Read Biblija - Pe Baltitko Romani čib (Romanes) 2019 Baltic Romani Bible Amoso 9 Bible Online

Amoso 9 - Biblija - Pe Baltitko Romani čib (Romanes) 2019 Baltic Romani Bible bible

Amoso 9

¹Me dykhcjom Ras-Devlés, Savó sys terdó pašýl altárjo, i phendiá Jov: “Pekav pir vudareskiro berand (stojka), sob (kaj) te trinskirenpe progi tel stýlby, i rozmar len pe šeré léngire sarengire. Me muliakirava kodolén, savé jačénape léndyr kurtalása: nijékh na našela léndyr, kon prastala krig; i kodová, kon kedelape, na zrakhélape.

²Na dykhí pe dová, so jone ĥanavenape dro liúno (ado), odothýr Miro vast vytyrdela len. I te resen jone pe bolybén, i odothýr janáva Me len telé.

³I te garadjon jone kokoré pe Karmiloskiro vučipén, odothýr Me vyrodava len i lavá len. Mek jone i te garadjon Miré jakhéndyr pe dugno (dno) morjoskiro (derjavéskiro), i odothýr priphenava Me sapeske i jov dandyrela len.

⁴I te džán jone dro pliéno angíl léngire vergénde, i odothýr priphenava Me kurtalake i te pekaven len. Me javáva te rikirav Miré jakhá pe lénde vaš bibáht, a na vaš lačhipén.”

⁵I Raj Devél, jangoléngire-bolybnáskiro Devél, isyn Kodová, Kon čilavéla phuv i joj biladjola, i saré, kon dživéla pe láte, javéna zoralés te rovén; sarí phuv ĥazdélape syr šuvlypen sýrby reka (len')(Nilo), i joj mekelape telé jekhátyr sýrby reka (len') Jegiptóskiri,

⁶davá isyn Jov, Kon kerdiá Péskire upratune komory pe bolybén, i Kon začhudia bolybnáskiro svódo uprál pir phuv; Kon prikharela paniá morjoskire (derjavéskire), i vyčhuvela len pir sarí phuv: Raj Devél isyn Léskiro lav.

⁷“Ci na kadasavé — sama tumé san, čhavé Izrailjoskire, syr čhavé Efiopijengire?”, — rakiréla Raj Devél. “Ci davá na Me jandjom Izrailjo Jegiptóskire phuvjátyr, i Filistimlianen Kaftorostyr, i Sirijanen[3] Kirostyr?

⁸Ake, jakhá (Miré) Ráskire-Devléskire dykhéna pe grehítko kralipén, i Me xasiakiráva les sarésa phuvjátyr, ne Me sarésa na xasiakiráva kher Jakovóskiro”, — rakiréla Raj Devél.

⁹“Pal-dová so Me priphenava, i Me rosčhuvava manušén Izrailjoskire kheréstyr, maškír saré nácyi sýrby giv rosčhuvelape dro porizén (rošóto); ne i sámo tyknedýr ziárka na peréla pe phuv.

¹⁰Saré grehítka Miré manušéndyr meréna kurtalátyr, savé rakiréna: ‘Bari bída na doreséla amen i na pirilela amen.”

¹¹Dro dová dyvés Me nevéstyr ĥazdáva šátra Davidoskiri, so pyjá. I Me zakerava phagirdé štéty, i Me čhuváva nevéstyr saró dre láte, syr sys dre ĥaratuné dyvesá;

¹²sob (kaj) manušá Izrailjoskire te zakeden dová, so jačélape Jedomostyr, i saré Najudýtka nácyi, savé kharéna Miro lav”, — rakiréla Raj Devél, Savó keréla saró davá.

¹³“Ake, javéna dyvesá’, — rakiréla Raj Devél, — kiéli manúš, kon pahinela phuv, pirilela manušés, kon sčhinela givá, i manúš, kon štakirela vinagrado, pirilela kodolés, kon čhuvéla dre phuv ziárki; sóko (xum) (gudly mol) javéla te thadel bergendyr, i te čhuvelpe telé bergicendyr.

¹⁴I Me janáva pale Miré manušén Izrailjoskiren plienóstyr, i jone občhuvena kherenca čhučé (pusta) fórja, i jone javéna te dživén dre lénde, i jone čhuvéna dre phuv vinagradýtka (drakhitka) barja, i jone javéna te p'jen mol (vino) léndyr; i jone čhuvéna unty (sady), i jone javéna te xan léngire phabá.

¹⁵I Me občhuvava léngiro džiibén pe léngiri phuv, i butýr nikón na vykušela len phuvjátyr, saví Me dyjom lénge” — rakiréla Raj Devél, tumaró Devél.