Read Biblija - Pe Baltitko Romani čib (Romanes) 2019 Baltic Romani Bible Amoso 3 Bible Online

Amoso 3 - Biblija - Pe Baltitko Romani čib (Romanes) 2019 Baltic Romani Bible bible

Amoso 3

¹Šunén davá lav, so Raj Devél phendiá proti tuménde, čhavorále Izrailjoskire, proti saró kherítko ródo, savó Me vylydžijom Jegiptóskire phuvjátyr, rakirí:

²“Tumé san jekh kherítko ródo saré rodendyr pe phuv, savéske Me kerdjom patýv, paldavá Me pharés sendiakirava tumen pal saró tumaró čoripén.”

³Ci saštý duj manušá te džán khetané, kóli jone na dorakirenape?

⁴Ci javéla ščer (liévo) te brilinel dro veš, kóli jov na dykhéla vari-so te roskušel dandenca? Ci javéla te vydel ščer zan péskire xašhátyr (logovostyr) — , kóli jov ničý na uhtyldia.

⁵Ci saštý čirikly te perél dre felý (pietlia) pe phuv, kóli te na javél felý sietkasa pe láte. Ci ĥazdélape felý phuvjátyr, kóli te na uhtylén nisó lása?

⁶Kóli te na bašavel zoralés rógo (truba) dro fóro, ci javéna manušá te darén? Kóli isyn bari bída dro fóro, ci davá isyn na Devléstyr, Kon domekcia davá?

⁷Čačó, Raj Devél na keréla nisó angíl dová, syr Jov sykavéla dová, so Jov pridumindia, Léskire pishar'jénge, prorokenge.

⁸Ščer lyjá te rykinel — kon na javéla te darel? O Raj Devél phendiá — kon na javéla te angilphenel?

⁹Poden zvies' (zan) dre baré felatiniá i pe strehi kherengire dro Azoto (pe Filistimija), i dre baré felatiniá (kolová) pe phuv Jegiptóskiri i phenén: “Kedenpe khetané pe bérgi Samarijakire: dykhén pe baró búnto godlenca maškír lénde, i syr pritasavéna manušén odój.”

¹⁰“Pal-dová so jone na džinéna, syr te kerén čačunés, — rakiréla Raj Devél, — ‘jone, savé zagaravena kučipén, so jandlé jone dre čori, so jone nahrates čorde, dre léngire baré felatiniá (kolová).’

¹¹Paldavá adiáke rakiréla Raj Devél: ‘Namal javéla trusciál daja sarí phuv! Jov otlela zor léndyr i jov rosčorela léngire baré felatiniá (kolová).”

¹²Adiáke rakiréla Raj Devél: “Syr o čhupnári (pastyrjo) vytyrdela javír mólo i zrakhéla ščeroskire (lievoskire) móstyr duj kokalý ĥerengire i kotér kaneskiro, adiáke-pac' nábut čhavorén Izrailjoskiren vytyrdena xasibnastyr, savé dživéna ke Samárija pe jagóro (pe krajo) čhuibnaskiro, i savé isyn bešté pe jagóro drogoné pasindliakiro (pe kušetka).

¹³Šunén i dophenen dro kher Jakovóskiro:” — rakiréla Raj Devél, jangoléngiro-bolybnáskiro Devél,

¹⁴“so Me dro dová dyvés pharés sendiakirava Izrailjo pal léskire čoripena, i Me pharés sendiakirava pal altári dre Viefil', i javéna občingirde šyngá (rógi) pe altárjo, i jone peréna pe phuv.

¹⁵I Me rozmarava pe koterá ivantytko (zimitko) kher khetané lynaitkone kheresa; i peréna kherá šukaribnasa slonytkone kokalestyr, i na javéna butýr baré kherá”, — rakiréla Raj Devél.