Read Biblija - Pe Baltitko Romani čib (Romanes) 2019 Baltic Romani Bible Osija 4 Bible Online

Osija 4 - Biblija - Pe Baltitko Romani čib (Romanes) 2019 Baltic Romani Bible bible

Osija 4

¹Šunén lav, Ráskire-Devléskiro, čhavé Izrailjoskire, pal-dová so Raj Devél bangiakirela manušén, kon dživéla pe doiá phuv: ‘Nane patiaibén, nane lačhipén, i nane džinybén pal Devléste pe kodoia phuv.

²Manušá sovlahana, xohavena, muliakirena, i čorena, muršá i džuvliá keréna biladžakuné réndy, jone phagirena saré miery, i manušéngiro rat čhuvélape jekh pal jekh.

³Paldavá phuv javéla te tuginel zoralés, i kažno (sváko) manúš, kon dživéla pe láte, javéla te xasjol (te properel) khetané feldytkone murdalénca (zvierienca), bolybnytkone čiriklienca, adiáke-pac' i mačhé morjoskire (derjavéskire) xasjona.”

⁴Sob (kaj) nijékh manúš te na lydžál čingárd javiresa, ci te na vyrakirel javireske, pal-dová so tumaré manušá isyn sýrby kodolé, savé lydžána čingárd (čingardenape) rašása.

⁵Tumé javéna te obštavenpe dyvesé, i proróko adiáke-pac' obštavelape tuménca ratý: i Me xasiakiráva tumarja da.

⁶Miré manušá xasjona pir dová, so lénde na uhtyléla (nádosi) džinybén Ne pal-dová, so tumé, rašajale, otphendlepe džinybnastyr, Me adiáke-pac' otphenava tuménge, sob (kaj) tumé butýr te na javén syr rašaja angíl Mánde, i pir dová, so, tumé bistyrde Devléskiro Zakóno, Me bistrava tumaré čhavorén (bijatén).

⁷So butedýr isyn rašaja, to butedýr jone keréna gréhi proti Mánde, i Me riskiráva léngiro baripén dre ladž.

⁸Jone čaliakirenape Miré-manušéngire grehénca, so janéna Miré manušá, a léngiro iló tyrdelape ke kerél čoripén.

⁹I javéla adiáke: so javéla manušénca, dová-pac' javéla rašanca. I Me pharés sendiakirava len pal dová, so jone kerdé, i Me otdáva pale pal léngire réndy (diély).

¹⁰Jone javéna te xan, ne jone na javéna čale, jone javéna te kerén ladžakune réndy (diély), ne jone na rozbarjonape, pal-dová so jone pirijačne te kandén Ras-Devlés.

¹¹Biladžaipén, mol (vino), neví bravinta [napitko-r.s.] — ĥáda, so isyn lénde pe iló te kerén.

¹²Miré manušá phučena kaštune idolendyr, sob (kaj) te den godý lénge, i léngiro destó sýrby phenéla lénge, so te kerén. Biladžakuno dúho (fáno) lydžála adiáke, so jone denape dukhá, i jone giné te kerén biladžakuné réndy i durine Mándyr, léngire Devléstyr.

¹³Jone janéna svénta dyibená pe vučipená bergakire (feli), i jone thuvaliakirena drogoné smolenca pe bérgicy, tel demby, tel topoli, i tel terebinto pir dová, so léngiri zer (zasienka) isyn bari, paldavá léngire čhaja keréna biladžaipén i léngire borja kaména javire muršén.

¹⁴Me na javáva pharés te sendiakirav léngire čhajén, kóli jone keréna biladžaipén i léngire bor'jen, kóli jone kaména javire muršén, pal-dová so léngire muršá kokoré khetaniakirenape nalačhé džuvliénca, i jone janéna svénta dyibená biladžakuné džuvliénca, a manušá, savé na džinéna but, xasjona.

¹⁵Na dykhí pe davá, so tumé, Izrailjoskire manušále, keréna biladžaipén, xoc' by te na kerén čoripén Judáskire manušá. Sob (kaj) jone te na džán pe Galgálo, i te na ĥazdénpe pe Bier-Avien, i sob (kaj) jone te na sovlahan: ‘Te javél džidó Raj Devél’

¹⁶Paldavá Izrailjoskire manušá isyn pharé-šerítka (narta) sýrby pharé-šerítko réca (tjolka) isyn; akaná syr davá, Me, Raj Devél, javáva te čaravav len sýrby bakrores pe bari félda.

¹⁷Jefraimo (Izrailjo) risijá ke ídoly, mekén les kokores, jekhdžines.

¹⁸Léngiro matyben isyn džungaló (brydko), jone duredýr keréna biladžakuné réndy, léngire thagar'jenge (kniazienge) trej iléstyr bipatyv.

¹⁹Balvál učhakiréla len péskire phakenca, i jone javéna ladžakirdé léngire sventoné dyibnendyr.’