Read Biblija - Pe Baltitko Romani čib (Romanes) 2019 Baltic Romani Bible Jona 3 Bible Online

Jona 3 - Biblija - Pe Baltitko Romani čib (Romanes) 2019 Baltic Romani Bible bible

Jona 3

¹I, ake, javdiá lav Ráskire-Devléskiro javír mólo, phení:

²‘Uštý, džá ke Ninievija, drieván (zbit) baró fóro, i phen zoralés Devléskiro lav adiáke, syr Me priphenava túke.”

³I uštyjá Jona, i gijá ke Ninievija pir lav Ráskire-Devléskiro. Džinén, so Ninievija sys koptaram[2] baró fóro Devléste, treindiá trin dyvesá te obdžas les.

⁴I lyjá Jona te psirél pir fóro pe pérvo dyvés, i jov mištophenelas. Jov dyjá gódla i phendiá zoralés: “Iščo štardešá dyvesá, i Ninievija phagirena ke ruíny!”

⁵I e manušá Ninievijatyr patiandyné Devléske, i jone phendlé sarénge (obzaniakirde) pal posto, i čhudé pe péste žalobna balytka goné, naj baredyrestyr ke naj tyknedýr manúš léndyr.

⁶Tén'ci dogijá lav ke králi Ninievijakiro, i jov uštyjá léskire tronostyr, i čhudiá dre rig péskiro uribén, čhakirde pes žalobnone-balytkone gonesa i besciá dre práska (pieplo).

⁷I o králi kerdiá adiáke, so daja zvies' (zan) phendlé angíl sarénde i o králi i léskire baré raja vydyne priphenybnytko statúto, phení: “Mek nijékh ni manúš, ni murdál, ni ĥurto, ni stada, te na xan ničý; na domeken, sob (kaj) jone te xan, te p'jen paní.

⁸Ne mek manušá i murdalá te učhakiren pes žalobnone balytkone gonesa, i te prikharen zoralés Devlés; adiáke, sob (kaj) kažno léndyr te risjol péskire bibahtalé droméstyr i nahratymatyr (nasilijostyr), so kerdé léskire vastá.

⁹Kon saštý te phenél, ci risjola ke Devél, i ci požalinela (tanginela), i ci, mo (xaj), riskiréla dre rig Léskiri bari xolý adiáke, sob (kaj) aménge te na xasjovas.”

¹⁰Tén'ci Devél dykhciá léngire butiá, so jone risiné krig léngire bibahtalé dromendyr, i Devél potangindia (požalindia) pal bari bibáht, so Jov phendiá te janel pe lénde, i jov na jandiá pe lénde.