Read Biblija - Pe Baltitko Romani čib (Romanes) 2019 Baltic Romani Bible Amoso 7 Bible Online

Amoso 7 - Biblija - Pe Baltitko Romani čib (Romanes) 2019 Baltic Romani Bible bible

Amoso 7

¹Adiáke Raj Devél sykadiá mánge: ‘Ake Jov sozdyjá but phakitkone skočken (saranča), kiéli léla te barjol atava (pozdnjo čar); i, ake, daja atava jaciá paló dová, syr progijá sčhinyben kralískiro.

²I sys adiáke: kiéli skočki pohane nábut so na sarí čar, pe phuv, tén'či me, Amoso, phendjom: “O Rajo Dévla! Otmek, me mangavape Túke! Syr Jakovo déla ráda te terdjol proti? Pal-dová so jov isyn tyknó.”

³Raj Devél tangindia pal dová, so Jov kerdiá. “Te na javél davá”, — phendiá Raj Devél.

⁴Adiáke Raj Devél sykadiá mánge: ake, Raj Devél khardiá jag te sendinel, i joj xačkirdiá bari (xor štéty) tel phuv kolban'[1] i sarí mekny phuv.

⁵Tén'ci Me phendjom “O Rajo Dévla! Terdjov! Me mangav Tut! Syr Jakovo déla ráda te terdjol proti? Pal-dová so jov isyn tyknó!”

⁶Paldavá Raj Devél požalindia pal dová, so Jov kerdiá. “Te na javél davá”, — phendiá Raj Devél.

⁷Adiáke Raj Devél sykadiá mánge: ake, Raj Devél, sys terdó pe jagóro (pe krajo) vantakiro, i sys molovano[2] otvieso dro Léskiro vast.

⁸I phendiá Raj Devél mánge: “Amose! So dykhésa tu?” Me phendjom: “Molovanó otvieso.” Tén'ci Raj Devél phendiá: “Ake, Me čhuváva otvieso maškír Miré manušénde Izrailjostyr: Me butýr na javáva te otmekav bang lénge.

⁹I vučé štéty, pe savé janéna dyibená, javéna čhučé (pusta), i svénta štéty Izrailjoskire javéna pašté dre ruíny. I Me ĥazdáva kurtála pe Jerovoamoskiro kher.”

¹⁰Tén'ci o Amásija, rašáj Viefiliatyr, bičhadiá lav Iierovoamoske, kralíske Izrailjoske, phení: “O Amoso zrakirdiape pe túte maškír kher Izrailjoskiro: phuv naštý te šunél saré léskire lavá.

¹¹Pal-dová so Amoso adiáke phendiá: “O Iierovoamo meréla kurtalátyr, a Izrailjo javéla, čačipnása, lydžino krig dro pliéno léskire phuvjátyr.”

¹²Tén'ci o Amásija phendiá Amososke: “Džá tu, angildykhibnaskiro (magiko), naš pe phuv Judaskiri. Odój xa maró, i odój angilphen,

¹³ne butýr tu te na angilphenes dre Viefil', pal-dová so davá isyn svénto štéto kralískiro, i davá isyn kher kralískiro.”

¹⁴Tén'ci Amaso otphendiá, i phendiá Amasijaske: “Me na sómas proróko, i me na som čhavó prorokoskiro. Ne me sómas čhupnári (pastuho) pe stada, i me kedyjom múri pe sikomoritka kaštá.

¹⁵Tén'ci o Raj Devél lyjá man, kiéli me gijom pal stada, i Jov phendiá mánge: ‘Džá i angilphen Miré manušénge Izrailjostyr.’

¹⁶I akaná šun lav Ráskire-Devléskiro: tu rakirésa: ‘Na angilphen pe Izrailjo, i na vyphen lavá pe kher Isakóskiro’

¹⁷“Paldavá adiáke rakiréla Raj Devél: ‘Tyrí romný javéla biladžakuny džuvlý dro fóro, a tyré čhavé i čhaja peréna kurtalátyr, tyrí phuv roskerena pe pašá šelesa mierinytkonesa, i tu merésa pe magirdy phuv; i Izrailjo, čačipnása, lydžána krig dro pliéno léskire phuvjátyr.”