Read Biblija - Pe Baltitko Romani čib (Romanes) 2019 Baltic Romani Bible Ioil 2 Bible Online

Ioil 2 - Biblija - Pe Baltitko Romani čib (Romanes) 2019 Baltic Romani Bible bible

Ioil 2

¹Phurdén dro rógo (dre truba) pe Sióno, i ĥazdén gódla pe svénto Devléskiri bérga; mek saré manušá, kon dživéla pe phuv — te izdran, pal-dová so javéla pašedyr Ráskire-Devléskiro dyvés, ake, jov otkerlape:

²iavéla davá dyvés kaló i tugitko, xmurýtko dyvés ĥenstone kalypnasa (ciamlypnasa), syr óbloki pe zlóko (pe ránko) rozdžanape pale bérgi, adiáke-pac' i javéna manušá, baré i zoralé, savé na sys viekendyr: i kadasavé-pac' butýr na javéna nijékhvar pal lénde maškír manušéngire ródy.

³Angíl lénde džála jag, so pohala saró, a palál pal lénde xačkiribén, so pekela saró. Angíl lénde phuv isyn sýrby únta (sado) Edemoskiri, a palál pal lénde jačélape čhučakirdy mal (stiep), nisó nikaj na kerélape léndyr.

⁴Jone javéna vydycjon sýrby graja: i jone javéna te prastan syr uklisté pe grénde-celdar'jende.

⁵Jone tradéna uklisté pir bergengire fiéli (makuški) ĥrukatosa sýrby maribnytkoné vurdenendyr, sýrby bari jag, saví pharadjola, kiéli pohala phusa, sýrby zoralé manušá, kon isyn skedynó te marélpe.

⁶Angíl lénde darátyr javéna te bandjon dukhasa manušá, a saré léngire muiá jačéna parné.

⁷Jone prastána syr zoralypnaskire muršá, i jone piriresena pir vánta syr maribnaskire manušá; kažno (sváko) léndyr džála angíl péskire dromoresa, i jone na zmarenape dro strojo.

⁸Jone na špulena (pihinena) jekh jekhés, kažno (sváko) léndyr džála dre léngiri kolona. I kiéli jone peréna pe maribnýtka [kop'i-r.s.], jone na dukhavena pes.

⁹Jone prastána odorík i pale pir fóro; jone ĥazdénape pe vánty prastaindoj: jone zaresena dre kherá, jone zadžána dre kherá pir fenštry syr čor.

¹⁰Phuv javéla te izdral angíl lénde, i bolybén te riskirelpe kham i čhon pokaljona, i čergeniá pirijačena te ziainen.

¹¹I phenéla zoralés Raj Devél Péskire zaniása (glosasa) sýrby grumo angíl Léskiro xaladybén: pal-dová so isyn zoralypnaskire Léskire maribnaskire muršá. Dyvés Ráskire-Devléskiro isyn baró i drieván trašano, i kon déla ráda te vyrikirel les?

¹²“Paldavá akaná”, — rakiréla Raj Devél, — “risjon ke Me saré tumaré iléstyr postosa, rovibnasa i tugasa?”

¹³I riskirén tumaró iló, a na uribén, risjon ke Raj Devél, tumaró Devél, pal-dová so Jov isyn lačhé-diéskiro i but isyn láska Léste. Jov liéntes (nasyges) xoliasóla, i Jov isyn lačhé-ilýtko; i Jov tanginela (žalinela) angíl dová, syr te kerél bibáht.

¹⁴Kon džinéla, ci Jov požalinela, i mekéla bahtalypén pal Péste, sob (kaj) tumé te janén svénto dyibén givestyr, i thaduno svénto dyibén Ráske-Devléske, tumaré Devléske?

¹⁵Phurdén zoralés dro rógo (trambura) pe Sióno, poden zvies' (zan) pal svénto posto, kharén te javén pe svénto skedyibén,

¹⁶keden manušén, keden khetané godephuren (phurydyren), keden bijatén i kolynytkone tyknemasen; mek te džal javrí ternó léskire komoratyr, i terný lákire štubatyr.

