Read Biblija - Pe Baltitko Romani čib (Romanes) 2019 Baltic Romani Bible Osija 11 Bible Online

Osija 11 - Biblija - Pe Baltitko Romani čib (Romanes) 2019 Baltic Romani Bible bible

Osija 11

¹Pe zlóko (pe ránko) králi Izrailjoskiro xasjola! ‘Syr Izrailjo sys bijáto, jov jaciá drógo Mánge, i Me khardjom Miré čhavés Jegiptóstyr.

²Jone, Miré proróki, khardé les, ne jov durija léndyr. Léskire manušá janénas Vaaloske svénta dyibená, i thuvaliakirde drogoné smolenca vyčhindlé mujenge barestyr.

³Me sykliakirdjom Jefriemos te psirél, Me lyjom (lydžijom) les pe vastá; ne jone na džindlé, so Me sastiakirdjom len.

⁴Me prityrdavas len kovlé dor'jénca (šylorenca) manušytkoné laskasa, i Me sómas vaš lénge sýrby kodová, kon léla krig ĥámo léngire žandendyr, i Me kovles čaliakirdjom len.

⁵Jov na risjola pale pe phuv Jegiptóskiri, ne Asuro (Asirijatyr) javéla králi lénge: pal-dová so jone otphendlepe te risjon ke Me.

⁶I kurtála peréla (javéla te risjol odorík i pale) pe fórja léskire, i joj iavéla te čingirel telé léngire štaby, i xasiakiréla len pal léngiri godý.

⁷Miré manušá bandine, sob (kaj) te durjon krig Mándyr. Na dykhí pe dová, so jone kharna Man te pomoginav, Naj Vučedyrones, nijékh léndyr na barjakiréla Les.

⁸So Mánge te keráv túsa, Jefriemie? Syr Me vydava tut, Izrailie? Syr Me te keráv túsa syr Admasa [Adamasa-r.s.]? Syr Me saštý te keráv túke odová, so kerdjom Sevoimoske [Cevoimoske-ju.o.]? Miro iló risijá dre Mánde, Mirí láska (žalost') roshačija.

⁹Me na javáva te keráv pir saró zoralypén Miré xolynakiro, Me na javáva te xasiakiráv Jefriemos. Pal-dová so Me som Devél, a na manúš, Jekh Svénto maškír tuménde; i Me na javáva trašasa dro fóro.

¹⁰Jone džána palál pal Raste-Devléste; Jov javéla te rykinel sýrby ščer (liévo). Syr Jov léla te rykinel, tén'či Léskire bijaty javéna te džán sygedýr trinskiribnasa pal-paniendyr (zapadostyr).

¹¹Jone javéna sýges trinskiribnasa sýrby čirikliá Jegiptóstyr, sýrby golumby Asirijákire phuvjátyr. Ne Me dáva vólia lénge te dživén dre léngire kherá,’ — rakiréla Raj Devél.

¹²Jefriémo občhudiá Man xohaibnasa, i kher Izrailjoskiro frentymasa. Ne Juda duredýr psirelas Devléskire dromésa i sys patiaibnytkone sventonenca.