Read Biblija - Pe Baltitko Romani čib (Romanes) 2019 Baltic Romani Bible Danijéljo 12 Bible Online

Danijéljo 12 - Biblija - Pe Baltitko Romani čib (Romanes) 2019 Baltic Romani Bible bible

Danijéljo 12

¹I uštéla dro dolé dyvesá o Miha, thagári baró, kon javéla terdó pal čhavénde tyré narodóstyr; i javéla časo pharó, savó na sys dolé dyveséndyr, syr javné manušá pe svéto ke/žýko akaná; ne zrakhenape dro dová časo saré manušá tyré narodóstyr, konés lathéna dre lylvarí.

²I but kodolé, savé isyn suté dro phuvjákiro práho, džangadjona, jekh vaš viéčno džiibén, javír pe viéčno ladžaipén i obrakiriben.

³I god'varé javéna te ziainen, syr duda (svietily) pe bolybnáskiro svódo, i kodolé, savé riskirena buten ke čačipén — syr čergeniá dro viéko, pe saré viéki.

⁴Ne tu, Danijelie, garav dalé lavá i zapiečatyn lylvarí ke palatunó (posliednjo) časo; but manušá proginena la, i javéla te barjol džinybén.”

⁵Tén'ci me, Danijéljo, dykhcjom, i, ake, terdé sys duj javír Jangóly, jekh pe davá brégo rekakiro (leniakiro), javír pe javír brégo rekakiro (leniakiro).

⁶I phendiá jekh Jangólo muršeske dro ĥandladytko (ljonytko) uribén, savó sys terdó uprál rekitka paní: “Kiéli javéla kónco (jagóro) dalé divenge?”

⁷I šunavas me, syr o murš dro gandladytko uribén, savó sys uprál rekitko paní, ĥazdyjá čačó i zérvo (liévo) vast ke bolybén, sovlahadiá viečnone Džidesa, so ke dyvesengiro kónco (jagóro) i ke časy i ke paš-časy, i, syr končynelape sarésa zor sventoné narodoskiri, to saró davá kerélape, čačipnása syr treindiá.

⁸Me šundjom davá, ne me na’ galyjom, paldavá phendjom: “Rajo miro! So isyn te javél paló davá?”

⁹I otphendiá jov: “Džá, Danijelie; pal-dová so isyn zakerde i zapiečatyme dalé lavá ke palatunó časo.

¹⁰Butdžine žužakirenape (čystinenape), parniakirenape i javéna piribilade vaš propatiakiriben; e fuj manušá javéna te kerén bipatyvales, i na ĥaljola nikón adalestyr lav bipatyvalendyr (fujé manušéndyr), ne e god'varé ĥaljona.

¹¹Kodolé časostyr, syr pirijačena kažnoné-dyvesytka svénta dyibená, i syr javéla čhudo džungalypén čhučipnaskiro, prodžála (nakhela) tysjonco te dujšelá jeniadeša dyvesá.

¹²Bahtaló isyn odová, kon užakiréla i dodživela tysjonco te trinšelá trijánda pandž dyvesá.

¹³I tu, Danijelie, džá ke tyró kónco (jagóro) i tu javésa te otkhinjos, i te uštes, sob (kaj) te doreses tyró meknó mištypén pe kónco (jagóro) dyvesengiro.”