Read Biblija - Pe Baltitko Romani čib (Romanes) 2019 Baltic Romani Bible Osija 7 Bible Online

Osija 7 - Biblija - Pe Baltitko Romani čib (Romanes) 2019 Baltic Romani Bible bible

Osija 7

¹Kiéli Me sastiakiravas Izrailjo, tedy xohaibén [čoripén-ju.o.] Jefriemoskiro otkerdiape / sykadyjá i fuipén Samarijakiro. Pal-dová so jone keréna xohanés, lénde isyn čora, savé phagirena kherá, i rozmaribnari (šajka rozmaribnytko) peréla javrí pe manušénde.

²Jone na duminéna dre péskire ile, so Me ripirava saró léngiro fuipén; akane léngire réndy isyn trusciál (vokrug) lénde; jone isyn saré angíl Mánde.

³Jone radynena kralís léngire fuipnasa, i thagar'jen léngire xohaibnasa.

⁴Jone xačona te kerén biladžaipén sýrby bov, savó roshačkirdia pekibnaskiro (piekarjo) — ĥáda, jov pirijaciá te kerél butedýr jag paló dová, syr zamiešyndlo xumer (tiasto) ĥazdélape.

⁵Pe svenkitko dyvés amaré kralíste, e thagárja (kniázi) nasvaliakirde les, matiakirde moliasa (vinosa); i jov lyjá te tyrdel péskiro vast ke odolé, savé xoliames sanape léstyr.

⁶Jone roshačkirena péskiro iló sýrby bov, kiéli jone podrakhena te zamarén: léngiro pekibnaskiro (piekarjo) sovela sarí rat, ne tasiárles (pe zlóko) jov xačola syr bari jag.

⁷Jone isyn xačkirdé syr bov, i jone pohane péskire sendar'jen. I léngire králja pyné, nane nijékh manúš maškír lénde te kharel Man.

⁸O Jefriémo khetaniakirdiape (zmiešyndia pes) maškír Najudytkoné manušénde; Jefriémo isyn sýrby paramo [maró-r.s.], so pekelape napiriskirdo.

⁹Javiré — theméskire (čúža) manušá pohane léskiri zor, ne jov na džinéla dová. Léste isyn syva balá adáj i odój, ne jov na džinéla davá.

¹⁰Izrailjoskiro phut'kiribén dophenéla dro muj léskire manušénge, ne jone na risiné pale ke Raj Devél, léngiro Devél, i jone na rodéna Les dro saró davá.

¹¹Jefriémo adiáke-pac' isyn sýrby dylynin'ko golumbo, savéste nane godý: jone kharéna Jegípto, ne jone džána ke Asirija.

¹²I kiéli jone džána, Me čhurdava Mirí khudý (siet') te uhtylav len; Me tyrdava telé len syr bolybnytkone čiriklien, savé isyn dro fáno (vozduho). Me pirisykliakirava len ke dukhá, kiéli léngiro skedyibén šunéla pal davá.

¹³Bida pe lénde, pal-dová so jone otginé [našné-ju.o.] Mándyr! Xasibén pe lénde, pal-dová so jone kerdé čoripén proti Mánde! Na dykhí pe dová, so Me vyrakhcjom len, usajékh jone rakirdé xohaibén proti Mánde.

¹⁴Jone na khardé zoralés Man saré léngire iléstyr, kiéli jone tugindle jasvénca pe péskire čhuibena. Jone kedenaspe khetané pal maró (givá) i mol (vino), i jone keréna búnto proti Mánde.

¹⁵Na dykhí pe dová, so Me sykliakirdjom len ke dukhá, i zoraliakirdjom Me léngire vastá, ne jone priduminenas čoripén proti Mánde.

¹⁶Jone risiné pale, ne na ke Sámo Barydyr; jone isyn syr došvalo lúko. Léngire thagárja peréna kurtalátyr pal péskiri čib, so rakirdiá xoliamipen (dierzosti). Pe phuv Jegiptóskiri léndyr javéna te sanpe.