Read Biblija - Pe Baltitko Romani čib (Romanes) 2019 Baltic Romani Bible Danijéljo 5 Bible Online

Danijéljo 5 - Biblija - Pe Baltitko Romani čib (Romanes) 2019 Baltic Romani Bible bible

Danijéljo 5

¹O Valtasaro králi kerdiá baró skamínd vaš péskire tysjoncenge i angíl tysjoncengire jakhá pija mol (vino).

²Koštyi mol, o Valtasaro priphendiá te janén suvnakuné i rupuvé khoré (sasúdy), savé Navuhodonosóro, léskiro dad, vylydžijá Jerusalimóskire Khangirjátyr, sob (kaj) te p'jel léndyr kralíske, leskre range, léskire džuvlienge i léskire-bisovlahakire džuvlienge.

³Tén'ci jandlé suvnakuné khoré, savé sys lyné sventoné Devlikane Khangirjátyr dro Jerusalimo; i piné léndyr o králi i thagárja léskire, e džuvliá léskire i léskire-bisovlahakire džuvliá.

⁴Piné mol, slavindle develá (devloren), suvnakuné, rupune, xarkuné, sastruné, kaštune i baruné.

⁵Dre kodoia-pac' mardó (štúnda) vyginé angušta (pal'cy) manušytkoné-vasteskire i čhindlé proti lampada pe zvjoska pe parniakirdy vánta dre felatin (kolov) kralískiri, i o králi dykhciá burnyk (kist') vastytko, saví čhinelas.

⁶Tén'ci kralískiro muj parudiape dre léskiri mina; e dúmy léskire pharjakirde les adiáke, saré trušula (čriesly) našade zor, čangá léskire lyné te marénpe jekh pir javír.

⁷Zoralés zadyja godly o králi, sob (kaj) te janén kalé-magitkonen, e Xaldiejen, i e drabakiribnaskiren pe planiety. O králi lyjá te rakirél, i phendiá godypnaskirenge dro Vavilóno: “Kon ginéla, so davá čhindló isyn i piriphenela mánge, kodová javéla uridó dro loló phar, i suvnakuný zandir (cepka) javéla pe léskiri men, i tritonesa barydyrésa javéla jov pe lydžino them dro kralipén.”

⁸I zaginé saré kralitka godypnaskire, ne na dyné ráda te proginen čhindló i te piriphenen kralíske znáčyma léskire sunestyr.

⁹O králi Valtasaro sys drieván darano; e mina moskiri léste parudiape; léskire thagárja (kniázi) sys smentna.

¹⁰Králica, xači, pe kralískire lavá i rangire péskire, zagijá dre štúba xabnaskiri, lyjá te rakirél kralísa i phendiá: “Králjo, te dživés tu dre viéki! Mek te na ladžakiren tut tyré mysli, mek te na parudjol mina pe tyró muj!

¹¹Isyn dro tyró kralipén o murš, savéste isyn Dúho (Fáno) sventoné Devlengiro; dro dyvesá tyré dadéskire sys lathno dre léste dud, godý i ĥalyibén, savé sys syr devlýtko god'varipen, i o králi Navuhodonosóro, tyró dad, čhudiá les barydyrésa pe čovahane-podphenybnaskirende, pe kalé-magitkonende, pe Xaldiejende, pe čovahanende i pe drabakiribnaskirende pe planiety,

¹²pal-dová so dre léste, dre Danijeljoste, savés o králi pirikhardia dre Valtasaroste, sys vučó dúho (fáno), džinybén i godý, te piriphenel suné, te rozlel šerepharibnytka zadyibena (te piriphenel dová, kaj isyn ĥarado ĥalyibén) i te rosčhuvel venzly. Adiáke mek te kharén Danijeljos, i te piriphenel jov túke znáčyma.”

¹³Tén'ci sys jandlo Danijéljo angíl kralíste, i o králi lyjá te phenél i rakirdiá Danijeljoske: “Ci san tu o Danijéljo, jekh pliennone Judytkone čhavéndyr, savén miro dad, o králi jandiá Judejátyr?

¹⁴Me šunavas pal túte, so Dúho (Fáno) Devléskiro isyn dre túte i dud (svéto), i godý, i vučó ĥalyibén lathno dre túte.

