isyn jekh Jefriemóskiri paš.

⁶Pašýl Jefriemóskiri miéža vastočnone rigátyr ke západno jagóro isyn jekh Ruvimoskiri paš.

⁷Pašýl Ruvimoskiri miéža, vastočnone rigátyr ke západno jagóro isyn jekh Judaskiri paš.

⁸Pašýl Judaskiri miéža vastočnone rigátyr ke západno jagóro isyn sventoné — phuvjákiro kotér. Léskiro buĥlypén isyn biš te pandž tysjoncy desté, a dlugipén kadasavó, syr javire-pašengiro dlugipén, vastočnone rigátyr ke západno jagóro maškír léste javéla svénto štéto.

⁹Phuvjákiro kotér, savó tumé otdena Ráske-Devléske, syr svénto štéto, javéla dro dlugipén biš te pandž tysjoncy desté, a léskiro buĥlypén javéla deš tysjoncy desté.

¹⁰Kadavá svénto phuvjákiro kotér isyn bangó te javél rašángiro, ke paš-ratítko rig biš te pandž tysjoncy desté dro dlugipén, ke mórjo (derjáv) dro buĥlypén deš tysjoncy, ke vastóko dro buĥlypén deš tysjoncy, a ke paš-dyvesýtko rig dro dlugipén biš te pandž tysjoncy, maškír léste javéla svénto štéto Ráskire-Devléskiro.

¹¹Kadavá otdén rašange Sadokoskire čhavéndyr, savé sys terdé pe Mirí stréga (straža), savé dro časo, kóli durjonas Mándyr Izrailjoskire čhavé, na giné krig Mándyr, syr giné krig javír Lievíty.

¹²Kadavá phuvjákiro kotér sventoné koterestyr javéla léngiro, Svénto-sventonestyr pašýl Lievitengiro jagóro.

¹³Lievíty léna pašo rašángiro jagóro (krajo) paš dre biš te pandž tysjoncy desté dro dlugipén i deš tysjoncy desté dro buĥlypén; saró dlugipén isyn biš te pandž tysjoncy, a buĥlypén — deš tysjoncy desté.

¹⁴Kadalé phuvjákire koterestyr naštý lénge te biknen, naštý te paruven, saró pérvo phuvjátyr na piridžala ke javire pal-dová, so davá isyn svénto Ráskire-Devléskiro.

¹⁵A javír pandž tysjoncy, so jačnépe dro buĥlypén biš te pandž tysjoncy dro dlugipén — vaš fóro, vaš sarénge, sob (kaj) te dživén odój, sob (kaj) te javén fóro maškirál.

¹⁶Ake, savó javéla foróskiro baripén: paš-ratitkoné rigá štar tysjoncy te pandžšel desté, i paš-dyvesýtko rig javéla štar tysjoncy te pandžšel, vastočno rig — štar tysjoncy pandžšelá, západno rig — štar tysjoncy pandžšelá desté.

¹⁷Štéty pašo fóro — ke paš-ratítko rig duj šelá te pandždešá ke vastóko duj šelá te pandžšelá, ke paš-dyvesýtko rig duj šelá te pandždešá, ke západno duj šelá te pandždešá desté.

¹⁸Dová, so jačélape dlugipnastyr angíl svénto štéto — deš tysjoncy ke vastóko i deš tysjoncy ke zapado, angíl svénto štéto, dová, so barjola pe daja phuv — saró davá vaš dová, sob (kaj) te čaliakires butiarnen, kon keréla butý dro fóro.

¹⁹Saré Izrailjoskire ródycy saštý (moginéna) te kerén butý dro fóro.

²⁰Saró otdynó štéto dro biš te pandž tysjoncy desté dlugipnasa, buĥlypnasa biš te pandž tysjoncy desté, štarvenglytko kotér, otdén dro svénto kotér, khetané foróskire mištypnasa.

²¹A saró, so jačélape-thagariske: sventoné-kotereskiro rigátyr, foróskire-mištypnaskire rigátyr angíl biš te pandž tysjoncy desté ke kotereskiro vastočno miéža i pe zapado angíl biš te pandž tysjoncy lašyl západno miéža phuvjákiri paš vaš thagariske, paldavá svénto kotér phuv i svénto štéto javéna maškír léste.

²²Ne odová, so jačélape Lieviténgire mištypnástyr i foróskire mištypnástyr maškirál, javéla adiáke-pac' vaš thagariske a štéto maškír Judaskiri miéža i maškír Vieniaminoskiri miéža javéla thagariskire mištypnasa.

²³A saró javire rodycendyr vastočnone rigátyr ke západno rig-jekh paš Vieniaminoske.

²⁴Pašýl Vieniaminoskiri miéža, vastočnone rigátyr ke západno rig jekh paš Simjonoske.

²⁵Pašýl Simjonoskiri miéža vastočnone rigátyr ke západno rig-jekh paš Isaharoske.

²⁶Pašýl Isahoroskiri miéža vastočnone rigátyr ke západno rig-jekh paš Zavulonoske.

²⁷Pašýl Zavulonoskiri miéža, vastočnone rigátyr ke západno rig-jekh paš Gadoske.

²⁸A pašýl Gadoskiri miéža pe paš-ratítko rig džála paš-ratítko miéža Tamarostyr ke paní, kaj čingardenape pašo Kadiso, ručajostyr ke Baró Mórjo (derjáv).

²⁹Ake, isyn phuv, saví tumé pir žriébijo roskedena Izrailjoskire rodycenge, ake isyn léngire pašá rakiréla Raj Devél, Devél.

³⁰Ake, isyn foritka vyginybena: paš-ratitkoné rigátyr isyn vyginyben štar tysjoncy te pandžšelá desté.

³¹Foritko pórta kharelpe, pir Izrailjoskire rodycengire lavá: ke paš-ratítko rig isyn trin pórty: jekh Ruvimoskiri pórta, jekh Judaskiri pórta, jekh Lievijoskiri pórta.

³²Vastočnone rigátyr isyn vyginyben pe štar tysjoncy pandždešá desté, i trin pórty: jekh Jozaskiri pórta, jekh Vieniaminoskiri pórta, jekh Danoskiri pórta.

³³Paš-dyvesytkoné rigátyr isyn vyginyben pe štar tysjoncy pandždešá desté i trin pórty: jekh Simieonoskiri pórta, jekh Isahoroskiri pórta, jekh Zavulonoskiri pórta.

³⁴Morjostyr isyn vyginyben pe štar tysjoncy pandždešá, desté adáj isyn trin pórty: jekh Gadoskiri pórta, jekh Asiroskiri pórta, jekh Niefalimoskiri pórta.

³⁵Saró trusciál (krugom) isyn dešuohto tysjoncy desté. A foritko lav dolé dyveséstyr javéla: “O Raj Devél isyn odój”!