Read Biblija - Pe Baltitko Romani čib (Romanes) 2019 Baltic Romani Bible Jezekiljo 7 Bible Online

Jezekiljo 7 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 7

¹I sys ke me Ráskire-Devléskiro lav dasavo:

²“Tu, manušéskiro čhava, phen: “Adiáke rakiréla Raj Devél, Devél. ‘Kónco (jagóro) isyn Izrailjoskire phuvjake, kónco (jagóro) javdiá pe saré štar rigá.

³Ake, kónco javdiá túke. Bičhaváva Me pe túte Mirí xolý, Me javáva te sendiakirav tut pir tyré dromá, i Me čhuváva bang pe túte pal saré tyré džungalypena.

⁴I na potanginela tut Mirí jakh, i Miro iló na kovljola ke tu. Me otdáva pale túke pir tyré dromá, i džungalypena tyré javéna túsa, i ĥaljona, so Me som Raj Devél, Devél.’

⁵“Adiáke rakiréla Raj Devél, Devél: ‘Bari bibáht jekhdžiny, ake, džála bibáht.

⁶Kónco (jagóro) javdiá, javdiá kónco (jagóro), ĥazdyjápe pe túte, ake, javdiá.”

⁷Javdiá tyrí kirki dólia ke tu, manúš, savó dživéla pe phuv! Javéla časo (cýro), džála pharó dyvés, na javéla te rozmekelpe rádyma pe bérgi.

⁸Ake, sýges Me čhuváva pe túte Miro xoliamipen, i Me vypherdiakirava pe túte xolý Mirí. Javáva Me te sendiakirav tut pir tyré dromá, Me čhuváva bang pe túte pal saré tyré džungalé réndy.

⁹I na potanginela tut Mirí jakh, i Miro iló na kovljola ke tu. Me otdáva pale túke pir tyré dromá, i čoripena tyré javéna túsa, i tumé ĥaljona, so Me som Raj Devél, Devél, Savó pharés sendiakiréla.

¹⁰Ake, isyn dyvés! Ake, javdiá jov, vybarija destó, rozbarija phut'kiribén.

¹¹Ĥazdelape nahrates zor pe čoripnengiro destó. Niči na jačélape léndyr (Izrailjostyr) i léngire barvalypnastyr, léndyr kokorendyr, léngire šuminybnastyr, léngire gožypnastyr.

¹²Javdiá časo, podgíia dyvés. Kon kindia — na rádynpe, kon bikindia — na rov, pal-dová so xoliamipen Devléskiro isyn pe lénde sarénde.

¹³Odová, kon bikindia, na risjola ke dová, so jov bikindia, kóli jačélape džidó, pal-dová so prorokoskiro dykhibén vaš saró léngiro butypen na otparuvelape; i nikón péskire čoripnasa na zrakhéla péskiro džiibén.

¹⁴Zabašavena dro rógo (truba), saró kedelape, sob (kaj) te džal pe maribén, ne nikón na javéla pe maribén, pal-dová so Miro xoliamipen isyn pe saró léngiro butypen.

¹⁵Paló kher-kurtála, a dro kher-fuiá i bokh. Kon isyn pe félda, odová meréla kurtalátyr, a kon isyn dre fóro, kodolés shana bokh i fránsy.

¹⁶A kon zrakhélape, odolé našéna, i javéna pe bérgi syr golumby pe dólo. Saré jone javéna te rovén, kažno (sváko) pal péskiro čoripén.

¹⁷Sarénde obmekenape vastá, i čangá sarénde izdrana syr paní.

¹⁸Tén'ci jone ur'jenape dro balytko guno praskasa, i učhakiréla len trašaibén, ladž javéla pe muiá i jone občhinena péskire balá.

¹⁹Péskiro rup vyčhurdena jone pe vulíca (gása), suvnakáj na javéla lénge trej. Léngire rup i suvnakáj na zrakhena len dro dyvés, kóli javéla Ráskire-Devléskiro xoliamipen. Jone na čaravena lénca léskiro di, i na pherdiakirena lénca péskiro per, pal-dová so rup i suvnakáj dolydžine len ke čoripén.

²⁰I sys jone phut'kirdé, so sys lénde rup i suvnakáj pe uribén, jone kerénas léndyr vyčhindlé muiá péskire džungalé devlorénge. Pal davá Me keráva adiáke, so rup i suvnakáj iavéna syr ĥnejo.

²¹Otdáva Me rup i suvnakáj dre vastá syr doresybén čužoné manušénge, grehitkoné manušénge, so isyn pe phuv, jone čorena les, i javéla rup, suvnakáj magirdé léndyr.

²²I risjováva Me léndyr Miré mósa, i jone magirena Miro svénto štéto. Javéna rozmaribnarja te magirén les.

²³Ker zandir (cepo), pal-dová so pe adáia phuv čhuvélape rat, i dro fóro kerélape nahratyma (nasil'stvy).

²⁴Me janáva javire narodóstyr dasavé manušén, savé isyn naj fujedýr Najudytkoné nacyiéndyr. Jone zalena léngire kherá. I zakončynelape zoralengiro phut'kiribén, i javéla magirdó léngiro svénto štéto.

²⁵Džála xasibén: javéna te rodén ramánjo (miro), i na lathéna.

²⁶Bari bída javéla pal bari bída, šunybén paló šunybén. Javéna te mangén dykhibén prorokostyr, na javéla sykliaiben rašaste i lačhó lav godé — phurende/phurydyrende.

²⁷O králi javéla te tuginel, thagaris učhakirna balá, manušénde, so isyn pe phuv, javéna te izdran vastá. Me keráva lénca pir léngire dromá, Me javáva te sendiakirav len pir léngire sendy, i jone ĥaljona, so Me som Raj Devél, Devél.’”