Read Biblija - Pe Baltitko Romani čib (Romanes) 2019 Baltic Romani Bible Danijéljo 9 Bible Online

Danijéljo 9 - Biblija - Pe Baltitko Romani čib (Romanes) 2019 Baltic Romani Bible bible

Danijéljo 9

¹Pe pérvo berš Darijoskiro, čhavéskire Asuiroskiro [Ahašvierošoskiro-ju.o.][5], Midianytkone rodóstyr, savó sys čhudo kralísa pe Xaldieitko kralipén,

²pe pérvo berš léskire kralipnaskiro, me-da, Danijéljo, ĥalyjom lylvar'jendyr čyslo (gin) beršuno, pal savó sys lav Ráskiro-Devléskiro ke proróko Jeriemiéjo, so pal eftadešá berš Jerusalimo javéla čhučó (pusto).

³I riskirdjom me muj miro Ráske-Devléske patierjasa i mangipnasa dro posto i dro balytko gonó praskasa.

⁴I mangdjompe me Ráske-Devléske miréske i otkeravas me iló i rakiravas: “Mangáva Tútyr, Rajo Dévla, baró i divno ke dar, Kon rakhéla zavieto i láska kodolenca, savé rikiréna Tut syr Drógima dro iló i rikirenape ke priphenybená Tyré!

⁵Kerdiám grého ame, bizakonytka réndy, kerasas bipatyvales, kerdiám búnto i otgijam Tyré priphenybnastyr i Tyré uphenybnastyr,

⁶so kandasas pishar'jén Tyrén, e prorokén, savé Tyré lavéstyr rakirdé amaré kral'jenge, i amaré thagar'jenge, i amaré dadénge, i saré manušénge dolé themestyr.

⁷Túte, Rajo, isyn čačipén, i aménde pe muiá isyn ladž; syr akaná, kažnoné Judoste, syr Jerusalimóskire džiibnaskir'jende, i ke saró Izrailjo, dre pašatunende i duranende, dre saré thema, karik Tu tradyjan len paló léngiro otgiiben, savésa jone otginé Tútyr.

⁸Rajo Dévla! Aménde ladž isyn pe muiá, amaré kral'jénde, amaré thagar'jende i amaré dadende, pal-dová so ame grého kerdiám angíl Túte.

⁹I amaré Raste-Devléste isyn láska, otmekiben grehengiro, pal-dová so ame sámas buntuítka proti Léste.

¹⁰I ame na kandyjam zan Ráskire-Devléskiri, amareskiri, sob (kaj) te kerás pir Léskire zakóny, savé Jov dyjá aménge pir Léskire dynar'jende, prorokénde.

¹¹I saró Izrailjo phagirdiá Zakóno Tyró, i otrisija, sob (kaj) te na kandel zan Tyrí; i paldavá vythadyja pe aménde prokošybén i sovláh, savé isyn začhindlé dro Mojzáskiro Zakóno, Devlykane dynariskiro, pal-dová so ame kerdiám grého angíl Túte.

¹²I Tu pherdiakirdian Péskire lavá, savé Tu rakirdian pe aménde, i pe amaré sendar'jende, savé sendiakirenas amen, bičhavi pe aménde bari bída, saví na sys tel bolybén, i saví kerdiápe pe Jerusalimo.

¹³Syr čhindló isyn dro Mojzáskiro Zakóno, adiáke sarí kadaja bída mardia amen; ne ame na mangdiam dre pátieri (molítva) Ras-Devlés amares, sob (kaj) aménge te risjovas amaré bizakonytkone rendéndyr, i te ĥaljovas čačipén Tyró.

¹⁴Paldavá prirakhcia o Raj Devél kadasavi bída i bičhadiá la pe aménde; pal-dová so čačunó isyn Raj Devél amaró dro saré Léskire réndy, Save keréla, ne ame na kandyjam zan Léskiri.

¹⁵Akaná, Rajo Dévla amaró, Savó lydžijá Tyré manušén Jegiptóskire phuvjátyr zoralé vastésa i sykaví Tyrí sláva, syr adadyvés! Kerdiám grého ame, kerdiám napatyvales.

