Read Biblija - Pe Baltitko Romani čib (Romanes) 2019 Baltic Romani Bible Osija 14 Bible Online

Osija 14 - Biblija - Pe Baltitko Romani čib (Romanes) 2019 Baltic Romani Bible bible

Osija 14

¹[13.16-ju.o.] Manušá Samarijatyr javéna bangé paldová, so jone kerdé búnto proti léngire Devléste. Jone peréna kurtalátyr, léngire bijaty javéna rosčingirde (pekade) pe koterá, i léngire pharé džuvliatyr otlena tyknemasen.’

²O Izrailie! Risjov pale ke Raj Devél, tyró Devél, pal-dová so tu obštadianpe ĥerjasa pal péskiro čoripén.

³Len pésa mangipnytka lavá i risjon pale ke Raj Devél, rakirén Léske: “Otmek aménge saró čoripén i prilé amen laskasa, sob (kaj) aménge te janas svénta dyibená amaré uštendyr.”

⁴Asuro (Asirija) butýr na javéla te rakhél amen, ame na javása te tradas uklisté, i ame na javása butýr te rakiras pe butý amaré vastengiri: ‘Tumé san amaré develá’; pal-dová so i piroty (bidadengire čhavoré) lathéna láska Túte.”

⁵Me sastiakirava len daléstyr, so jone otpyne (durine) Mándyr, Me sykaváva láska lénge iléstyr; pal-dová so Mirí xolý risijá krig léndyr.

⁶Me javáva sýrby pahlyn (rosa) vaš Izrailjo i jov javéla te luludjol syr lilija, i jov mekéla péskire kórni (rukhá) sýrby drevy pe Liváno.

⁷Léskire randiá (vétki) rozbugljona (rozmekenape), i léskiri šuk (gožyma) javéla sýrby maslinitko kašt i léskiro lačhé — sungakiro khandypen (parfuny) javéla sýrby kiedrendyr pe Liváno.

⁸Jone, savé javéna te dživén tel Mirí zer (zasienka), risjona i jone javéna te otdžidjon sýrby giv, i javéna te barjon sýrby vinagradýtko kašt. Jone javéna lačhés te pahnison sýrby mol (vino) Livanostyr.”

⁹Jefriémo phenéla: ‘So mánge iščo (inké) trej idolendyr?’ Me otphenava léske: ‘Me javáva te šunav, i te dykháv pal túte? Me javáva syr kipariso, savó rozmekcia, Raj Devél, patria (listy). Mándyr javéna túte baritka (plódy).’

¹⁰Kon isyn godó, sob (kaj) jov te ĥaljol saré dalé lavá? Kon isyn baré-godiákiro, sob (kaj) jov te džinél davá saró? Pal-dová so Ráskire-Devléskire dromá isyn čačuné, i čačipnaskire manušá psiréna pir lénde, ne čoripén-keribnaskire obštavenape pir lénde.