Read Biblija - Pe Baltitko Romani čib (Romanes) 2019 Baltic Romani Bible Čysly 16 Bible Online

Čysly 16 - Biblija - Pe Baltitko Romani čib (Romanes) 2019 Baltic Romani Bible bible

Čysly 16

¹O Koriejo, Icgaroskiro čhavó, Kaafoskiro čhavó, Lievijoskiro čhavó, i Dafano i Avirono, Jeliavoskiro čhavé, i Avnano, Faliefoskiro čhavó, Ruvimovoskire čhavé,

²ĥazdynépe xoliása pe Mojzaste, i lénca Izrailjoskire čhavéndyr dujšelá pandždešá muršá, skedyibnaskire barydyrá, savén kharéna pe skedyibén, slavutna manušá.

³I skedynépe proti Mojzaste i Aaronoste, i phendlé lénge: “Uhtýlla (dósi) tuménge, saró skedyibén, saré manušá isyn svénta, i maškír lénde isyn Raj Devél! Sóske tumé ĥazdéna pes vučedýr Ráskire-Devléskire manušéndyr?”

⁴O Mójza, syr šundiá davá, to pyjá pe péskiro muj,

⁵i phendiá Koriejoske i saré manušénge, savé sys khetané lésa, rakirí: “Atasiá sykavéla Raj Devél, kon isyn Léskiro, i kon isyn svénto, sob (kaj) te kerél pašyledýr les ke Pe; i konés Jov vykedéla, odolés i keréla Jov pašyledýr ke Pe.

⁶Ĥáda, so kerén: Koriejo i saré léskire manúš, len péske kadily,

⁷i atasiá čhuvén dre lénde jag, i čhuvén dre lénde fimiámo (gudlé smóly) te thuvliakiren angíl Raste-Devléste; i konés vykedéla Raj Devél, odová i javéla svénto. Uhtýlla (dósi) tuménge, Lievijoskire čhavé!”

⁸I tén'či phendiá Mójza Koriejoske: “Šunén, Lievijoskire čhavé!

⁹Naúšto nauhtylla (nádosi) tuménge dová, so Izrailjoskiro Devél otkedyja tumen Izrailjoskire manušéndyr i kerdiá pašyledýr tumen ke Pe, sob (kaj) tumé te kerén butý pašýl Ráskire-Devléskiri šátra i te terdjon angíl skedyibén pe butý vaš lénge?

¹⁰Jov kerdiá pašyledýr tut ke Pe i túsa sarén tyrén pšalén, Lievijoskire čhavén, i tumé domarenape iščo (inké) te jačen rašanca.

¹¹I adiáke tu i saré tyré manušá skedynépe proti Raste-Devléste. So isyn dasavo Aaronosa, so tumé xoliása žalinenape pe léste?”

¹²I bičhadiá Mójza te kharén Dafanos i Avironos, Jeliavoskire čhavén. Ne jone phendlé: “Na džása!”

¹³Naúšto nauhtylla (nádosi) dová, so tu vylydžyjan amen phuvjátyr, pe saví thadéla thud i avgín, sob (kaj) te xasiakires amen pe čhučí phuv, i tu butýr kamésa te javes thagarisa pe aménde!

¹⁴Ci jandian tu amen pe phuv, kaj thadéla thud i avgín, i ci dyján tu dro xulaiben féldy i vinagradniki? Jakhá adalé-manušéngire tu kames te korjakires? Ame na džása!”

¹⁵Mójza drieván xoliásyja, i phendiá Ráske-Devléske: “Na rískir Tyré jakhá pe léngiro janybén. Me na lyjom léndyr ni jekhe oslós, i na kerdjom fuipén nijekheske léndyr.”

¹⁶I phendiá Mójza Koriejoske: “Atasiá tu, i saré tyré manušá, javén te terdjon angíl Ráskire-Devléskiro muj, tu, jone, i adiáke-pac' Aaróno;

¹⁷i len kažno (sváko) manúš péskiri kadila, i čhuvén dre lénde fimiámo (gudlé smóly), i janén angíl Ráskiro-Devléskiro muj kažno (sváko) péskiri kadila, dujšelá pandždešá kadily; tu i Aaróno, kažno péskiri kadila.”

¹⁸I lyjá kažno manúš péskiri kadila i čhudiá dre lénde jag, i čhudé andré dre lénde fimiámo (gudlé smóly) te xačkirén, i terdiné pašýl zagiibén dre skedyibnáskiri šátra; adiáke-pac' i Mójza i Aaróno.

¹⁹I skedyjá pe lénde Koriejo saré manušén ke zagiibén dre skedyibnáskiri šátra. I sykadyjá Ráskire-Devléskiri sláva saré manušénge.

²⁰I phendiá Raj Devél Mojzáske i Aaronóske, rakirí:

²¹“Džán dre rig adalé manušéndyr, i Me xasiakiráva len dre jekh menta (minuta).”

²²Jone pyné pe péskire muiá i phendlé: “Dévla, Devlale pe kažnoné-maseskiro (ločakiro) dúho (fáno)! Jekh manúš kerdiá grého, i Tu xoliasosa pe saré manušénde?”

²³I phendiá Raj Devél Mojzáske dasavé lavá:

²⁴“Phen manušénge: ‘Otdžan saré rigéndyr Koriejoskire, Dafanoskire i Avironoskire šatrendyr.’”

