Read Biblija - Pe Baltitko Romani čib (Romanes) 2019 Baltic Romani Bible Danijéljo 2 Bible Online

Danijéljo 2 - Biblija - Pe Baltitko Romani čib (Romanes) 2019 Baltic Romani Bible bible

Danijéljo 2

¹Pe javír berš kralipnaskiro Navuhodonosoroskiro, o Navuhodonosóro dykhciá (dyjá) suné, i zalyjape dúho (fáno) léskiro, i soiben gijá léstyr.

²Priphendiá o králi te skedén sarén čovahanen, i magen, i džinybnaskiren pir planiety, i Xaldiejen, sob (kaj) jone te rosphenén e kralíske léskiro sunó. Jone javné, i terdiné angíl kralíste.

³I phendiá lénge o králi: “Dykhávas suné me, trašadjola o dúho (fáno) miro; mánge trej te džináv davá sunó.”

⁴I phendlé e Xaldiei kralíske Aramieitkes ke: “Králjo! Jav džidó dre viéki! Phen sunó tyré pishar'jénge, i me roskedasam, saví znáčyma isyn dre léste.”

⁵Otphendiá o králi i phendiá Xaldiejenge: “Lav otgijá mándyr; kóli tumé te na phenén miro sunó, i so jov značynéla, to mek te čingiren tumen pe koterá (kuski), i kherá tumaré javéna rosphagirdé.

⁶Ne kóli tumé rosphenena sunó i léskiri znáčyma, tedy te len mándyr dáry, počastúnki, i javéla tuménge bari patýv. Adiáke phenén mánge sunó i léskiri znáčyma.”

⁷Jone nevéstyr (nevés) otphendlé i rakirdé: “Te phenél o králi péskire pishar'jénge sunó, i ame phenása léskiri znáčyma.”

⁸Otphendiá o králi i phendiá: “Čačes, džinóm me, so tuménge trej te vybašaven časo, pal-dová so tumé dykhéna, so lav otgijá mándyr.

⁹Adiáke so, kóli tumé na rosphenenas miro sunó, to tuménde jekh isyn pe godý: tumé skedynépe te phenén mánge xohaibén i načačune lavá, sob (kaj) te džal duredýr (nakhela) o časo; adiáke, rosphenén mánge sunó, i tedy me ĥaljovava, so tumé saštý (moginéna) te rosphenén mánge léskiri znáčyma.”

¹⁰E Xaldiei otphendlé kralíske i rakirdé: “Nane pe phuv e manušés, savó moginelas (délas ráda) te otkerel davá réndo (diélo) kralíske, i paldavá ni jekh králi, ni jekh thagári, ni jekh themeskiro barydyró (pravitieljo), na phuciá dasavo ni savé čovahanestyr, ni astrologostyr, ni Xaldiejostyr.

¹¹Réndo (diélo), pal savó phučela o králi, isyn pharó, so nikón javír na saštynela (na moginéla (dela ráda)) te otkerel les kralíske, apríč devlende, savé dživéna na dre manušany loč (plot').”

¹²Rosholiasyja o králi i drieván pherdija xoliamipnasa pal dová, i priphendiá te muliakirén sarén godypnaskiren dro Vavilóno.

¹³Kiéli vygijá adasavó priphenybén, i lyné te muliakirén godypnaskiren, to rodenas Danijeljos, i malen (drugen) leskiren, sob (kaj) te muliakirén len.

¹⁴Tén'ci Danijéljo otphendiá iléstyr i godypnasa Ariohoske, barydyréske pe kralitkone stregar'jende, savé vyginé te zamarén Vavilonytkone godypnaskiren;

¹⁵i phuciá Ariohostyr, kralískire barydyrestyr: “Palsó dasavo zorjása priphenybén isyn kralístyr?” Tén'ci Arioho rosphendiá saró réndo Danijeljoske.

¹⁶I Danijéljo zagijá, i mangdiá kralís te del léske časo, sob (kaj) jov te phenél kralíske suneskiri znáčyma.

