Read Biblija - Pe Baltitko Romani čib (Romanes) 2019 Baltic Romani Bible Ioil 3 Bible Online

Ioil 3 - Biblija - Pe Baltitko Romani čib (Romanes) 2019 Baltic Romani Bible bible

Ioil 3

¹Pal-dová so, ake, dre dolé dyvesá i dro davá časo, kiéli Me janáva pale plienone manušén Judejátyr i Jerusalimóstyr,

²tedy Me adiáke-pac' kedava saré Najudýtka nácyi, i Me janáva len telé pe dólo Iosafatóskiro, i Me láva te sendinavpe lénca odój pal Miré manušénde, Miro mištypén — Izrailjo, savén jone rosčhude te dživén maškír Najudýtka nácyi, i jone roskerde Mirí phuv.

³Jone čhurdenas žriébijo pal Miré manušénde, i jone dénas terné manušés te paruven pe biladžakuniate, i jone biknenas patyvalia džuvliá pal mol (vino) i jone piné.

⁴Čačes, so tumé Mánge, Tíro i Sidono, i bregitka štéty pe Filistimakiri phuv? Ci javéna tumé te otdén pale fuipnasa proti Mánde? Ne kóli tumé javéna te otdén pale fuipnasa proti Mánde, Me drieván sýges otdáva pale fuipén pe tumaró šeró.

⁵Pal-dová so tumé lyné Miro rup i Miro suvnakái, i lydžiné pésa dro tumaré mangipnytka kherá Miré naj fededýr šukár mištypna;

⁶i manušén Judejátyr i manušén Jerusalimóstyr biknenas tumé Griekénge (Balaménge), sob (kaj) te durjakiren len miežendyr pe léngiri že phuv.

⁷Ake, Me ĥazdáva len odolé štetóstyr, ke savó tumé bikindle len, i Me riskiráva pale syr otdyibén dová, so tumé kerdé, pe tumaró šeró.

⁸I Me biknava tumaré čhavén i čhajén dre vastá manušéngire Judejátyr, i jone biknena len Saviejenge, duratuné manušénge — adiáke phendiá Raj Devél.

⁹Te den daja zan (zvies') maškír Najudytkoné nácyi: kedenpe pe maribén. Džangaven zoralypnaskire muršén adiáke, sob (kaj) te javén saré maribnaskire muršá pašyledýr, mek jone te javén.

¹⁰Pirikeren tumaré plugi (pharadia) pe kurtaly i tumaré sierpy (čhindlé) pe čhurdybnytka bustiá, mek b nazoralo te phenél: “Me som zoraló.”

¹¹Javén sygedýr kedenpe khetané i, tumé, saré Najudýtka nácyi, i kedenpe saré khetané trusciál. O Rajo Dévla, lýdža Tyré muršar'jen te javén odój.

¹²“Mek Najudýtka nácyi te džangadjon, i mek te javén pe dólo Iosafatóskiro: pal-dová so odój Me, Raj Devél, bešava te sendiakirav saré Najudýtka nácyi, so isyn trusciál (krugom).

¹³Mek te čhinel sierpo (čhindló), pal-dová so givá isyn spiala pherdé. Javén, džán telé: pal-dová so tasavil'nia isyn pherdý, prieso piričhuvelape — pal-dová so jone kerdé but bibáht.”

¹⁴But, but manušá isyn pe dólo, pe savó prisendinena! Pal-dová so dyvés Ráskire-Devléskiro isyn pašýl pe dólo, pe savó prisendinena.

¹⁵Kham i čhon javéna kalé (ciamle), i čergeniá pirijačena te ziainen.

¹⁶I Raj Devél adiáke-pac' zagriminela Sionóstyr, i Jov phenéla Péskire zaniása Jerusalimóstyr; bolybén i phuv javéna te trinskirenpe; ke Raj Devél javéla garavibnaskiro štéto vaš Léskire manušénge, i Jov javéla syr tvárdyma / diz (kriepost') čhavorenge Izrailjoskirenge.

¹⁷“I tumé javéna te džinén, so Me som Raj Devél, tumaró Devél, Savó dživéla pe svénto bérga pe Sióno. Tén'ci Jerusalimo javéla svénto, i nijékh javire-themeskiro manúš nijékhvar na javéla te džal pir davá fóro nevéstyr.

¹⁸I javéla adiáke dro dová dyvés, so neví mol (vino) javéla te thadel bergendyr, i thud javéla te čhuvelpe bergicendyr, i panieskire rovicy (xohojoré) dre Judéia javéna pherdé paniésa, a fontano (folahar) javéla te čhuvél pherdés paní Ráskire-Devléskire Khereskir i jov javéla te del paní pe dólo Sitimo.

¹⁹Jegípto javéla syr golotýnia, i Edómo syr čhučí mal (sciep), pal nahratyma, so jone kerdé proti čhavorende Judaskirende, pal-dová so jone pročhude bibangipnaskiro rat pe léngiri phuv.

²⁰Ne Juda javéla te dživél pe saré viéki, i dro Jerusalimo saré rodendyr ke javír ródo javéna te dživén manušá.

²¹I Me, Raj-Devél, morava krig léndyr rat (bang pal rat), savó Me iščo (inké) na mordjom: pal-dová so Me, Raj Devél, dživáva pe Sióno.”