²⁵I uštyjá Mójza, i gijá ke Dafano i Avirono, i pal léste giné Izrailjoskire phurydyrá.

²⁶I phendiá manušénge: “Otdžan nažužé-manušéngire šatrendyr, i na kasynenpe ni ke so, so isyn léngiro, sob (kaj) te na xasjon tuménge dre saré léngire gréhi.”

²⁷I otginé jone saré rigéndyr Koriejoskire šatrendyr, Dafanoskire i Avironoskire; a Dafano i Avirono vyginé i terdé sys pašýl péskire šatrengire vudará péskire džuvliénca, i péskire čhavénca, i péskire tykné čhavorenca.

²⁸Tén'ci phendiá o Mójza: “Daléstyr udžinena, so Raj Devél bičhadiá man te keráv saré dalé réndy, a na pir péskiri myslia me keráva davá:

²⁹kóli jone meréna, syr saré manušá meréna, i peréla pe lénde kára, saví, xaj, sud'ba saré manušénca: to na Raj Devél bičhadiá man;

³⁰a kóli Raj Devél keréla dívo, i phuv rosčhakirela péskire uštá i nakhavela (proglytynela) len i saró, so, lénde, i jone džidé zdžana pe dová svéto (dro liúno), tedy džinén, so adalé manušá na prilyné patyvása Ras-Devlés.”

³¹I sys adiáke: syr jov phendiá dalé lavá, rozgijápe phuv tel léste;

³²rosčhakirdia phuv péskire uštá, i nakhadia len i léngire kherá, i saré Koriejoskire manušén i saró, so lénde sys;

³³i giné telé jone sarésa, so sys lénde džidó pe dová svéto, i učhakirdiá len phuv, i xasiné jone péskire manušéndyr.

³⁴I saré Izrail'tiáni, savé sys pašýl lénde, našné léngire godlatyr, sob (kaj), rakirdé jone, i amen te na nakhavel phuv.

³⁵I vygijá jag Rástyr-Devléstyr i xaja odolén dujšelá pandždešá muršén, savé jandlé gudlé smóly (fimiámo).

³⁶I phendiá Raj Devél Mojzáske, rakirí:

³⁷“Phen Jelizaroske, Aaronóskire-čhavéske, rašáske, mek jov te kedel kadily shačkirdé manušéndyr, i jag te vyčhurdel javrí; pal-dová so jone osvencyndlepe,

³⁸kadily adalé-griešnikengire léngire meribnasa, i mek te rozmaren len pe sane bliahi (listy) te učhakiren altárjo, pal-dová so jone jandlé len angíl Ráskire-Devléskiro muj, i jone jačné obsvencyndle; i javéna jone ĥiertykasa (sykaibnasa) vaš Izrailjoskire čhavénge.”

³⁹I lyjá rašáj Jelizáro xarkuné (miediana) kadily, savengire manušén Devél shačkirdiá, i rozmarde len dre sane bliahi (listy) te učhakiren altárjo,

⁴⁰sob (kaj) te ripirén Izrailjoskire čhavé, sob (kaj) nikón javír manúš, savó na Aaronóskire rodóstyr, te na poddžál te janel gudlé smóly (fimiámo) te xačkirel angíl Ráskire-Devléskiro muj, i, sob (kaj) te na javél lésa, so Koriejosa i léskire manušénca, savé sys lésa khetané, syr rakirdiá léske Raj Devél pir Mojzaste.

⁴¹Pe javír dyvés saró Izrailjoskire-čhavéngiro skedyibén lyjá te rakirél xoliása pe Mojzaste i Aaronoste, i rakirdé: “Tumé muliakirdé Ráskire-Devléskire manušén.”

⁴²I kiéli skedynépe manušá proti Mojzaste i Aaronoste, jone risiné ke skedyibnáskiri šátra (skínija), i ĥáda, óbloko učhakirdiá la, i javdiá Ráskire-Devléskiri sláva.

⁴³I javné Mójza i Aaróno ke skedyibnáskiri šátra.

⁴⁴I phendiá Raj Devél Mojzáske dasavé lavá:

⁴⁵“Džán dre rig adalé manušéndyr, i Me xasiakiráva len dre jekh menta (minuta).” Ne jone pyné pe péskire muiá.

⁴⁶I phendiá Mójza Aaronóske: “Le kadila, i čhuv jag dre láte altarjostyr i čhuv gudlé smóly (fimiámo), i lýdža sygnedyr ke manušá, i zaterdjov pal lénde, pal-dová so vygijá xolý Rástyr-Devléstyr i jaciá xasiakiriben.”

⁴⁷I lyjá Aaróno, syr priphendiá Mójza, i prastándyja dre manušéngiro skedyibén, i ĥáda, lyjape xasiakiriben (moróvo) pe manušénde. I jov čhudiá fimiámo, i zaterdija pal manušénde.

⁴⁸Terdijá jov maškír mulende i džidende, i xasiakiriben pirijaciá.

⁴⁹I myné xasiakiribnastyr dešuštar tysjoncy eftašelá manušén, apríč adalé manušénde, savé myné pir Koriejoskiro réndo.

⁵⁰I risijá Aaróno ke Mójza ke zagiibén dre skedyibnáskiri šátra, paló dová, syr xasiakiriben pirijaciá.