Read Biblija - Pe Baltitko Romani čib (Romanes) 2019 Baltic Romani Bible Jona 1 Bible Online

Jona 1 - Biblija - Pe Baltitko Romani čib (Romanes) 2019 Baltic Romani Bible bible

Jona 1

¹I, ake, javdiá lav Ráskire-Devléskiro Jonaske (Ionaske), čhavéske Amafijoskireske[1], phení:

²“Uštý, džá ke Ninievija, davá baró fóro, i rákir zoralés proti léste: pal-dová so dalé foróskire-manušéngire zlydnitka réndy (fuj diély) javné angíl Mánde.”

³I Jona uštyjá, sob (kaj) te našél ke Farsiso Rástyr-Devléstyr (syr Léskiro proróko). Jona gijá telé ke Iopija, pleskirdia lové pal párma (korabljo), besciá pe láte, i tradyjá lénca ke Farsiso, sob (kaj) te našél Ráskire-Devléskire jakhéndyr.

⁴Ne o Raj Devél bičhadiá bari balvál pe mórjo (derjáv), i odój jaciá zoraló štormo pir mórjo (derjáv) adiáke, so sys bicialó, so párma phadjola.

⁵I matrosy darándyne, i kažno (sváko) manúš dyjá gódla ke péskiro devloro. I jone čhurdyné gpharipén (gruzo), so sys pe párma, dro mórjo (derjáv), sob (kaj) te javél lokhedýr párma. Ne o Jona (Iona) gijá telé dro telatuno štéto pe párma, pasijá i syg sys sutó.

⁶I o barydyró podgíia ke jov, i phendiá léske: “So davá značynéla, soibnaskiro? Uštý, khar tyré Devlés; xaj Tyró Devél priripirela pal aménde, sob (kaj) aménge te na xasjovas.”

⁷I phendlé jone jekh jekhéske: “Javén, čhurdasa žriébijo, sob (kaj) ame saštý te džinas, pir konéste davá pharipén pyjá pe aménde?” I ĥáda, jone čhurdyné žriébijo, i kokalko sykadiá pe Jonaste.

⁸Tén'ci jone phendlé léske: “Ame mangasa tut, phen aménge! Pir konéste davá pharipén pyjá pe aménde? Savó isyn réndo túte? Katýr tu san? Save themestyr tu san? Save manušéndyr tu san?”

⁹I otphendiá jov lénge: “Me som Judo; i me darava Rástyr-Devléstyr; Devléstyr bolybnaskirestyr, Kon sozdyjá mórjo (derjáv) i phuv šukí.”

¹⁰Tén'ci manušá strahádyne baré trašasa, i phendlé léske: “Sóske davá tu kerdián?” Pal-dová so adalé manušá džindlé, so jov nascia Ráskire-Devléskire jakhéndyr, syr jov uže rosphendiá lénge.

¹¹Tén'ci jone phendlé léske: “So trej te kerás aménge túsa, sob (kaj) mórjo (derjáv) te štyljol vaš aménge?”, — pal-dová so mórjo (derjáv) usá ĥazdelaspe vučedýr štormostyr.

¹²I jov phendiá lénge: “Len te ĥazdén man upré, i čhurdén man dro mórjo (derjáv); tedy mórjo (derjáv) javéla štyl vaš tuménge. Pal-dová so, me džinóm, so davá štormo jaciá pir mánde.”

¹³Na dykhí pe dová, so manušá ĥriebindle zoralés, sob (kaj) te janel párma ke phuv, ne jone na dyné ráda, pal-davá so mórjo (derjáv) duredýr ĥazdélape štormosa pe lénde.

¹⁴Paldavá jone dyné gódla te pomoginel ke Raj Devél, i phendlé: “Ame mangasape, o Rajo Dévla, ame mangasa drieván, sob (kaj) te na xasjovas pal davá manušéskiro džiibén, i sob (kaj) te na zaginen bang aménge pal davá rat bibangipnaskiro: pal-dová so Tu, Raj Devél, kerdián adiáke, syr Túke isyn kuč”

¹⁵I jone ĥazdyné Jonas i čhurdyné les dro mórjo (derjáv), i mórjo (derjáv) jaciá štyl Léskire baré xoliátyr.

¹⁶Tén'ci manušá strahádyne Rástyr-Devléstyr baré darása, i jone jandlé svénto dyibén Ráske-Devléske i jone sovlahade.