Read Biblija - Pe Baltitko Romani čib (Romanes) 2019 Baltic Romani Bible Čysly 10 Bible Online

Čysly 10 - Biblija - Pe Baltitko Romani čib (Romanes) 2019 Baltic Romani Bible bible

Čysly 10

¹I phendiá Raj Devél Mojzáske dasavé lavá:

²“Ker péske duj rupuvé rógi (truby), čekanenca ker len (suvnakuné koterestyr), sob (kaj) jone te javén vaš túke te kharel khetanyben (obščyna) i vaš dová, sob (kaj) te skedelpe stáno (taboro (lod)).

³Kiéli phurdena dre rógi (truby), to skedénape ke tu saré manušá ke zagiibén pašýl skedyibnáskiri šátra.

⁴Kiéli jekhe rogosa zaphurdena, to skedénape ke tu thagárja (kniázi) i barydyrá pe tysjoncende Izrailjoskirende.

⁵Kiéli phurdena trivoga, to ĥazdénape stany, savé sys terdé ke vastóko;

⁶kiéli dro javír mólo phurdena trivoga, to ĥazdénape stany, savé sys terdé ke paš-dyvés (jugo); trivoga mek te bašaven angíl léngiro skedyibén dro drom;

⁷a kiéli trej javéla te skedes manušéngiro skedyibén, to bašaven, ne na trivoga.

⁸Aaronóskire čhavé, e rašaja, isyn bangé te bašaven rogénca: davá javéla tuménge viekoskire uphenybnasa dre tumaré ródy;

⁹i, kiéli džána tumé pe maribén pe tumarí phuv proti vergoste, savó džála maribnása pe tuménde, bašaven ĥará (dlúges) trivoga, — i tumé javéna priripirde angíl Raste-Devléste tumareste, i javéna zrakhné tumé vergéndyr;

¹⁰i dre tumaré-radymakiro dyvés, i pe tumaré svénki, i pe sámo anglypén (načalo) dro čhon bašaven rogénca vaš tumaró célo shačkiribén i vaš ramanjono (mírno) tumaró svénto dyibén i davá javéla pal tuménde ripiribnasa angíl tumaré Devléste. Me som Raj Devél, Devél tumaró.”

¹¹Pe javír berš, dro javír čhon, pe bišengire-čhonéskiro dyvés, ĥazdyjápe óbloko otčhakiribnaskire šatratyr dosykaibnása (otkrovienijasa);

¹²i giné Izrailjoskire čhavé pir péskire stany (tabory) Sinajoskire čhučé phuvjátyr, i terdijá óbloko pe čhučí phuv Farano.

¹³I ĥazdynépe jone dro pérvo mólo, pir Ráskire-Devléskiro uphenybén, savó sys dynó pir Mojzaste.

¹⁴Sys ĥazdynó pérvo Judáskire-čhavéngire stanoskiro sciago (znamia) pir léngire otriády; pe otriády léngire rodycóstyr sys Naasóno, Aminadavóskiro čhavó;

¹⁵i pe otriády Isaharoskire-čhavéngire rodycóstyr sys Nafanailo, Cuaraskiro čhavó;

¹⁶i pe otriády Zavulonoskire-čhavéngire rodycóstyr sys Jeliavo, Xielonoskiro čhavó.

¹⁷I roskedyny sys šátra, i giné Girsonoskire čhavé i Mierariskire čhavé, savé lydžánas šátra.

¹⁸I ĥazdynó sys Ruvimóskire-stanoskiro sciago pir léngire otriády; i pe otriády léngire sys Jelicuro, Šedieuroskiro čhavó;

¹⁹i pe otriády Simieoonoskire-čhavéngire rodycóstyr sys Šelumiilo, Curišadajoskiro čhavó;

²⁰i pe otriády, Gadóskire-čhavéngire rodycóstyr sys Jeliasafo, Rieguiloskiro čhavó.

²¹Tén'ci (poslie) giné Kaafovoskire čhavé, savé lydžánas pribory sventoné štetóstyr; šátra sys čhudý angíl léngiro javiben.

²²I ĥazdynó sys Jefriemóskire-čhavéngiro stanoskiro sciago (znamia) pir léngire otriády; i pe léngire otriády sys Jelišamo, Amiudaskiro čhavó;

²³i pe otriády Manasijáskire-čhavéngire rodycóstyr sys Gamaliilo, Piedacuraskiro čhavó;

²⁴i pe otriády Vieniaminóskire-čhavéngire rodycóstyr sys Avidano, Gidieonijoskiro čhavó.

²⁵Palatunó (posliednjo) saré stanendyr ĥazdynó sys sciago (znamia) Danóskire-čhavéngiro léngire otriadendyr; i pe léngire otriády sys Ahiiezero, Amišadajoskiro čhavó;

²⁶i pe otriády Asiroskire-čhavéngire rodycóstyr sys Pagiilo, Ohranoskiro čhavó;

²⁷i pe otriády Niefalimoskire-čhavéngire rodycóstyr sys Ahiro, Enanoskiro čhavó.

²⁸Ĥáda, sys giibnytko (poriadko) Izrailjoskire čhavéngiro pir léngire otriády. I jone giné dro drom.

²⁹I phendiá Mójza Xovavoske, Raguiloskire čhavéske, Madianitianinoske, Mojzáskire sastreske [semencake-r.s.]: “Ame džása angíl pe dová štéto, pal savó Raj Devél phendiá: ‘Tuménge Me dáva les’, džá aménca, ame kerása túke lačhipén, pal-dová so Raj Devél lačhipén phendiá pal Izrailjo.”

³⁰Ne jov phendiá léske: “Na džáva, me džáva pe péskiri phuv, kaj bijandyjom.”

³¹Mójza phendiá: “Na mek amen, pal-dová so tu džinésa, syr ame terdjovasa stanósa pe čhučí phuv, i tu javésa vaš aménge xaj (sýrby) jakhá te lydžas;

³²kóli tu džása aménca, to dová lačhipén, savó Raj Devél keréla aménge, ame kerása túke.”

³³I giné dro drom jone Ráskire-Devléskire bergátyr, trin dyvesá sys dro drom, i kovčego Ráskire-Devléskiro zavietosa gijá angíl lénde trin dyvesá, sob (kaj) te vydykhen lénge štéto, kaj te terdjon.

³⁴I óbloko Ráskire-Devléskiro svencyndia lénge dyvesé, kiéli jone giné stanostyr.

³⁵Kiéli ĥazdélape kovčego dro drom, Mójza rakirdiá: “Zaterdjov, Rajo Dévla, i roznašenape Tyré vérgi, i našéna Tyré móstyr, savénge drieván Tu san na pir iló!”

³⁶A kiéli terdjolas kovčego, jov rakirdiá: “Risjov, Rajo Dévla, ke Izrailjoskire tysjoncy, savén až naštý te pirigines.”