Read Biblija - Pe Baltitko Romani čib (Romanes) 2019 Baltic Romani Bible Čysly 14 Bible Online

Čysly 14 - Biblija - Pe Baltitko Romani čib (Romanes) 2019 Baltic Romani Bible bible

Čysly 14

¹I ĥazdyjá gódla saró skedyibén, i rondlé manušá sarí doiá rat;

²i rakirdé jone xoliása pe Mojzaste i Aaronoste saré Izrailjoskire čhavé; i saró skedyibén phendiá lénge: “O, kóli ame merasas pe Jegiptóskiri phuv, ci kóli merasas ame pe daja čhučí phuv!

³I vaš so Raj Devél lydžála amen pe daja phuv, sob (kaj) ame te xasjovas kurtalátyr? Džuvliá amaré i čhavé amaré doresenape vergénge; ci nane fedýr te risjovas pale dro Jegípto?”

⁴I phendlé jone jekh jekhéske: “Čhuvasa péske barydyrés, i risjovasa dro Jegípto.”

⁵I pyné Mójza i Aaróno pe péskire muiá angíl saré Izrailjoskire-čhavéngire skedyibén.

⁶I Isúso (Johošuá), Navinoskiro čhavó, i Xalievo, Jefonijaskiro čhavó, savé obdykhenas phuv, roskušne péskire uribená,

⁷i phendlé saré Izrailjoskire-čhavéngire skedyibnaske: “Phuv, saví ame psirdiam te dykhas, isyn drieván lačhí;

⁸kóli Raj Devél isyn lačhó ke ame, tedy mek te lydžál Jov amen pe daja phuv i déla aménge la — daja phuv, dre saví thadéla thud i avgín (meda);

⁹iekh, sob (kaj) proti Raste-Devléste tumé te na ĥazdénpe, i na darén adalé-phuvjákire manušéndyr; pal-dová so jone doiačenape aménge pe xabén, te zaterdjon pal lénde nane konéske; a aménca isyn Raj Devél, na darén léndyr.”

¹⁰I phendlé saré manušá skedyibnástyr: “Te mares len barénca!” Ne Ráskire Devléskiri sláva zaziaindia dre skedyibnáskiri šátra sarénge Izrailjoskire čhavénge.

¹¹I phendiá Raj Devél Mojzáske: “Kicý javéna te xoliakiren Man adalé manušá? I kicý javéna jone te na patián Mánge pir saré znamiénii (ĥiertyká), savé Me kerdjom maškír lénde?

¹²Zanasvaliakirava Me len fransenca i xasiakiráva len, ne i Me keráva tútyr butýr manušýtko nacyja i zoraledýr léndyr.”

¹³Ne o Mójza phendiá Ráske-Devléske: “Podšunena Jegiptiáni, manušá, savéndyr Tu zorjása Tyrjasa vylydžijan adalé manušén,

¹⁴i phenéna dalé-phuvjákire manušénge, savé šundlé, so Tu, Rajo Dévla, dživesa maškír adalé manušénde, i so Tu, Rajo Dévla, désa lénge te dykhés Pes muj ke muj, i óbloko Tyró terdó pe lénde, i Tu džása angíl lénde dyvesé dro oblokoskiro stýlbo, i ratý dro jagakiro stýlbo;

¹⁵i kóli Tu xasiakiresa adalé manušén, syr jekhés manušés, tedy manušá, savé šundlé Tyrí sláva, phenéna:

¹⁶“O Raj Devél na mogindiá te zalydžal adalé manušén pe phuv, saví Jov sovlahasa phendiá te del léske, a tén'či (poslie) i xasiakirdiá len pe čhučí phuv.”

¹⁷I adiáke mek te vybarjol Ráskire-Devléskiri zor, syr Tu phendián:

¹⁸“O Raj Devél ĥará (dlúges) užakiréla i Jov isyn buté-tangipnaskiro, Savó otmekéla gréhi i čoripén, i Jov na jačkiréla bi otphenybnaskiro, ne Jov čhuvéla kára pal dadéngiro čoripén pe čhavénde ke tríto i štárto ródo.

¹⁹Otmek grého adalé manušénge pir Tyrí bari láska, syr Tu primangdian adalé manušénge Jegiptóstyr ke dalé dyvesá.”

²⁰I phendiá Raj Devél Mojzáske: “Otmekava grého lénge pir tyró lav;

²¹ne Me som džidó, i Mirí Ráskire-Devléskiri sláva isyn pherdý pir sarí phuv:

²²saré, savé dykhné Mirí sláva i Miré znamiénii (ĥiertyká), savé Me kerdjom dro Jegípto i pe čhučí phuv, i sprobinenas Man deš móly, i na šundlé Mirí zan,

²³i jone na javéna te dykhén phuv, saví Me sovlahasa phendjom te dav léngire dadénge; saré, kon xoliakirdia Man, na dykhéna la.