¹⁷Mek rašaja, dynárja Ráskire-Devléskire, te rovén maškír trémo i altárjo, i mek jone te phenén: Požalin Tyré manušén, o Rajo-Dévla, i na de Tyró mištypén te bipatyvakiren, sob (kaj) Najudýtka nácyi te xulainen pe lénde, savé javéna te rakirén: Kaj isyn léngiro Devél?’”

¹⁸Tén'ci Raj Devél jačéla te zevlynel pal Léskiri phuv, i Jov sykavéla Péskiro iló pal Léskire manušénde.

¹⁹O Raj Devél otphenéla i phenéla Péskire manušénge: “Ake, Me bičhaváva tuménge giv, mol (vino), i maslinitko dzet, i tumé javéna čale léndyr; i Me keráva adiáke, sob (kaj) Najudýtka nácyi butýr te na bipatyvaliakiren tumen.

²⁰I Me durjakirava tuméndyr xaladybén paš-ratitkoné (sieviernone) rigátyr, i Me tradava len krig pe bipanieskiri i čhučí phuv, léngire mujenca te risjon ke vastočno mórjo (derjáv), i léngire dumenca te risjon ke pal-panitko (západno) mórjo (derjáv). Léngiri khan javéla te ĥazdelpe, i džungaló (brydko) khandypen léndyr džála upré, pal-dová so jone kerdé baré dívy.

²¹Na strahadjov, o phuv, rádynpe i viesielinpe (lošaljov): pal-dová so Raj Devél javéla te kerél baré dívy!

²²Na darén, murdalá feldýtka: čaritka féldy pe čhučí phuv déna péskiri čar, phabalyn déla péskiri phabaj; inžyritka drevy i vinagradýtka drevicy déna múri i pribaripen.

²³Tumé, čhavoré Sionoskire, radynénpe, i viesielinenpe (lošaljon) Rástyr-Devléstyr, tumaré Devléstyr, sob (kaj) Jov te del lačhó vesnakiro bryšýnd čačipnása, i Jov keréla adiáke, so javéla bryšýnd, syr sys bryšýnd: vesnakiro i pal-lynaskiro (osieniakiro) dro pérvo čhon.

²⁴Givaobkeribnaskire šurny javéna pherdé givesa, i priesy javéna te občhuvenpe vinagradytkone sokósa (xumésa) i maslinitkone dzetesa.

²⁵I Me dáva pale tuménge saró dová, so xaja phakitko skočko, kirme, bambuly (žuki) i listengiro kirmo — Miro baró xaladybén, so Me bičhadjom pe tuménde.

²⁶I tumé javéna te xan, kicý kaména i javéna čale, i tumé javéna te šarén Ras-Devlés, tumaré Devlés, Kon kerdiá divnes tuménca. I Miré manušén butýr na javéna te ladžakiren.

²⁷I tumé javéna te džinén, so Me som maškír Izrailjo i so Me som Raj Devél, tumaró Devél, i butýr nane javire Devlés. Miré manušén butýr nijékhvar na ladžakirena.

²⁸I paló (poslie) davá javéla adiáke, so Me dáva pherdés Miro Dúho kažnoné ločake (plotiake); tumaré čhavé i tumaré čhaja javéna te angilphenen, tumaré phurané manušá javéna te dykhén suné, i tumaré terné manušá javéna te dykhén dykhibena.

²⁹I až rovno adiáke-pac' Miré pishar'jénge i Miré pisharicenge Me dáva Miro Dúho dre dolé dyvesá.

³⁰I Me sykaváva dívy pe bolybén i pe phuv, rat i jag i thuvale stýlby.

³¹Kham parudjola pe kalypén, i čhon parudjola pe rat, — angíl, syr javéla baró i trašano Dyvés Ráskire-Devléskiro.

³²I javéla adiáke dre dolé dyvesá, so, kóli vari-kon javéla te kharel lav Ráskire-Devléskiro, to odová zrakhélape; pal-dová so zrakhibén javéla pe bérga Sióno dro Jerusalimo syr Raj Devél phendiá: i vaš kodolénge, savé jačnépe, kon javéla te kharel Ras-Devlés.