Read Biblija - Pe Baltitko Romani čib (Romanes) 2019 Baltic Romani Bible Jezekiljo 5 Bible Online

Jezekiljo 5 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 5

¹A tu, manušéskiro čhava, le péske vostro (čolaly) kurtála, lýdža lása pir tyró šeró i pir tyré čhora (broda) syr muradluny (britva), le péske ubladýtka (viesy), i rosker balá pe časti (častyra).

²Tríto čast' (častyr) xačkir jagása maškír fóro, syr pherdiakirenape dyvesá, syr vérgi oblyne trusciál (rotasa) fóro, tríto častyr le i počingir kurtalása pašýl fóro, i rosčhurde tríto častyr pir balvál. A Me vytyrdava kurtála pal lénde.

³Le daléstyr nevés nábut, zaphande len dre brinda péskre uribnaskiri.

⁴A tén'či le iščo (inké) da léstyr, so isyn dre uribén, i čhurde dre jag, shačkir kadavá dre jag. Odothýr vydžála jag pe saró Izrailjoskiro kher”

⁵Adiáke rakiréla Raj Devél, Devél, Sarezorjákiro: “Kadavá isyn Jerusalimo! Me čhudjom les maškír narody, a pašýl léste-phuvjá.

⁶A Jerusalimo kerdiá Miré priphenybnenca fujedýr Najudytkoné nacyiéndyr. Jov kerdiá Miré zakononenca nakučedyr, sósa phuvjá, savé isyn pašýl léste. Jone otphendlepe Miré uphenybnendyr, jone na dživénas pir Miré statúty.”

⁷Paldavá adiáke rakiréla Raj Devél, Devél: “Pal dová, so tumé kerénas tumaré gréhi butýr syr Najudýtka nácyi, savé dživénas pašýl tuménde; i na keréna syr isyn priphendlo dre Miré priphenybená, na dživéna pir Miré zakóny, i tumé na dživéna pir zakóny, savé isyn maškirál Najudýtka nácyi, savé isyn trusciál tuménde,

⁸paldavá adiáke rakiréla Raj Devél, Devél: “Ake, čačes, Me vydžava pe túte, Me Kokoró, i keráva maškír túte séndo angíl jakhá Najudytkoné-nacyiengire.

⁹I Me keráva túsa dová, so Me nikoli na keravas, i so butýr Me na javáva te keráv pal saré tyré džungalé (brydka) réndy.

¹⁰Pal dová dadá javéna te xan maškír túte čhavén, a čhavé javéna te xan daden. A Me javáva te sendiakirav tut, a tyró jačaibén rosphurdava pir saré balvalia.

¹¹Paldová, — “Te dživáv Me, — rakiréla Raj Devél, Devél. — “Pal dová, so tu magirdian Miro svénto štéto saré péskire džungalypnasa, i saré tyré nakuč rendénca Me keráva tut tyknesa, i na potanginela tut Mirí jakh, i Miro iló na kovljola pe túte.

¹²Tríto paš túte meréla fujendyr (jazvendyr) i xasjola bokhátyr maškír túte; tríto paš javéla za-mardy kurtalása pašýl tyró fóro, a tríto paš Me rosphurdava pir saré balvalia i Me vytyrdava (doresava) pal lénde kurtála te tradavpe.

¹³I pirijačéla Mirí xolý, i štyljola Miro xoliakiribén pe lénde, i javéla Mánge pir iló, i ĥaljona, so Me, Raj Devél, Devél, rakiravas dro Péskiro zevlynypén, kóli končynelape Mirí xor xolý pe lénde.

¹⁴I me keráva adiáke, so tu javésa čhučí phuv i ladž, obrakiribnasa maškír narody, savé isyn pašýl túte, angíl jakhá kažnoneskire, kon javéla te prodžal pašýl.

¹⁵I javésa tu sabnasa, i ladžasa, sykaibnasa, i javéna te divinenpe darása pe túte narody, savé isyn pašýl túte, kóli Me javáva te sendiakirav tut baré xoliása i men'kasa. Me, Raj Devél, Devél, phendjom davá.

¹⁶I kóli bičhaváva Me pe tuménde baré bokha, savé javéna te xasiakirén tumen, syr mižeh matlia, i kóli bičhaváva len pe tumaró xasibén keráva maškír tuménde bokh iščo (inké) zoraledýr, Me otlava tuméndyr marunó zapaso,

¹⁷to bičhaváva pe tuménde bokh, zahale, riskiribnáskire murdalén (zvierien); jone otlena tuméndyr čhavorén. Meribnytka fránsy / fuiá (jazvy) i rat peréna pe túte, kurtála javéla pe tuménde. Me, Raj Devél, Devél, phendjom davá.”