¹⁶Rajo Dévla! Piro saró Tyró čačipén, mek te risjol Tyrí xolý i Tyró baró xoliakiribén Tyré foróstyr, Jerusalimóstyr, sventoné Tyré bergátyr, pal-dová so pal amaré gréhi i bizakonytka réndy (diély) amaré dadengíre, o Jerusalimo i Tyré manušén obrakirena saré, savé isyn pašýl aménde.

¹⁷Akaná šun, amaró Dévla, e pátieri (molítva) tyré pishariskiri i mangipén léskiro, i, mek te ziainel Tyró muj piró čhučakirdo Tyró sventypnaskiro štéto, savó isyn čhučakirdo (pustošono) Túte, Rajo Dévla.

¹⁸Pričhúv, miro Dévla, kan Tyró i šun, otker Tyré jakhá i dykh pe amaré čhučipena i pe fóro, savó khardo pir lav Tyró; pal-dová so ame kedasam amaré mangipena angíl Túte, amaré čačuné réndy, ne pir Tyrí bari lačhé-ilýtkima.

¹⁹Rajo Dévla, šun! Primang (prostin) aménge, Rajo Dévla! Kande i ker sygedýr vaš Túke Kokoreske, Dévla miro, Tyró Lav dynó Tyré foroske i Tyré manušénge.”

²⁰I kiéli me rakiravas i mangavaspe, i otkeravas iló pal miré gréhi i pal gréhi miré narodoskire Izrailjostyr, i pašliakiravas mangipén miro angíl Raste-Devléste mireste pal svénta bérga miré Devléskiri;

²¹kiéli iščo (inké) me rakiravas pátieri (molítva), o murš Gabrieljo, savés me dykhávas dro sámo anglypén dro dykhibén, sygo priurniandyja, čiladiá man, kiéli sys pašýl časo vaš bel'veliakiro svénto dyibén,

²²i jov délas godý mánge, rakirdiá mánca i phendiá: “Danijelie! Akaná me gijom telé, sob (kaj) te sykliakirav tut te ĥaljos.

²³Angíl, syr tyró ilytko mangipén dyjá o lav, i me javdjom te phenáv túke, so tu san murš pir iló (želanno): adiáke te ĥaljos davá lav i te ĥaljos dykhibén:

²⁴eftadešá kurke sys gindlé vaš tyró narodo i tyró svénto fóro, Jerusalimo, sob (kaj) učhakirdo te javél čoripén i te končynenpe gréhi i te javén vykhosle bizakonytka réndy (bizakonii), i, sob (kaj) te javél lydžino viéčno čačipén, te javén zapiečatyme dykhibén i proróko, i te javél pomakhno Svénto-sventonengiro.

²⁵Adiáke džin i ĥaljov: so dolé dyveséndyr, kiéli vydžála priphenybén te ĥazdén nevés Jerusalimo, ke/žýko o Miesija/Thagári [Hristóso, Baró Raj-r.s.] isyn eftá eftytka (sied'miny) i šovdešá duj eftytka, i ĥazdéna nevéstyr vulícy (gásy) i vánty, ne dre pharé časy.

²⁶Syr prodžána šovdešá duj eftytka, to javéla otdynó pe meribén o Miesija/Thagári [Hristóso-r.s.], i na javéla Les; javír thagári léskire manušénca rosphagirena i fóro i svénto štéto, savó javéla, i kónco léstyr javéla syr da baré-tasadypnaskire paningestyr, i ke kónco maribnaskiro javéna čhučakiribena (spustošenii).

²⁷Tén'ci jov čhuvéla zor pe zavieto vaš butenge pe jekh eftytko, i dre paš eftytko pirijačelape svénto janybén, i marunó svénto dyibén, i pe phak (krylo) sventoné štetoskiro javéla čhučakirdo džungalypén (brytkima) i angíl dová, syr sykadyno xasibén peréla pe čhučibnariste (spustošytieljoste).”