Read Biblija - Pe Baltitko Romani čib (Romanes) 2019 Baltic Romani Bible Danijéljo 10 Bible Online

Danijéljo 10 - Biblija - Pe Baltitko Romani čib (Romanes) 2019 Baltic Romani Bible bible

Danijéljo 10

¹Pe tríto berš o Kiraskiro, Piersytkone Kralískiro, sys sykado čačipén Danijeljoske, savés khardé pir lav Valtasaro; i čačunó sys davá sykadyipen i drieván zoraló. Jov ĥalyjá davá čačipén i uĥalyja dykhibén.

²Dre kodolé dyvesá me sómas, Danijéljo, dre túga jasvénca trin eftytka (sied'miny) dyvesá.

³Lačhó maró me na xavas; mas i mol (vino) na giné dre miré uštá, i makhibnasa me na khosavas man ke/žýko dová, syr pherdine (spolnindlepe) trin eftytka dyvesá.

⁴Pe biš te štárto dyvés pervoné-čhonéskiro sómas me pe brégo baré-rekakiro (leniakiro) pašýl Tigro,

⁵i ĥazdyjom me miré jakhá, i dykhcjom: ake, jekh murš, uridó dro ĥandladytko (ljonytko) uribén, i kustýk pe léste sys suvnakástyr Ufazostyr.

⁶E masá léste — syr kuč bar topazo, o muj léskiro — syr o bliskavicakiro dykhibén; léskire jakhá — syr xačkirdé jagengire (fakiely), vastá léskire i ĥerá léskire sys syr ziaindly xarkóma (mied'), i zan léskire rakiribnaskiri — syr zan buté-manušéngiri.

⁷Féni (tóka) me jekhdžinó, Danijelie, dykhávas dasavo dykhibén, e manušá, savé sys mánca, na dykhné dasavo dykhibén; ne pyjá pe lénde bari dar i jone našné, sob (kaj) te garavenpe.

⁸Paldavá jacjompe me jekhdžinó, i dykhávas me dáva baró dykhibén, ne dre mánde na jaciápe zor, mina pe miro muj drieván parudiape darátyr, na jaciápe mánde nisavó sastypen.

⁹I šundjom me zan léskire lavengiri; i féni šunavas me zan (glos) léskire lavengiri, syr kaštaluno dyjompe (zamyjom) me muial i sómas paštó telé mósa ke phuv.

¹⁰Ne ake, čiladiá man o vast i čhudiá man pe mre čangá i pe burnyka (ladoni) mre vastengire.

¹¹I phendiá jov mánge: “Danijelie, murš pir iló! ‘Galjov lavá, savé me phenáva túke, uštý mamúj (rovnes) pe ĥerá tyré; pal-dová so me som bičhadó akaná ke tu.” Kóli jov phendiá mánge dalé lavá, to me uštyjom, izdrandoj.

¹²Ne jov phendiá mánge: “Na andyrša, Danijelie; pervoné dyveséstyr, syr tu čhudián tyró iló, sob (kaj) te doreses ĥalyibén, i te teliakires pes angíl tyré Devléste, lavá tyré sys šundlé, i me javavas pal tyré lavá.

¹³Ne thagári (kniazjo) Piersytkone kralipnastyr terdjolas proti mánde biš te jekh dyvesá; ne, ake, Miha, jekh pervoné thagar'jendyr, javdiá te del vast mánge, i me jacjompe odój pašýl Piersytka kral'jénde.

¹⁴Akaná me javdjom te phenáv džiný (zvies') túke, saró, so javéla tyré manušénca dre dyvesá, so javéna angíl, adiáke, syr dykhibén sykavéla pe duratuné dyvesá.”

¹⁵Kiéli jov rakirélas mánge dasavé lavá, me pyjom mósa ke phuv i jacjom muto (niemo).

¹⁶Ne, ake, vari-kon, kon zdela (poddžála) pe manušytkoné čhavéste, čiladiá miré uštá, i me otkerdjom miré uštá, lyjom te rakiráv i phendjom odoléske, so sys terdó angíl mánde: “Rajo miro! Kadalé dykhibnastyr saré bidytka tugi miré obrisine pe mánde, i na jaciá mende zor.

¹⁷I syr saštý te rakirél o pishári kadasavé miré ráskiro, syr me, Danijéljo, syr tu san? Pal-dová so adral mánde nane zor, i phurdypen (dyhinyben) zamyjá dre mánde.”

¹⁸Tén'ci nevéstyr čiladiá man odová džino, savó sys dre patrín (óbrazo) manušýtko i sastiakirdia man,

¹⁹i phendiá: “Na andarša, o murš pir iló! Ramánjo (miro) te javél túke; lýdža pes murškanés, jav murškanó!” I kiéli jov rakirélas mánca, me sastijom i phendjom: “Rákir, Rajo miro; pal-dová so tu sastiakirdian man.”

²⁰I jov phendiá: “Ci džinésa, palsó me javdjom ke tu? Akaná me risjováva, sob (kaj) te maravpe Piersytkone thagarisa; i kiéli me vydžava, to, ake, javéla Griekítko (Balamítko) thagári.

²¹Ne angíl me phenáva túke, so isyn čhindló dro čačunó čhinybén. I nane nikón, kon podrikirelas by man dre dová, apríč Mihaste, tumaré thagariste.”