²⁴Ne Miré pisharís Xalievos, pal-dová so dre léste sys javír dúho (fáno), i jov dre saró kandyjá Man, zalydžava pe phuv, pe saví jov psirdiá, i léskiro siemjo javéla xulása pe láte;

²⁵Amalikitiani i Xananiei dživéna pe dólo; atasiá tumé risjon i džán tumé pe čhučí phuv ke Loló mórjo (derjáv).”

²⁶I phendiá Raj Devél Mojzáske i Aaronóske dasavé lavá:

²⁷“Kicý adalé xoliamé manušá javéna te žalinenpe xoliása pe Mánde? Xoliamó vyrakiriben Izrailjoskire čhavéngiro, savésa jone žalinenape pe Mánde, Me šunava.

²⁸Phen lénge: “Me dživáva, — rakiréla Raj Devél: — , syr tumé rakirdé dro saró šunybén Mánge, adiáke i Me keráva tuménge;

²⁹pe daja čhučí phuv peréna tumaré masá, i saré tumé san pirigindle, ci but tumen sys, bišé beršéndyr i phuredýr, savé žalindlepe xoliása pe Mánde,

³⁰tumé na zadžána pe phuv, pe saví Me, ĥazdyi Miro vast, sovlahadjom te rosčhuvav te dživén tumen, apríč Xalievoste, Jefonijaskire čhavestyr, i Isusóste (Johošuaste), Navinoskire čhavéste;

³¹a tumaré čhavén, pal savénde tumé rakirdé, so jone doiačenape dro doresybén vergénge, Me zalydžava odorík, i jone udžinena phuv, saví tumé bidykhne,

³²a tumaré trúpy peréna dre daja čhučí phuv;

³³a tumaré čhavé javéna pe čhučí phuv te loden štardešá berš, i javéna te lydžán kára pal tumaró ladžaipén, ke davá časo, paka xasjona saré tumaré trúpy pe čhučí phuv;

³⁴pir štaré-dešengiro-dyvesengiro progiiben, dre savé tumé obdykhne phuv, tumé lydžána kára pal tumaré gréhi štardešá berš, berš pal dyvés, sob (kaj) tumé te džinén, so isyn dasavo te javén odolenca manušénca, savén Me mekcjom.

³⁵Me, Raj Devél, rakiráva, i keráva adiáke saré adalé xoliamé manušénca, savé ĥazdyneepe proti Mánde: pe daja čhučí phuv saré jone xasjona i vymerena.”

³⁶I odolé, savén bičhadiá Mójza, sob (kaj) te obdykhen phuv, i savé risiné pale, i ĥazdyné proti léste saré adalé manušén, rozmekny nalačhi mavlýn (malva) pal phuv,

³⁷adalé manušá, savé rozmekne nalačhi mavlýn pal phuv, myné, jone sys xasiakirdé angíl Raste-Devléste;

³⁸iekh Isúso (Johošuá), Navinoskiro čhavó, i Xalievo, Jefonijaskiro čhavó, jačnépe džidé odolé muršendyr, savé psirdé te dykhén phuv.”

³⁹I phendiá Mójza dalé lavá angíl sarénde Izrailjoskire čhavénde, i manušá drieván zasmentnindlepe.

⁴⁰I, uštyi tasiárles (ránes) pe zlóko, giné jone pe bergákiro vučipén, rakirí: “Ĥáda, ame džása pe dová štéto, pal savó rakirdiá Raj Devél, pal-dová so ame kerdiám grého.”

⁴¹Tén'ci Mójza phendiá: “Vaš so tumé piridžana Ráskire-Devléskiro priphenybén? Davá javéla nakuč;

⁴²na džán, pal-dová so nane maškír tuménde Ras-Devlés, sob (kaj) te na pirimaren tumen tumaré vérgi;

⁴³pal-dová so Amalikitiani i Xananiei isyn odój angíl tuménde, i tumé peréna kurtalátyr, pal-dová so tumé otginé Rástyr-Devléstyr, i na javéla tuménca Raj Devél.”

⁴⁴Ne jone dyné duma te ĥazdénpe pe bergákiro vučipén; Ráskire-Devléskiro zavietóskiro kovčego i Mójza na jačkirdé stáno.

⁴⁵I giné péske Amalikitiani i Xananiei, savé dživdé pe doiá bérga, i rozmarde len, i tradyne len ke Xorma.