¹⁷Danijéljo javdiá ke pe kheré, i rosphendiá saró réndo Ananijaske, Misailoske i Azarijaske, leskre malenge,

¹⁸sob (kaj) jone mangné láska bolybnáskire Devléstyr pal dasavo garadó čačipén, sob (kaj) o Danijéljo léskire malenca te na xasjon sarénca javirenca godypnaskirenca dro Vavilóno.

¹⁹I tén'či sys sykado garadó čačipén Danijeljoske dro ratiákiro dykhibén, i o Danijéljo bahtiakirdiá bolybnáskire Devlés.

²⁰O Danijéljo otphendiá i phendiá: “Mek te javél bahtaló Lav Ráskire-Devléskiro viekostyr pe saré viéki! Pal-dová so Léste isyn godý i zor.

²¹I jov paruvela časy i beršýtka pory, Jov teliakirela kral'jén i Jov čhuvéla kral'jén; déla godypén godypnaskirenge i džinybén godenge,

²²Jov otkerela xoralo i garadó čačipén, Jov džinéla, so isyn dro kalypén (cjomnyma), i dud isyn Lésa.

²³Me parikirava i me šarava Tut, Dévla, miré dadéngiro, so Tu dyján mánge godý i zor i otkerdian mánge odová, pal so mangenas Tut; pal-dová so Tu otkerdian aménge réndo kralískiro.”

²⁴Paló dová gijá Danijéljo ke Arioho, savéske o králi priphendiá te muliakirél e Vavilonytkone godypnaskiren, javdiá i phendiá: “Na muliakir Vavilonytkone godypnaskiren; le man ke králi, me phenáva léske znáčyma sunoskiri.”

²⁵Tén'ci Arioho sýges lydžijá Danijeljos ke králi i phendiá léske: “Me lathjom plienone Judytkone čhavéndyr manušés, savó otkerela kralíske sunoskiri znáčyma.”

²⁶O králi phendiá Danijeljoske, savó khardo sys Valtasaro: “Ci saštý tu, xaj, te phenés mánge sunó, savó me dykhcjom, i léskiri znáčyma?”

²⁷Danijéljo otphendiá angíl kralíste i rakirdiá: “Garadó čačipén, pal savó phučela o králi, naštý te otkeren ni godypnaskire (tanuki), ni čovahane.

²⁸Ne isyn pe bolybén o Devél, Savó otkerela garadé čačipená; i Jov otkerdia kralíske Navuhodonosoroske, so javéla dre palatuné (posliednia) dyvesá. Tyró sunó i dykhibena tre šereskire piró tyró čhuibén sys dasavé:

²⁹“Tu, králjo, pe tyró čhuibén dumindian pal-dová, so javéla paló davá, i Jov, Otkeribnytko (Otkryvajuščo) garadé-čačipnengiro, sykadiá túke dová, so javéla.

³⁰Ne mánge dasavo garadó čačipén sys sykado na paldová, so me sómas god'varedyr saré džidendyr, ne vaš dová, sob (kaj) te javél sykado sunoskiri znáčyma kralíske, i, sob (kaj) tu ĥalyjan dúmy tyré iléskire.

³¹Túke, králjo, sys dasavo dykhibén: ake, savó-to baró vyčhindlo muj idolo! Drieván baró sys odová idolo, léskiri šuk drieván ziainelas, jov sys terdó angíl túte, i darany sys léskiri forma.

³²Dro dová idolo sys šeró žužé suvnakástyr, kolýn i vastá léskire-rupuvé, per léskiro i stacia (bjodry) léskire-xarkuné (miedítka),

³³lytki léskire-sastruné, ĥerá léskire-paš sastruné, paš-glejana (glinytka).

³⁴Tu dykhcián les angíl dová momiento, syr kokoró bar otkusciape bergátyr na čilado vastésa, pekadiá dro idolo, dre sastruné i glejana léskire ĥerá, i rozmardiá len pe koterá (kuski).

