Read Biblija - Pe Baltitko Romani čib (Romanes) 2019 Baltic Romani Bible Čysly 17 Bible Online

Čysly 17 - Biblija - Pe Baltitko Romani čib (Romanes) 2019 Baltic Romani Bible bible

Čysly 17

¹I phendiá Raj Devél Mojzáske, rakirí:

²“Phen Izrailjoskire čhavénge, i le léndyr pir destó dadengíre rodycóstyr, saré léngire barydyrendyr pir ródycy, dešudúj i kažnoneskiro lav začhin pe léskiro destó;

³lav Aaronoskiro začhin pe Lievijoskiro destó, pal-dová so jekh destó léngire rodycoskire barydyrestyr trej jone te den;

⁴i čhuv len dre skedyibnáskiri šátra, angíl kovčego dosykaibnása (otkrovienijosa), kaj sykadjovava Me tuménge;

⁵i konés Me vykedava, odoléste destó lyndjola (zacvetinela); i adiáke Me štyliakirava Izrailjoskire čhavéngiro rakiribén xoliása, savésa jone rakiréna pe aménde.”

⁶I phendiá Mójza Izrailjoskire čhavénge, i dyné léske saré léngire barydyrá, kažnoné barydyrestyr pir destó pir léngire dadengíre ródycy dešudúj desté, i Aaronoskiro destó sys maškír léngire desté.

⁷I čhudiá Mójza desté angíl Ráskire-Devléskiro muj, dre šátra dosykaibnása (skínija).

⁸Pe javír dyvés zagijá Mójza dre dosykaibnaskiri šátra, i ĥáda, Aaronoskiro destó, Lievijoskire kheréstyr, lyndija (zacvetindia), mekciá bukore (počki), dyjá luludiá (cvety) i jandiá mindali.

⁹I vylydžijá Mójza saré desté Ráskire-Devléskire móstyr ke saré Izrailjoskire čhavé. I dykhné jone davá, i lyjá kažno péskiro destó.

¹⁰I phendiá Raj Devél Mojzáske: “Čhuv nevéstyr destó Aaronoskiro pe zrakhibén, syr ĥiertýk (syr sykaibén) vaš napatiaibnytkone manušénge, sob (kaj) te pirijačel léngiro xoliamó rakiribén pe Mánde, i jone te na merén.”

¹¹O Mójza kerdiá davá syr priphendiá léske Raj Devél, adiáke jov i kerdiá.

¹²I phendlé Izrailjoskire čhavé Mojzáske: “Ĥáda, ame merasa, xasjovasa, saré xasjovasa!

¹³Kažno, kon poddžála ke Ráskire-Devléskiri šátra, meréla: ci na pridžalape sarénge aménge te meras?”