Read Biblija - Pe Baltitko Romani čib (Romanes) 2019 Baltic Romani Bible Čysly 12 Bible Online

Čysly 12 - Biblija - Pe Baltitko Romani čib (Romanes) 2019 Baltic Romani Bible bible

Čysly 12

¹I vyphendle xolý Mariam i Aaróno Mojzáske pal romniáte Jefiopliankate, savjá jov lyjá, pal-dová jov lyjá pal péste Jefioplianka,

²i phendlé: “Ci jekhéske Mojzáske rakirdiá Raj Devél? Ci na rakirdiá Jov i aménge?”, — i šundiá davá Raj Devél.

³Mójza sys manúš kovledyr (smirienedyr) saré manušéndyr pe phuv.

⁴I phendiá Raj Devél naužakirdes Mojzáske i Aaronóske i Mariamake: “Vydžán tumé trindžine ke skedyibnáskiri šátra.” I vyginé saré trindžine.

⁵I zgija Raj Devél dro oblokoskiro stýlbo, i terdijá pašýl skinijakiro zagiibén, i khardiá Aaronós i Mariam, i vyginé jone dujdžiné.

⁶I phendiá: “Šunén Miré lavá: kóli te javél tuménde Ráskire-Devléskiro proróko, tedy Me otčhakiravape léske dre dykhibén, i dro sunó Me rakiravas lésa;

⁷ne na adiáke, syr Miré pisharíske Mojzáske, jov isyn čačunó pir saró Miro kher:

⁸ušténca ke uštá Me rakiráva lésa, i dykhno (biciales), a na dro ciamlo phenybén, i patrín (óbrazo) Ráskire-Devléskiri jov dykhéla; syr tumé na darándyne te vyrakiren Miré pisharíske Mojzáske?”

⁹I roshačija Ráskire-Devléskiri xolý pe lénde, i Jov otgijá.

¹⁰I óbloko otgijá šatratyr, i ĥáda, e Mariam učhakirdiape prokazasa syr ivesa. O Aaróno podykhciá pe Mariamate, i ĥáda, joj sys dre prokáza.

¹¹I phendiá Aaróno Mojzáske: “Miro Rajo! Na gin aménge dro grého, so ame kerdiám dylnypén i kerdiám grého;

¹²na domek, sob (kaj) joj te javél, syr muló bijandlo (tyknomas): savéste, kiéli jov vydžála péskre dákire ločoviátyr, to paš masá kirnyne.”

¹³I zadyja gódla Mójza ke Raj Devél: “Rajo Dévla! Sastiakir la!”

¹⁴I phendiá Raj Devél Mojzáske: “Kóli lákiro dad čungardelas láke dro muj, tedy so, ci na treindiá láke te ladžal eftá dyvesá? I adiáke mek te javél joj vybičhady pe eftá dyvesá pal stáno, a tén'či (poslie) nevéstyr te risjol.”

¹⁵I sys Mariam vybičhady pal stáno eftá dyvesá i manušá na džánas dro drom, ke davá časo, paka risijá e Mariam.