³⁵Tén'ci saró sys pirimardo pe jekh tykné koterore: sastýr, ĥleja, xarkóma, rup i suvnakáj kerdépe syr o práho pe lynaskire givá-obkeribnaskire šurny, i balvál lydžijá krig len, i špéra (sliado) léndyr na jaciápe; i bar, kaj pharadia idolo, kerdiápe baré bergasa i pherdija sarí phuv.

³⁶Ake, isyn sunó! Phenasam akaná angíl kralíste i léskiro ĥalyibén.

³⁷Tu, králjo, san kral'jengiro králi, savéske o Devél bolybnáskiro dyjá o kralipén, zor, zoralypén i sláva,

³⁸i sarén čhavén manušengiren, kaj by jone te na dživén, e riskiribnáskire murdalén (zvierien) pe phuv i čiriklien pe bolybén, otdyjá dre tyré vastá i čhudiá tut xulása uprál sarénde lénde. Tu san — davá suvnakunó šeró!

³⁹Ne paló túte ĥazdélape javír kralipén, teledýr tyrestyr, i iščo (inké) tríto kralipén, xarkuno, savó léla te rainel pe sarí phuv.

⁴⁰A štárto kralipén javéla zoraló, syr sastýr, pal-dová so, syr sastýr rozmarela i keréla xurdedyr (drobnedyr) saró, adiáke i jov, javéla te pharavel i te rozmarel pe koterá.

⁴¹Ne dová, so tu dykhcián-ĥerá i angušta ĥerengire nábut piritkone glejatyr, nábut sastruné, to adiáke javéla roskerdo kralipén, i dre léste jačélape nábut sastruno zoralypén, adiáke syr tu dykhcián sastýr, zmiešyme melale ĥlejasa.

⁴²I syr 'gerengire angušta sys paš-sastruné, paš-glejana, to adiáke o kralipén javéla paš zoraló, paš bizorjákiro.

⁴³I so tu dykhcián sastýr, zmiešymo glejasa melaliasa, davá sykavéla, so jone javéna te zmiešynenpe manušéngire rodenca, ne jone na prityrdenape jekh javiresa, syr sastýr na miešynelape ĥlejasa.

⁴⁴I dro dyvesá kodolé kralipnaskire o Devél Bolybnáskiro čhuvéla kralipén, savó dro viéki na phadjola, i kodová kralipén na javéla piridyno javire narodoske; jov pharavela i phagiréla saré kralipená, i jov kokoró javéla te terdjol dro viéki,

⁴⁵adiáke, syr tu dykhcián, so bar kusciape bergátyr sýrby načilade vastésa, savó rozmardiá pe tykné kotorore sastýr, xarkóma, ĥleja, rup i suvnakáj — adiáke Baró Devél dyjá te džinél kralíske, so javéla paló saró davá. Čačunó isyn davá sunó, i patiaibnýtko isyn znáčyma!”

⁴⁶Tén'ci králi Navuhodonosóro dyjape muial péske i bandija angíl Danijeljoste, i priphendiá te janén léske počastúnki (dáry), i te thuvliakiren drogoné smolenca léske.

⁴⁷I otphendiá i rakirdiá o králi Danijeljoske: “Čačes, tumaró Devél isyn Devél devlengiro i Baró Raj kral'jengiro, Savó otkerela garadé čačipená, kiéli tu dyján ráda te otkeres davá garadó čačipén!”

⁴⁸Tén'ci ĥazdyjá upré o králi Danijeljos i dyjá léske but baré počastúnki, i čhudiá les upré pe sarí Vavilonytko phuv i anglune barydyrésa upré sarénde godypnaskirende dro Vavilóno.

⁴⁹Ne Danijéljo mangdiá kralís, i jov čhudiá Šedrahos, Mišahos i Avied-Niegos upré pe réndy Vavilonytkone-theméskire, i o Danijéljo jaciápe pašýl kralískiri gréda (dvóro).