Read Biblija - Pe Baltitko Romani čib (Romanes) 2019 Baltic Romani Bible Čysly 1 Bible Online

Čysly 1 - Biblija - Pe Baltitko Romani čib (Romanes) 2019 Baltic Romani Bible bible

Čysly 1

¹I phendiá Raj Devél Mojzáske pe Sinajoskiri čhučí phuv, dre skedyibnáskiri skínija, pe pérvo dyvés javire-čhonéskiro, dro javír berš pir léngiro vygiiben Jegiptóskire phuvjátyr, rakirí:

²“Piriginen saró khetanyben (obščyna) Izrailjoskire čhavéndyr pir léngire ródy léngire čékarja[1] (siemieistvy) [pir léngire-dadengíre kherá-ju.o.], pir lavá, kicý isyn saré muršén pir šeré.

³Bišé beršéndyr i phuredýr, sarén, kon sys dre zor dro Izrailjo vaš maribén, pir léngire otriády piriginen len — tu i Aaróno.

⁴Tuménca trej, sob (kaj) te javél jekh manúš te javén kažnoné rodycóstyr pir jekhe manušéste, savó dro péskire-dadéskiro ródo isyn šeraló.

⁵I, ake, isyn muršengire lavá, savé javéna tuménca: Ruvimostyr Jelicuro, Šedeuraskiro čhavó;

⁶Simieonostyr (Siemjonostyr) Šielumiilo, Curišadajoskiro čhavó;

⁷Judastyr Naasóno, Aminadavóskiro čhavó;

⁸Isaharostyr Nafanailo, Cuaroskiro čhavó;

⁹Zavulonostyr Jeliano, Xielonoskiro čhavó;

¹⁰Iosifóskire (Jozáskire) čhavéndyr: Jefriemostyr Jelišamo, Amiudoskiro čhavó; Manasijastyr Gamaliilo, Piedacuroskiro čhavó;

¹¹Vieniaminostyr Avidano, Gidieonijakiro čhavó;

¹²Danostyr Ahieziero, Amišadajeskiro čhavó;

¹³Asirostyr Pagiilo, Ohranoskiro čhavó;

¹⁴Gadostyr Jeliasafo, Rieguilaskiro čhavó;

¹⁵Niefalimostyr Ahiro, Jenanoskiro čhavó.”

¹⁶Davá isyn vykedyné muršá khetanybnastyr, barydyrá péskire-dadengíre rodycendyr (čangendyr), Izrailjoskire-tysjoncengire šeralé.

¹⁷I lyjá Mójza i Aaróno adalen muršén, savén khardé pir lav.

¹⁸I skedyné jone saró skedyibén pe pérvo dyvés javire-čhonéskiro. I piriphendle jone péskiro bijanypnaskiro ródo, pir léngire ródy, pir léngire čékarja (siemieistvy), pir lavengiro ginybén, bišé beršéndyr i phuredýr pir šeré,

¹⁹syr rakirdiá Raj Devél Mojzáske. I kerdiá jov lénge piriginybén pe Sinajoskiri čhučí phuv.

²⁰I sys Ruvimóskire čhavén, savó sys Izrailjoskiro anglatunó (pérvo), pir léngire ródy, pir léngire kherítka ródy, pir léngire-dadéskire čékarja (siemieistvy), pir lavengiro ginybén, pir šeré, sarén muršén, bišé beršéndyr i phuredýr, sarén, konéste sys zor te džal pe maribén,

²¹pirigindlo sys dre Ruvimoskiro ródyco (čang) štardešá šov tysjoncy pandžšelá.

²²Simieonoskire čhavén pir léngire ródy, pir léngire ródycy, pir léngire čékarja (siemieistvy), pir lavengiro ginybén, pir šeré, sarén muršén, bišé beršéndyr i phuredýr, sarén, kon sys dre zor te džal pe maribén,

²³pirigindlo sys dre Simieonoskiri ródyco pandždešá jeniá tysjoncy trinšelá.

²⁴Gadóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

²⁵pirigindlo sys dre Gadoskiro ródyco (čang) štardešá pandž tysjoncy šovšelá pandždešá.

