Read Biblija - Pe Baltitko Romani čib (Romanes) 2019 Baltic Romani Bible Avdijos 1 Bible Online

Avdijos 1 - Biblija - Pe Baltitko Romani čib (Romanes) 2019 Baltic Romani Bible bible

Avdijos 1

¹Dykhibén Avdijoskiro. Adiáke rakiréla Raj Devél pal Edómo: ame šundiám zvies' (zan) Miré bičhaibnaskire manušéstyr, savés Me, Raj Devél, bičhadjom maškír nácyi te phenél: “Uštén, javén te ĥazdaspe pe maribén proti léste.”

²Ake, Me kerdjom adiáke, so tu jacián tyknó ródo maškír nácyi; tu javésa dre bari napatyv.

³Tyró phut'kirdo iló xohadia tut, kon dživéla maškír ščéli pe bérgi, konéskiro kher isyn vučó; tu, savó rakiréla dro péskiro iló: ‘Kon sčhurdela telé man?’

⁴Na dykhí pe dová, so tu ĥazdesa pes syr órlo (kído), i so tu kerésa péskiro gniázda (kúfo) maškír čergeniá, ne i odothýr Me čhurdava telé tut”, — rakiréla Raj Devél.

⁵“Kóli javénas čora ke tu, ci rozmaribnaskire čora ratý, — so adiáke zoralés občorde tut. Ci na lenas jone féni (tóka) adákicy, kicý lénge treindiá? Kóli javénas vinagradone-kedybnaskire (sborščyki), so ž jone na mekenas túke vari-kicý muriny?

⁶Syr ke Isávo[1] saró sys pirirodyno? Syr saré léskire čorahane štéty piridykhne!

⁷Saré tyré drúgi (malá) pir dorakiribén (sojuzo) tradéna tut až ke kustyka (granicy); a manušá, kon sys dro ramánjo (miro) túsa, xohavena tut, i jone léna upralypén proti túte; kodolé, savé xané tyró maró, čhuvéna felý pe túte”, — nikón na ĥaljola davá.

⁸“Dro dová dyvés javéla adiáke, — rakiréla Raj-Devél, — so Me xasiakiráva i godé manušén Edomostyr, i baré godiar'jen Isavóskire bergátyr.

⁹I tyré zoralé muršá, o Fiemánie, phadjona dro dúho, so ke jekh, ne kažno (sváko) manúš, kon isyn Isavóskire bergendyr, xasjola — muliakirena les.

¹⁰Pal-dová so tu sánas nahrato ke tyró pšal Jakovo, ladžaipén učhakiréla tut, i tu xasjosa pe saré viéki.

¹¹Dro dová dyvés, so tu sánas terdó pe javír rig, dro dová dyvés, kiéli čúža manušá lydžánas dro pliéno Jakovóskire zoralé xaladén, syr javire-phuvitka manušá giné andré léskire pórty, i čhurdenas žriébijo pal Jerusalimo, i tu sánas jekh léndyr.

¹²Ne túke na treindiá te dykhés xoliames palál pal tyré pšaléste dro dyvés, syr lenas les léskire phuvjátyr; i te na radynespe xasibnastyr Judáskire-čhavorengirendyr, i te na otkeres bu'gles muj sabnasa dro dová bibahtaló dyvés.

¹³Túke na treindiá te džas andré pórta (vráty) dro dová dyvés, kiéli bari bibáht pyjá pe Miré manušénde. Čačes, na treindiá túke te dykhés xoliames palál pe léngire mén'ki, ci te pričhuves vastá ke léngiro mištypén, syr sys bari bída lénde.

¹⁴Túke na treindiá te tyrdjos pe trušulytka dromá (pieriekrjostki), sob (kaj) te zamares (te muliakires) kodolén, savé našenas; i te na vydes kodolén, savé jačnépe, syr sys bari dar lénge.

¹⁵Pal-dová so syg javéla Dyvés Ráskire-Devléskiro pe saré Najudýtka nácyi: syr tu kerdián, adiáke i túke javéla kerdó; tyré réndy risjona pe tyró šeró.

¹⁶Pal-dová so syr tumé piné pe Mirí svénto bérga, adiáke-pac' i saré Najudýtka nácyi javéna ŭsády (sak) te p'jen; jone javéna te p'jen, i te nakhaven (te glytynen), i len xasiakirena sýrby na sys len.

¹⁷Ne pe bérga Sionóskiri manušá zrakhenape, i joj iavéla svénto štéto. Kher Jakovóskiro léla péske léngiro meknó mištypén.

¹⁸Manušá Jakovóskire javéna syr jag, a manušá Jozáskire javéna syr bari jag, ne manušá Isavóskire javéna syr phus: len podhačkirena i shana jagása, i nijékh na piridživela, sob (kaj) te jačélpe Isavóskire kheréstyr,” — pal-dová so davá phendiá Raj Devél.

¹⁹I manušá paš-dyvesytkoné (južnone) rigátyr léna péske bérgi Isavóskire, i manušá pe dólo léna péske Filistimija, i féldy Jefraimoskire i Samarijakire. E manušá Vienjaminoskire léna péske Galaádo.

²⁰I xaladé Izrailjoskire čhavéndyr, savé sys dro pliéno, javéna te len péske Xanaanóskiri phuv až ke Sariepta, a manušá Izrailjoskire, savé isyn dro pliéno dro Siefarado, javéna te len péske fórja pe paš-dyvesýtko (južno) rig.

²¹I javéna zrakhibnaskire pe bérga Sióno te sendiakiren bérga Isavoskiri, i javéla kralipén Ráskire-Devléskiro.”