Read Biblija - Pe Baltitko Romani čib (Romanes) 2019 Baltic Romani Bible Osija 1 Bible Online

Osija 1 - Biblija - Pe Baltitko Romani čib (Romanes) 2019 Baltic Romani Bible bible

Osija 1

¹Ake, isyn lav Ráskire-Devléskiro, savó javdiá Osijáske, čhavéske Biejeroskiréske dre dolé dyvesá, kiéli raindlé štar králja Judejákire: Ozíia, Ioafámo (Jofamo), Aházo, i Jezekíia i dre dolé sáma dyvesá, kiéli kralindiá pe Izrailjo o Jerovoámo (Iierovoamo), čhavó Joasoskiro (Ioasoskiro).

²Ake, syr Raj Devél lyjá te rakirél pir Osijáste. I phendiá Raj-Devél Osijaske: “Džá, le péske biladžakunia džuvliá, i te javén tyré čhavoré biladžakuné. Pal-dová so daja phuv drieván keréla biladžaipén (marki), syr léngire manušá durjona (otginé) Rástyr-Devléstyr.”

³I jov gijá i lyjá Gomierjá, čha Divlaimoskirja, i joj iaciá pharí i bijandiá léske čhavores.

⁴I phendiá Raj-Devél léske: “De lav léske Izriejeljo[1], pal-dová so iščo (inké) nábut i prodžála i Me dukhavava pale pal rat dro Izriejelie, so pročhudiape dro kher Iiujoskiro (Igujoskiro)[2], i Me keráva adiáke, so pirijačena te javén králja kheréstyr Izrailjoskirestyr.

⁵I javéla adiáke: Me phagirava lúko Izrailjoskiro pe dólo Izriejeljoskiro.”

⁶I joj nevéstyr jaciá pharí i joj bijandiá čhajorja. I Devél phendiá Osijaske: “De lav láke Loruhama[3], pal-dová so Me butýr na javáva te sykavav láska pe kher Izrailjoskiro, sob (kaj) te otmekav bang lénge.

⁷Ne Me sykaváva láska pe kher Judáskiro, i Me, Raj Devél, léngiro Devél, vyrakhava len, ne ná lukósa, ná kurtalása, ná maribnása, ná grénca, ná uklistengire xaladenca.”

⁸I, ake, paló (poslie) dová, syr Gomier' dyjá kolýn Loruhamake, joj iaciá pharí i bijandiá čhavores.

⁹I phendiá Raj-Devél Osijaske: “De lav léske Lo-ammí[4], pal-dová, so tumé na san Miré manušá, i Me na javáva tumaró Devél.”

¹⁰Ne čhavé Izrailjoskire javéna adákicy but, kicý isyn práho pe mórjo (derjáv), so naštý te vymierines i te gines. I javéla adiáke: pe štéto, kaj rakirdé lénge: “Tumé na san Miré manušá,” akaná odój phenéna lénge: “Tumé san čhavé džidé Devléskire.”

¹¹Tedy čhavé Judáskire i čhavé Izrailjoskire kedenape khetané i jone čhuvéna péske jekhe šerales, i jone džána krig čužoné phuvjátyr, pal-dová so baró javéla dyvés Izrailjoskiro.