Read Biblija - Pe Baltitko Romani čib (Romanes) 2019 Baltic Romani Bible Jezekiljo 6 Bible Online

Jezekiljo 6 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 6

¹I sys ke me Ráskire-Devléskiro lav dasavo:

²“Manušéskiro čhava! Risjov tyré mósa ke Izrailjoskire bérgi, angilphen pe lénde.

³Phen: ‘Bérgi Izrailjoskire! Šunén Ráskire-Devléskiro lav. Adiáke rakirél Raj Devél, Devél pe bérgi, bérgicy, rovy i doly: ake, Me keráva adiáke, so kurtála javéla pe tuménde i rosphagirava tumaré vučé štéty.

⁴Altári tumaré javéna rosphagirdé, stýlby tumaré, savé tumé ĥazdenas khameske, javéna rozmarde, Me rosčhurdava tumaré mulen angíl tumaré ídoly.

⁵I Me čhuváva trúpy Izrailjoskire čhavén angíl léngire ídoly, i rosčhuvava tumaré kokalý pašýl tumaré altári.

⁶Dre saré štéty, kaj tumé dživéna, fórja javéna čhučé, vučé štéty javéna rosphagirdé vaš dová, sob (kaj) te aven čhučé i rosphagirdé tumaré altári, sob (kaj) te javén začhurdyne tumaré ídoly, sob (kaj) te javén rosphagirdé stýlby khameske, sob (kaj) te javén bistyrde tumaré butiá.

⁷I javéna te perén maškír tuménde domardé, i ĥaljona, so Me som — Raj Devél, Devél.

⁸Ne Me zrakháva jačaibén (ostatko), i javéna tuménde maškír narody odolé, savé jačénape džidé kurtalátyr, kóli tumé javéna rostradyne pir javír phuvjá.

⁹I javéna te ripirén pal Mánge kodolé, savé jačénape džidé maškír narody, karik len tradyne. Priripirna, kóli začilavava léngiro biladžakiro iló, so otpyja Mándyr, i léngire jakhá, savé paruvenas Mánge angíl ídoly. I jačéla lénge nakuč dre léngire ile pal dová čoripén, savó jone kerénas dre saré péskre džungalé réndy (diély).

¹⁰I ĥaljona, so Me som Raj Devél, Devél. Na ivjá rakiravas Me, so Me janáva lénge bari bída.”

¹¹Adiáke rakiréla Raj Devél, Devél: “Mar vasténca, malav tyré ĥerénca, i phen: ‘Bida pal saró Izrailjoskire kheréskire čoripén i džungalypén! Jone xasjona kurtalátyr, bokhátyr i meribnytkone fransendyr.

¹²Kon isyn dur, kodová meréla meribnytkone fransendyr, a kon jačélape, odová meréla bokhátyr. Adiáke Me vypherdiakirava pe lénde Mirí bari xolý.

¹³I ĥaljona, so Me som Raj Devél, Devél, kóli domardé javéna te pasjon maškír léngire ídoly trusciál léngire altári, pe kažno berĥica, pe saré sama vučé berĥi, tel kažno zeleno kašt, tel kažno ĥensto dembo, pe dová štéto, kaj jone xačkirenas kučoné-khandypnytka smóly saré idolénge.

¹⁴I protyrdava Me ke jone Miro vast, i keráva adiáke, so phuv jačéla čhučí, čhučedyr štetóstyr, kaj čhučé phuvjá Divlaf ke saré štéty, kaj jone dživéna. I tén'či jone ĥaljona, so Me som Raj Devél, Devél.”