Read Biblija - Pe Baltitko Romani čib (Romanes) 2019 Baltic Romani Bible Jona 4 Bible Online

Jona 4 - Biblija - Pe Baltitko Romani čib (Romanes) 2019 Baltic Romani Bible bible

Jona 4

¹Ne Jenaskiro iló zoralés phadija daléstyr, i jov xoliásyja.

²I jov mangdiápe Ráske-Devléske i phendiá jov: “O Rajo Dévla! Saró davá na pir miré lavá, so me phendjom, kiéli me iščo (inké) sómas pe péskiri phuv? Paldavá me i nascjom vagedyr (ĥaredyr) ke Farsiso: pal-dová so me na džindjom, so Tu san lačhé-dieskiro Devél, Savó sykavéla láska, Savó liéntes xoliasóla i keréla but-but lačhipén, Kon žalinela te kerél bedypen.

³Paldová akaná, Rajo Dévla, le, me zoralés mangáva Tut, miro džiibén mándyr, pal-dová so fedýr isyn vaš mánge te merav, syr te dživáv.”

⁴Tedy Raj Devél phendiá: “Naúšto davá isyn mištó vaš túke te xoliasos?”

⁵I gijá krig Jona foróstyr i besciá pe vastokitko rig pe fóro, i odój jov kerdiá péske buda (kušča) i besciá tel léste dre zer (zasienka), sob (kaj) te dykhél, so javéla forosa.

⁶I Raj Devél barjakirdia xrústo i kerdiá adiáke, so jov ĥazdyjápe upredyr Jonastyr adiáke, sob (kaj) jov te moginel (te saštynelas) te del zer (zasienka) pe léskiro šeró te rakhél les léskire pharipnastyr.” I Jona drieván jaciá rado dalé xrustostyr.

⁷Pe javír dyvés pe zlóko, o Devél sozdyjá kirmes, i jov podčhindia xrústo, i xrústo zašutija.

⁸I sys adiáke: syr kham ĥazdyjápe, o Devél jandiá xačkirdy balvál vastokóstyr: i kham lyjá te pekel pe šeró Jonaskiro adiáke, so léskiro iló zamyjá. Tén'ci jov zakamdiá mulypen pe péste, i phendiá jov: ‘Fedýr isyn vaš mánge te merav, syr te dživáv’.

⁹Tén'ci Devél phendiá Jonaske: “Naúšto davá isyn mištó vaš túke te xoliasos pe xrústo až ke meribén!” O Jona otphendiá: “Me mištés keráva, so xoliasyjom až ke meribén.”

¹⁰I phendiá Raj Devél: “Tu tangindian (požalindian) xrústo, pašýl savó tu na keresas pharí butý, i tu na barjakirdian les. Jov sykadyjá célo pal rat, i zašutija dro javír rat.

¹¹I syr davá mánge treindiá te na tanginav Ninievija, kadasavó baró fóro, dre savó butýr syr šel te biš tysjoncy manušá, savé naštý te phenén, kaj isyn lénde čačó, i léngiro zérvo (liévo) vast, i adiáke-pac' butypen (množestvo) kheritkoné-murdalengiro (skotengiro).”