Read Biblija - Pe Baltitko Romani čib (Romanes) 2019 Baltic Romani Bible Čysly 18 Bible Online

Čysly 18 - Biblija - Pe Baltitko Romani čib (Romanes) 2019 Baltic Romani Bible bible

Čysly 18

¹I phendiá Raj Devél Aaronóske: “Tu i tyré čhavé i kher tyré-dadéskiro túsa lydžána pe péste otphenybén pal bizlado pe svénto štéto: i tu i tyré čhavé túsa lydžána pe péste grého pal bizlado pe tumaró svénto štéto.

²Adiáke-pac' i tyré pšalén, Lievijoskiro ródo, tyré-dadéskiro kherítko ródo (pliemjo), le péske: mek jone te javén paš túte i te kerén butý túke, a tu i tyré čhavé túsa javéna paš dosykaibnaskiri šátra;

³mek jone te dynarinén (te služynen) túke i te dynarinén pe sarí skínija; jekh, sob (kaj) te na poddžan ke sventoné-štetoskire priedmiety i ke altárjo, sob (kaj) te na merén i lénge, i tuménge.

⁴Mek jone te javén paš túte i lydžána te dynarinén dre skedyibnáskiri šátra, saré butiá pir šátra; a javír manúš naštý te poddžál ke tumé.

⁵Adiáke dynarinén pe svénto štéto i pašýl altárjo, sob (kaj) te na javél butýr xolý pe Izrailjoskire čhavénde;

⁶pal-dová so tumaré pšalén, Lievitén, Me lyjom Izrailjoskire čhavéndyr, i dyjom len tuménge, dro dáro Mánge, Ráske-Devléske, sob (kaj) jone te kerén svénto butý pašýl skedyibnáskiri šátra;

⁷i tu, i tyré čhavé túsa, dykhén pal tumarí sventyma dro saró, so isyn altarjoskiro i so isyn andrál pal šýrma, i dynarinén; tuménge davá Me dre dáro svénto dynaribén, a javír manúš, i savó poddžála, otdynó javéla meribnáske.

⁸I phendiá Raj Devél Aaronóske: “Ĥáda, Me dopatiava túke te dykhés, syr janéna svénto dyibén ĥazdypnasa Mánge; saréstyr, so janéna Izrailjoskire čhavé, Me dyjom túke i tyré čhavénge, vaš tumaró rašaipen, syr uphenybén pe viéko.

⁹Ĥáda, so isyn tyró samone baré janybnaskire sventymatyr, so janéna pe jag: kažno léngiro marunó janybén, i kažno léngiro svénto janybén pal grého, i kažno svénto janybén pal léngiri bang, so jone janéna Mánge, davá te javél syr bari sventyma túke i tyré čhavénge.

¹⁰Pe sámo svénto štéto xan davá, saré muršá saštý te xan, davá mek te javél vaš túke.

¹¹I ĥáda, iščo (inké) so túke: léngire sventoné janybnaskire túke dáry i svénta dyibená ĥazdypnasa saré Izrailjoskire čhavéndyr. Me dyjom túke svénto dyibén, i tyré čhavénge, i tyré čhajenge túsa syr uphenybén pe viéko; kažno žužó manúš dro tyró kher saštý (moginéla) te xal davá.

¹²Saró fedyršone aliejostyr i saró fedyršone vinagradostyr i marestyr, léngire pérva barjakirdé (plódy), savé jone janéna Ráske-Devléske, Me dyjom len túke.

¹³Saró pérvo, so déla léngiri phuv, savé jone janéna Ráske-Devléske, mek te javén tyré; kažno žužó (čysto) manúš dro tyró kher saštý (moginéla) te xal davá.

¹⁴Saró sovlahado pe Izrailjoskiri phuv, mek te javél tyró.