¹⁵Ake, sys lydžiné sys ke me godypnaskire i kalé-magitka, sob (kaj) te proginen dasavo čhinybén i te rosphenén mánge znáčyma suneskiri; ne jone na dyné ráda te ĥaljon vaš mánge dová.

¹⁶I me šundjom pal túte, so tu moginésa te piriphenes znáčyma i te roskhuves venzly; adiáke, kiéli tu désa ráda te progines davá čhindló i te ĥaljos vaš mánge léskiri znáčyma, to tu javésa uridó dro loló phar, i suvnakuný zandir (cepka) javéla pe men túte, tritone barydyrésa javésa dro kralipén.”

¹⁷Tedy otphendiá Danijéljo, i phendiá kralíske: “Počastunki tyré mek te jačénpe túte, i mazurja (počesti) otdé javireske; čhindló me proginava kralíske i rosphenava znáčyma léskiri.

¹⁸Králjo! Sámo Vučedýr Devél dyjá tyré dadéske Navuhodonosoroske kralipén, baripén, rajkanypen i patýv.

¹⁹Angíl rajkanypen, savó Jov dyjá léske, saré manušýtka nácyi (narody), kherítka ródy (pliémi) i jekhe-čibakire irjá (čibá/ čibjá) (jazyki) izdrandyne i darándyne léstyr; kon sys na trej léske, kodolés jov zamarelas, i kon sys trej léske, jov jačkirdiá te dživél; konés vykedyjá, to čhudiá vučés, konés jov vykedyjá, odolés čhudiá telé.

²⁰Ne kiéli léskiro iló jaciá barikano i dúho (fáno) léskiro kaštalyja phut'kiribnasa, jov sys čhurdynó telé kralískire skamindestyr, i léskiro baripén sys lynó léstyr.

²¹Tén'ci jov sys manušéngire čhavéndyr, i iló léskiro kerdiápe syr riskiribnáskire murdaléste, i sys tradyno krig jov xrustytkone oslenca te dživél. Les čarade čarjasa, syr guruvés, i masá léskire sapane sys bolybnytkone pahlyniasa (rosasa), ke/ žýko dová, syr jov ĥalyjá, so upredyr manušytkoné kralipnastyr isyn xuláj Naj Vučedyreskiro Devél i Jov čhuvéla upré, konés Jov vykedéla.

²²I tu san, léskiro čhavó Valtasaro, na tykniakirdian phut'kiribén tyró, na dykhí, so tu džinesas pal saró dová,

²³ne tu ĥazdyjanpe proti Raste-Devléste bolybnaskireste i khoré (sasúdy) Léskire kheréstyr lydžiné ke tu i tu i tyré thagárja, e džuvliá tyré i bisovlahire džuvliá tyré piné léndyr mol (vino) i tu šardian devloren rupéstyr i suvnakástyr, xarkomátyr (miediatyr), sastyrestyr, kaštéstyr i e barestyr, savé na dykhéna, na šunéna, na ĥaljona; a Devlés, dre Konéskiro vast isyn tyré phurdypen (dyhinyben) i Konéste isyn saré dromá tyré, Odolés tu na barjakirdian.

²⁴Paldavá bičhady Léstyr e burnyk (kist') vastytko, i čhindló sys dová čhinybén.

²⁵Ake, so isyn čhindló: mienie, tiekiel, uparsin.

²⁶Ake, i znáčyma lavengiri: mienie — vygindiá o Devél tyró kralipén i čhudiá léske kónco (jagóro);

²⁷Tiekiel — tu važyndlo san pe ubladýtka (viesy) i tu san drieván lokho;

²⁸Pieries — rosčhudo pe pašá tyró kralipén i otdynó Midianenge i o Piersenge.”

²⁹Tén'ci piró priphenybén Valtasaroskiro uridé Danijeljos dro loló phar i čhudé suvnakuný zandir (ciep') pe léskiri men, i khardé angíl sarénde les tritone barydyrésa pir kralipén.

³⁰Dre kodoia rat, xači, o Valtasaro, Xaldiejengiro králi, sys zamardo,

³¹i o Darijo Midianengiro, prilyjá kralipén, i sys léske šovdešá duj berš.