Read Biblija - Pe Baltitko Romani čib (Romanes) 2019 Baltic Romani Bible Osija 9 Bible Online

Osija 9 - Biblija - Pe Baltitko Romani čib (Romanes) 2019 Baltic Romani Bible bible

Osija 9

¹Na rádynpe drieván (but), Izráilie ke vučipén, syr javír manušýtka nácyi (narody), pal-dová so tu durijan tyré Devléstyr pir biladžakuné réndy (diély). Túke jaciá pir iló pleskiriben pal biladžaipén pe kažno šúrna (gumno).

²Šurna givaobkeribnaskiri i prieso na čaliakirena len, i neví mol / sóko (xum) xohavela len.

³Jone na javéna te dživén pe phuv Ráskire-Devléskiri, a Jefriémo risjola pale ke Jegípto, i jone javéna te xan nažužé xabena dre Asirija.

⁴Jone na javéna te čhuvén vaš Ráske-Devléske mol (vino) syr svénto dyibén, adiáke-pac' i léngire svénta janybená na javéna lačhé Léske: jone javéna syr maró pe garaiben, i saré, kon xála, les, javéna magirdé. Davá maró javéla jekh lénge te javén čale, ne jov na javéla vaš Kher Ráskire-Devléskiro.

⁵So javéna tumé te kerén dro dyvés, kiéli trej te javél skedyibén, dro dyvés svenkitko Ráskire-Devléskiro?

⁶Pal-dová so, ake, jone džána krig, syr javéla xasibén. O Jegípto kedela len khetané; O Miemfiso javéla te garavel len. Cuknuda (striekava)[13] léla lofo pe léngire rupuvé barvalypena (kučipena); a phusadytka xrústy javéna dre léngire šátry.

⁷Javné dyvesá te dykhén len, javné dyvesá vaš séndo: tu, Izrailie, javésa te džinés pal davá! O magiko isyn na bare-godiákiro; a manúš, savó rossendiakirelas dro dúho (fáno), isyn bigodiakiro, pir dová, so drieván xor isyn tyró čoripén, i drieván zoraló isyn tyró namalypen (vrogima).

⁸Ci isyn Jefriemoste rakhibnaskiro (stražo) te dykhél pal javirende palál miré Devléste? Ne léskiro proróko isyn sýrby felý čirikle-uhtylybnaskireste (pticelovste) pe saré léskire dromá, i isyn sýrby khudý (sietka) dro kher léskiro Devléskiro.

⁹Jone xor pyné dro biladžaipén, syr dre dyvesá Givakire. O Devél javéla te ripirel léngiro čoripén, Jov javéla pharés te sendiakirél pal léngire gréhi.

¹⁰Me lathjom tut, o Izrailie, sýrby vinagradýtko (drakhitko) mura pe čhučí (pusto) félda; Me dykhcjom tumaré daden sýrby pérva baritka (plódy) pe inžyritko drévo dro péskiro pérvo siezono. Ne kiéli jone giné ke Vaalfiegoro, tedy jone otdyné pes ladžaipnaske; jone jačné džungalé sýrby ídoly, so jone kamlé.

¹¹Jefriemoskiro baripén, syr čirikly vurniala krig — na javéla ni bijanypén, ni pharipén, nane ni khabnypen (začatijo).

¹²Na dykhí pe davá, so jone barjakirena péskire čhavorén (bijatén), ne Me láva krig len ke palatunó (posliednjo) manušoro. Čačó, bída peréla pe lénde, kiéli Me otdžava (durjovava) léndyr!’

¹³Ne adiáke-pac' me, Osija, dykhcjom Jefriemos, savó sys syr Tíro, savó sys počhudo pe šukár štéto. Ne Jefriémo lydžála angíl péskire bijatén te zamarén len.

¹⁴De lénge, Rajo Dévla, — dová, so Tu désa? De lénge ločoví/ džuvliá bičhavorengirja, i šuké ciucia!’

¹⁵Raj Devél rakiréla: ‘Saró léngiro fuipén isyn dro Galgálo, pal-dová so odój Me lyjom zoralés te na vyrikirav len: pir dová fuipén, so jone kerdé, Me tradava krig len Miré kheréstyr, Me na javáva butýr te prilav len. Léngire saré thagárja (kniázi) buntynena.

¹⁶Jefriemóskire manušá isyn dukhade: léskire kórni (rukhá) vyšutine, jone na déna phabá. Čačó, lénde butýr na javéna čhavoré, Me muliakirava drogoné bijatén léngire ločoviátyr (utrobatyr).

¹⁷Miro, Osijaskiro Devél, čhuvéla len krig Péstyr, pal-dová so jone na kandyné Les; i jone javéna psiribnáskire manušá (skital'cy) maškír Najudýtka nácyi (narody).