¹⁵Saré, savé roskušena dakiri ločoví dre kažno loč (plot'), saví janéna Ráske-Devléske, manušéndyr i kheritkoné murdaléndyr (skotóstyr), mek te javél tyré; jekh anglatunó (pérvo) manušéndyr isyn bangó te javél vykindlo, i anglatunó nažužé kheritkoné murdalestyr te javél vykindlo;

¹⁶a vykinybén pal lénde: len jekhe čhonestyr pir tyrí timín, le vykinybén pandž šékieli rupésa, pir svénto šékieljo, savó dre biš giery;

¹⁷ne pal pervoné tyknoreste gurumniendyr [guruvendyr-r.s.], i pal pervoneste bakréndyr, i pal pervoneste buznendyr, na le vykinybén: jone isyn svénta; léngire ratésa občhuv altárjo, i adáj len xačkir syr svénto dyibén, dro gudló thuv, lačhó Ráske-Devléske;

¹⁸A mas léngiro pridžalape túke, adiáke-pac' syr kolýn sventoné dyibnástyr trinskiribnasa i pravo (čačó) psikó pridžalape túke.

¹⁹Kažno svénto dyibén ĥazdypnasa, savó Izrailjoskire čhavé janéna Ráske-Devléske, Me otdáva túke, i tyré čhavénge, i čhajenge tyrenge túsa syr uphenybén dro viéko, davá isyn zavieto londeskiro pe viéki angíl Raste-Devléste, savó sys dynó vaš túke i rodóske tyréske túsa.”

²⁰I tén'či phendiá Raj Devél Aaronóske: “Pe léngiri phuv túte na javéla pravo pe meknó mištypén, i paš na javéla túke maškír lénde; Me som paš tyrí i meknó mištypén tyró maškír Izrailjoskire čhavénde.”

²¹A Lievijoskire čhavénge, ĥáda, Me dyjom syr meknó mištypén déšto (dešengiri) miéra saréstyr, so isyn dro Izrailjo, pal léngiro dynaribén, pal dová, so jone lydžána mangipén dre skedyibnáskiri šátra;

²²i paldavá Izrailjoskire čhavé naštý butýr te poddžan ke skedyibnáskiri šátra, sob (kaj) te na kerén grého i te na merén:

²³mek Lievíty te kerén rašaitko butý dre skedyibnáskiri šátra i te lydžán pe péste léngiro grého. Davá javéla uphenybén pe viéki dre tumaré ródy; maškír Izrailjoskire čhavénde jone na doreséna mištypnáskiri miéra;

²⁴adiáke, syr déšto paš Izrailjoskire čhavengiri, saví jone janéna dro svénto janybén Ráske Devléske, Me dáva Lieviténge dre mištypnáskiri miéra, paldavá Me i phendjom lénge, maškirál Izrailjoskire čhavénde jone na doreséna mištypnáskiri miéra.”

²⁵I phendiá Raj Devél Mojzáske, rakirí:

²⁶“De te džinén Lieviténge i phen lénge: ‘Kiéli tumé javéna te len Izrailjoskire čhavéndyr déšto miéra, saví Me dyjom tuménge léndyr dro meknó mištypén, tedy janén léstyr svénto dyibén ĥazdypnasa Ráske-Devléske, déšto miéra dešengirjatyr,

²⁷i zagindlo javéla tuménge davá tumaró svénto janybén, syr maró gumnostyr i syr mol (vino) priesostyr;

²⁸adiáke i javéna tumé te janén svénto dyibén ĥazdypnasa Ráske-Devléske saré tumaré deštone mierendyr (pašendyr), savé javéna te len Izrailjoskire čhavéndyr, i javéna te den léndyr svénto dyibén Ráskire-Devléskiro rašáske Aaronóske;

²⁹saréstyr, so delelape tuménge, janén svénto dyibén ĥazdyinasa Ráske-Devléske, saré fedyršonestyr, so sys svenciakirdo.’

³⁰I phen lénge: ‘Kiéli tumé janéna saré fedyrša daléstyr, tedy davá javéla zagindlo Lieviténge, syr dynó (givaobkeribnaskire šurnatyr) gumnostyr i syr dynó priesostyr;

³¹tumé saštý (moginéna) te xan davá pe kažno štéto, tumé i tumaré čékarja (siemieistvy), pal-dová so davá isyn pleskiriben pal tumaré butiá dre skedyibnáskiri šátra;

³²i tumé na lydžána pal davá grého, kiéli janéna fedyršo saréstyr; i tumé na magirena svenciakirdo Izrailjoskire čhavénca i na meréna tumé.