Read Biblija - Pe Baltitko Romani čib (Romanes) 2019 Baltic Romani Bible Amoso 2 Bible Online

Amoso 2 - Biblija - Pe Baltitko Romani čib (Romanes) 2019 Baltic Romani Bible bible

Amoso 2

¹Adiáke rakiréla Raj Devél: “Pal trin čoripena, so kerdé manušá Moavostyr, i pal štar čoripena, Me na otmekáva pharó séndo lénge, pal-dová so jone xačkirdé kokalý kralískire Edemoskire vaš zvjoska (izviest'):

²Ne Me bičhaváva jag pe Moávo, i joj shačkiréla baré felatiniá (kolová) dro Kieriofo, i Moávo xasjola maškír maribnaskiri gódla, manušéngire godlypnasa i rogoskire bašaibnasa.

³I Me xasiakiráva sendaris maškír lénde, i Me muliakirava saré léngire thagar'jen khetané lésa”, — rakiréla Raj Devél.

⁴Adiáke rakiréla Raj-Devél: “Pal trin čoripena, so kerdiá Juda i pal štar čoripena, Me na otmekáva pharó séndo lénge, pal-dová so jone na prilyné (dykhné vučipnástyr) pe Zakóno Ráskire-Devléskiro, i jone na rakhne Léskire priphenybená i léngire xohané devloré, pal savé léngire dadá giné te kerén patýv, lydžiné len droméstyr.

⁵Ne Me bičhaváva jag pe Judéia, i joj xačkiréla baré felatiniá dro Jerusalimo.”

⁶Adiáke rakiréla Raj Devél: “Pal trin čoripena, so kerdé manušá Izrailjoskire i pal štar čoripena, Me na otmekáva pharó séndo, pal-dová so jone bikindle čačipnaskiren manušén pal rup, i čororen pal para curuli (candali).

⁷Jone drieván tyrdenape ke práho phuvjákiro, te javél pe šeró čororeskiro, i jone piririskirena drom, savésa psiréna naphut'kirde manušá, a dad i čhavó psiréna ke jekh džuvlý, sob (kaj) te magirén svénto Miro lav.

⁸Jone pasjona pašýl kažno altárjo dre ídi, so lyné dre symadý (zalogo), i p'jena mol (vino) bangiakirde-manušénca dro kher, kaj isyn léngiro devloro.

⁹Ne davá sys Me, Kon xasiakirdiá Amoriejen angíl lénde, Miré manušénde, savé isys vučé sýrby kiedry, i jone sys zoralé sýrby demby, ne Me xasiakirdjom léngire barjakirdé (plódy) uprál, i léngire kórni (rukhá) telál.

¹⁰I davá sys Me, Kon vylydžijá tumen Jegiptóskire phuvjátyr, i Kon lydžijá tumen štardešá berš pir čhučí phuv, sob (kaj) te zauhtylen tuménge phuv Amoriejengiri.

¹¹Me vykedyjom vari-savé tumaré čhavén syr prorokén, i vari-savén tumaré terné manušén syr Nazariejen. Ci na sys davá adiáke tumé, čhavé Izrailjoskire” — rakírla Raj Devél.

¹²“Ne tumé dyné Nazariejenge mol (vino) te p'jen, i tumé priphendle prorokenge, rakirí: ‘Na angilphenen!’

¹³Ake, Me pritasavava tumen, sýrby vurdén, so isyn pherdó ĥarbénca (snopenca).

¹⁴Paldavá sýgno manúš na kerlape nikaj, a zoraló na javéla te rikirél péskiri zor, i muršari na zrakhéla kokoró pes;

¹⁵i kon rikiréla lúko, na vyrikiréla, a sýgno pe ĥerój manúš, na našela, i odová, kon tradéla uklisté, na zrakhéla péskiro di.

¹⁶Ne sámo murškanó manúš, našela nango krig dro dová dyvés”, — rakiréla Raj Devél.