Read Biblija - Pe Baltitko Romani čib (Romanes) 2019 Baltic Romani Bible Amoso 5 Bible Online

Amoso 5 - Biblija - Pe Baltitko Romani čib (Romanes) 2019 Baltic Romani Bible bible

Amoso 5

¹Šunén davá lav, savésa me, Amoso, javáva te tuginav jasvénca pal tuménde, manušále Izrailjoskire kheréstyr.

²Pyjá terný patyvalý džuvlý (dieva) Izrailjoskiri: joj butýr na ĥazdélape. Joj isyn pašty, i nane nijékh manúš te ĥazdel la.

³Paldavá adiáke rakiréla Raj Devél: “Dro fóro, savó délas tysjoncy manušén pe maribén, jačénape šel muršá, dro fóro, savó délas šel manušén, jačénape deš muršá vaš kheréske Izrailjoskireske.”

⁴Paldavá adiáke rakiréla Raj Devél kheréske Izrailjoskireske: “Tumé rodén Man i javéna džidé.

⁵Na rodén Viefil', i na zadžán dro Galgálo i na psirén ke Virsávija (Bieršeba), pal-dová so Gilgaloskire manušá džána dro pliéno, a Viefiliator nisó na jačélape.”

⁶Rodén Ras-Devlés i tumé javéna te dživén, sob (kaj) Jov te na kerél adiáke, so jag peréla sýges pe kher Jozaskiro, i xačkiréla sarésa les adiáke, so na javéla nijékh te murdiakirel jag dre Viefil'.

⁷Tumé, kon pirikerela čačunó séndo pe truta (otrava), a čačipén čhurdena pe phuv,

⁸rodén Les, Kon sozdyjá čergeniengiri grupa Plieady (Eftá-čergenitko) i Oriono (Čergeniá pe Vastóko). Kon paruvela zer (tien') meribnaskiri pe jasno zlóko (ránko), Kon keréla adiáke, so dyvés jačéla syr kaly rat. Kon kharéla ke Pe paningá morjoskire (derjavéskire), i Jov rosčhuvela len pir sarí phuv, — Raj Devél isyn Léskiro lav.

⁹Jov keréla adiáke, so xasibén sýges peréla pe zoraleste, i Jov janéla xasibén pe dijá.

¹⁰Tumé naštý te dykhén pe kodoleste, kon sykavéla bang tuménge pašýl pórta i tumé dykhéna vučipnása pe kodoleste, kon rakiréla čačipén.

¹¹Paldavá, so tumé štakirena (pritasavéna) čorores, i tumé léna léstyr počastúnki givesa; na dykhí pe dová, so tumé čhudé kherá vyčingirde barestyr, tumé usajékh na javéna te dživén dre lénde; tumé počhude dre phuv šukár vinagradýtka unty (sady), ne tumé na javéna te p'jen mol (vino) léndyr.

¹²Pal-dová so Me džinóm, so tumé kerdé but čoripena, i tuménde isyn but gréhi: tumé pritasavéna čačuné manušén i léna myty (vziatki); tumé riskirena pe rig čačipén čororé-manušéngiri pe séndo [pašýl foróskiri pórta-ju.o.].

¹³Paldavá baré-godiákiro manúš javéla štyl dro dalé dyvesá, pal-dová so davá isyn bibahtaló časo.

¹⁴Rodén lačhipén, a na fuipén, sob (kaj) tumé te dživén, i paldavá Raj Devél, jangoléngire-bolybnáskiro Devél, javéla tuménca, syr tumé i rakiréna.

¹⁵Bidykhen tumé čoripén (bibáht), ne vykeden lačhipén, i tumé kerén adiáke, sob (kaj) te javél čačipén pašýl pórta (vráty) foróskiri, saštý te javél, so Raj Devél, jangoléngire-bolybnáskiro Devél, javéla te tanginél odolén, kon jačélape manušéndyr Jezaskirendyr (Iosifostyr).”

¹⁶Paldavá adiáke rakiréla Raj Devél, jangoléngire-bolybnáskiro Devél Sarezorjákiro: “Zoraló roviben javéla pe saré vulícy (gásy), i manušá javéna te priphenen pe saré dromá: ‘Dévla! O Devlale!’ I jone javéna te kharén phuvjákire butiar'jen te tuginen zoralés, i kadasaven, kon isyn spiecy te tuginen rovibnasa.

¹⁷Dre saré vinagradýtka unty (sady) javéla zoraló roviben, pal-dová, so Me prodžava maškír lénde,” — rakiréla Raj Devél.

¹⁸Bida javéla pe tuménde, kon drieván kaméla, sob (kaj) te javél dyvés Ráskire-Devléskiro! Savó lačhipén tumé užakiréna dyveséstyr Ráskire-Devléstyr? Davá ž javéla kalypén, a na dud.

¹⁹Davá javéla sýrby dová, kóli manúš nascia ščerestyr (lievostyr), i rič pirilyja les, ci sýrby manúš, savó gijá andré kher, pričhudia péskiro vast ke vánta, i sap dandyrdia les.

²⁰Naúšto dyvés Ráskire-Devléskiro isyn na kalypén, a dud? Xor kalypén, nane ni saví jasnyma, i na ziainela.

²¹Me bidykhava, Me dykháva vučipnása pe tumaré svenkitka dyvesá, i Me na sungava (na sungavava) gudló khandypen (parfuny), so jačéla tuménde pe skedyibena.

²²Na dykhí pe dová, so tumé janéna céla shačkiribnaskire svénta dyibená i svénta dyibená givestyr, Me na prilava len. I Me na keráva patýv tumaré sventoné dyibnenge te parikirén tumaré thule guruvorenca

²³Durjakiren Mándyr šumo (glumo) tumaré giliendyr, pal-dová so Me na javáva te šunav mielodija tumaré guslienca (arfengiri),

²⁴ne mek čačunó séndo te čhuvelpe sýrby paniá, i čačipén syr sýgno rékica (lenorí).

²⁵Ci janénas tumé Mánge svénta janybená i marune janybená pe čhučí phuv štardešá berš, o kher Izrailjoskiro?

²⁶Ne tumé adiáke-pac' (tože) janénas pésa šátra Molohoskiri i čergen tumaré devloreskiri, Riemfanos mujenca, so tumé kerdé vaš péske.

²⁷Paldavá Me bičhaváva tumen dro pliéno pal Damásko”, — rakiréla Raj Devél, Kon kharélape jangoléngire-bolybnáskiro Devél.