Read Biblija - Pe Baltitko Romani čib (Romanes) 2019 Baltic Romani Bible Jezekiljo 8 Bible Online

Jezekiljo 8 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 8

¹I sys dro šóvto berš, dro šóvto čhon, pe pándžto dyvés. Me bešavas dre miro kher, i Judejákire phurydyrá bešenas angíl mánde i pyjá pe mánde odój Ráskire-Devléskiro, Devléskiro vast.

²Me dykhcjom: ake, vari-saví patrín(óbrazo) sýrby manúš, leskre ĥerendyr sys sýrby jag, vučedýr léstyr sýrby dud, sýrby dud jagatyr.

³Jov protyrdyjá sýrby vast, i lyjá man pal balá pe miro šeró. I ĥazdyjá man Dúho (Fáno) maškír phuv i bolybén, i lydžijá man dre Devléskire dykhibena ke fóro Jerusalimo ke zagiibén pašýl vudár, savó sys čhudo pe paš-rat (sieviero), kaj sys čhudo idolo; savó vykharela zevlynypén.

⁴Ake, odój sys Izrailjoskire-Devléskiri sláva, syr odoia, saví me dykhcjom pe félda.

⁵I phendiá Dúho mánge: “Manušéskiro čhava! Ĥazde tyré jakhá ke paš-rat (sieviero).” Me ĥazdyjom miré jakhá ke paš-rat, ake, dolé rigátyr pašýl altarjoskiri pórta, pašýl zagiibén sys dová zevlenypnaskiro idolo.

⁶I phendiá Jov mánge: “Manušéskiro čhava! Dykhésa li, so jone keréna? Baró džungalypén, savó keréla adáj Izrailjoskiro Kher (Khangirí), sob (kaj) Me te džav krig Miré sventoné štetóstyr? Ne obrisjov, i dykhésa džungalypén (brytkima) iščo (inké) butýr.

⁷I Jov jandiá man ke zagiibén dre gréda (dvóro), me podykhcjom: ake, dre vánta sys prophagiriben.

⁸I phendiá mánge: “Manušéskiro čhava! Proganav vánta” Me proganadjom. Ake, isyn vari-savó vudár.

⁹I phendiá Jov mánge: “Zadžá, podykh pe bedo džungalypén, savó jone keréna adái.”

¹⁰Me zagijom i dykhcjom. Ake, kažno patrín (risunko) capniengiro, i nažuža murdalá i kažna ídoly Izrailjoskire kheréskire sys čhindlé pe vánty.

¹¹A eftadešá (bitrijandengiro šel) muršá, Izrailjoskire-Kheréskire godé-phurendyr (phurydyrendyr) sys terdé angíl lénde, i Jezanijá (Iiezanija), Safanoskiro čhavó sys terdó maškír lénde. Kažnonéste dro vast isyn péskiri kadila thuvipnaskiri, baró oblako kučoné-khandypnaskiro ĥazdelaspe upré.

¹²I phendiá Jov mánge “Dykhés cji, so keréna Izrailjoskire kheréskire baredyra dro kalypén (tjomnyma) rat, so keréla kažno léndyr dre péskiri štúba, kaj isyn ídoly? Jone rakiréna: “Na dykhéla amen Raj Devél, Devél, jačadia Raj Devél, Devél daja phuv”

¹³I phendiá mánge: “Obrisjov i iščo (inké) butýr dykhésa džungalypén, savó jone keréna”

¹⁴I jandiá man ke zagiibén dre Ráskire-Devléskire Kheréskiri (Khangirjákiri) pórta, saví isyn pe paš-rat (sieviero). Ake, odój bešenas manušnia, savé rovenas vaš Famuzo (Tamuzo).

¹⁵I phendiá mánge: “Dykhésa ci, manušéskiro čhavó? Obrisjov, i iščo (inké) butýr džungalypén dykhésa, savó jone keréna.”

¹⁶I jandiá Jov man dre gréda (dvóro), saví sys andrál Ráskire-Devléskiro Kher. Ake, pašo vudár Ráskire-Devléskiri Kher (Khangirí) maškír tremy (koridory) i altárjo sys terdé biš te pandž phurydyrá. Lengre muiá dykhenas pe vastóko, a ke Ráskire-Devléskiri Kher jone dumesa risiné, i mangenaspe (molinenaspe) khameske pe vastóko.

¹⁷I phendiá mánge: “Dykhésa ci, manušéskiro čhavó? Naúšto/haj iščo (inké) nábut Judakire kheréske dolé džungalypena, savé jone kerdé adái, ne jone inké (iščo) pherdiakirde phuv nahratymasa, i jone risiné te košenpe Mánca. Ake, jone podlydžana randiá (vétki) ke péskire nakha.

¹⁸Pal dová Me javáva te keráv xoliamipnasa: na potanginela Mirí jakh, i na pokovljola Miro iló. Mek jone te godlen dre Miré kaná zoralé zaniása, ne Me na šunava len.”