²⁶Judáskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, saré, kon sys dre zor te džal pe maribén,

²⁷pirigindlo sys dre Judáskiro ródyco eftadešá štar tysjoncy šovšelá.

²⁸Isaharoskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

²⁹pirigindlo sys dre Isaharoskiro ródyco pandždešá štar tysjoncy štaršelá.

³⁰Zavulonoskire čhavén pir léngire ródy, kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³¹pirigindlo sys dre Zavulonoskiro ródyco (čang) pandždešá eftá (bitrinensiro deš) tysjoncy štaršelá.

³²Iosifóskire (Jozáskire) čhavén, Jefriemóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³³pirigindlo sys dre Jefriemoskiro ródyco štardešá tysjoncy pandžšelá.

³⁴Manasijáskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³⁵pirigindlo sys dre Manasijáskiro ródyco (čang) trijánda duj tysjoncy dujšelá.

³⁶Vieniaminóskire čhavén pir léngire ródy, pir léngire kherítka ródy (pliémi), pir léngiri čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³⁷pirigindlo sys dre Vieniaminoskiro ródyco trijánda pandž tysjoncy štaršelá.

³⁸Danóskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

³⁹pirigindlo sys dre Danoskiro ródyco šovdešá duj tysjoncy eftašelá.

⁴⁰Asiroskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

⁴¹pirigindlo sys dre Asiroskiro ródyco štardešá jekh tysjonco pandžšelá.

⁴²Niefalimoskire čhavén pir léngire ródy, pir léngire kherítka ródy (pliémi), pir léngire čékarja (siemieistvy), pir lavengiro ginybén, bišé beršéndyr i phuredýr, sarén, kon sys dre zor te džal pe maribén,

⁴³pirigindlo sys dre Niefalimoskiro ródyco (čang) pandžeša trin tysjoncy štaršelá.

⁴⁴Ake, isyn manušá, savé zaginé dre piriginybén, savén pirigindle Mójza i Aaróno i Izrailjoskire barydyrá — dešudúj manušá, pe jekhe manušéste kheritkoné rodóstyr (pliemjostyr).

⁴⁵I sys sarén, savé zaginé dro piriginybén, Izrailjoskire čhavén, pir léngire čékarja (sem'i (irjá)), bišé beršéndyr i phuredýr, saré, kon sys dre zor te džal pe maribén dro Izrailjo,

⁴⁶i sys sarén, savé zaginé dro piriginybén šovšelá trin tysjoncy pandžšelá pandždešá.

⁴⁷A Lievíty pir léngire-dadengíre stréčy (pokolienii) na sys pirigindle maškír lénde.”

⁴⁸I phendiá Raj Devél Mojzáske dasavé lavá:

⁴⁹“Jekh Lievijoskire ródycy na zalydža dro piriginybén, i na gin len khetané Izrailjoskire čhavénca;

⁵⁰ne dopatia Lieviténge šátra dosykaibnása i saró, so trej vaš láke, so isyn pašýl láte; mek jone te lydžán šátra dosykaibnása i saró, so trej vaš láke, i te dynarinén (te služynen) pašýl láte, i pašýl šátra mek te čhuvén péskiro stáno;

⁵¹i kiéli javéla trej te pirilydžas šátra, mek Lievíty te ĥazdén la; i kiéli javéla trej te čhuvén šátra, mek Lievíty te čhuvén la; a kóli poddžála vari-kon javire manušéndyr, javéla otdynó pe meribén.

⁵²Izrailjoskire čhavé isyn bangé kažno te terdjol dro péskiro stáno i kažno pašýl péskiro sciago (znamia), pir péskire otriády;

⁵³a Lievíty sys bangé te čhuvén stáno pašýl šátra dosykaibnása, sob (kaj) te na javél xolý pe Izrailjoskire-čhavéngiro khetanyben, i javéna te terdjon Lievíty pe stréga pašýl šátra dosykaibnása.”

⁵⁴I kerdé Izrailjoskire čhavé, syr priphendiá Raj Devél Mojzáske, adiáke jone i kerdé.