Read Biblija - Pe Baltitko Romani čib (Romanes) 2019 Baltic Romani Bible Jezekiljo 9 Bible Online

Jezekiljo 9 - Biblija - Pe Baltitko Romani čib (Romanes) 2019 Baltic Romani Bible bible

Jezekiljo 9

¹I phendiá Jov, sob (kaj) te šunén miré kaná, zoralé zaniása: “Mek te džán pašyledýr odolé, savé javéna pharés te sendiakiren fóro, kažnonéste dre vast sys dová, so xasiakiréla ke mulypen.

²Ake, šov manušá džána upratune portatyr, so isyn ke paš-rat (sieviero). Kažnonéste (svakoneste) dro vast isyn dová, so xasiakiréla ke mulypen, a maškír lénde sys jekh, savó sys uridó dro pohtanytko uribén, konéste pašýl leskro simiri sys dová, sósa čhinena lylá (priboro). I javné jone, i sys terdé pašýl altárjo.

³I Izrailjoskire-Devléskiri sláva zgija xieruvimostyr, pe konéste joj sys, ke Kheréskiro progo. I khardiá Jov manušés dro pohtanytko uribén, konéste pašýl leskro simiri, sys dová, sósa čhinena lylá.

⁴I phendiá léske Raj Devél, Devél: “Džá péske maškír fóro, maškír Jerusalimo, i ker špéra (znako) pe čekat odolé manušéngire, savénge isyn pharó pal saró džungalypén, i savé piridživena, so kerélape maškír lénde.”

⁵A javirénge phendiá adiáke, sob (kaj) me te šunav: “Džán pal léste pir fóro te muliakirén, mek te na tanginél tumarí jakh, mek te na kovljol tumaró iló.

⁶Phuren i terné manušén, patyvalé terné džuvlién i bijatós i džuvlién muliakirén, ne na čilaven ni jekh manušés, pe konéste isyn špéra (znako). Len (začninen) te kerén Miré sventoné štetóstyr.” Jone lyné te muliakirén dolé godé-phurendyr (phurydyrendyr), savé sys angíl Kher.

⁷I phendiá Dúho (Fáno) lénge: “Magirén Kher (Khangirí), i pherdiakiren gréda (dvóro) domardé manušénca, i vydžán.” Jone giné javrí, lyné te zamarén dro fóro.

⁸Kóli jone zamarenas len, a me jacjompe, tén'či me pyjom pe péskiro muj, i dyjom gódla, i phendjom: “Rajo Dévla, Dévla! Tu čhuvésa Tyró xoliamipen pe Izrailjo, so Tu xasiakiresa saró Izrailjoskiro jačaibén?”

⁹Tén'ci phendiá Jov mánge: “Izrailjoskire-kheréskiro i Judejákiro čoripén isyn baró, drieván baró, i adáia phuv isyn pherdý ratésa, i fóro isyn pherdó čoripnasa, so kerénas pehromi, doléstyr, so jone rakiréna: “Mekciá Raj Devél, Devél adáia phuv, i na dykhéla Raj Devél, Devél.”

¹⁰Pal dová na potanginela len Mirí jakh, i na kovljola Miro iló; ne Me dáva lengre réndy pale pe lengre šeré.

¹¹Ake, manúš, uridó dro pohtanytko (ĥandladytko) uribén, konéste pašýl simiri sys dová, sósa čhinena lylá, dyjá otphenybén i phendiá: “Me kerdjom, syr Tu priphendian mánge.”