Read Biblija - Pe Baltitko Romani čib (Romanes) 2019 Baltic Romani Bible Čysly 19 Bible Online

Čysly 19 - Biblija - Pe Baltitko Romani čib (Romanes) 2019 Baltic Romani Bible bible

Čysly 19

¹I phendiá Raj Devél Mojzáske i Aaronóske dasavé lavá:

²“Ĥáda, isyn uphenybén (statúto) pal Zakóno, savó priphendiá Raj Devél: ‘Phen Izrailjoskire čhavénge, mek te janén túke ternia ryžona reca (tjolka) bi došengirja, savjate nane nauhtylyben, i pe savjate na sys ĥámo;

³i otdén la Jelizaroske rašáske, i jov vylydžala la javrí stanostyr i začhinena la angíl léste;

⁴i mek te lel rašáj Jelizáro péskire anguštesa (pal'cosa) davá rat, i ratésa čhuvéla ke anglatuny rig pe skedyibnáskiri šátra eftá (bitrinéngiro deš) móly;

⁵i shačkirena reca angíl léskire jakhá: a cýpa lákiri mek te xačkirén;

⁶i mek te lel rašáj kiedroskiro veš, i isopo, i thav čiervljonone vylnátyr, i čhurdéla len pe xačkiribnaskire recate;

⁷i mek te vymorel rašáj péskire uribená, i obmorela paniésa péskire masá, i paló davá zadžála dro stáno, i rašáj nažužo javéla ke bel'vél'.

⁸I manúš, savó xačkirdiá reca, mek te vymorel paniésa péskiro uribén i obmorela péskire masá paniésa, i nažužo javéla ke bel'vél';

⁹i tén'či vari-kon žužó mek te skedel recakiri práska (pieplo) i čhuvéla la pal stáno pe žužó štéto, i javéla joj te rakhelpe vaš Izrailjoskire manušénge syr paní te žužakirenpe: davá javéla svénto janybén Ráske-Devléske pal grého;

¹⁰i kon skedyjá recakiri práska (pieplo), mek te vymorel péskiro uribén, i javéla nažužo ke bel'vél'. Mek te javél davá syr viekoskiro uphenybén vaš Izrailjoskire čhavénge, i vaš manušénge, savé javné javire rigátyr, i dživéna ke jone.

¹¹Kon lélape pal saveskire-manušéskiro trúpo, odová javéla nažužo eftá dyvesá.

¹²Jov isyn bangó (musinela) te vyžužakirel dalé paniésa pe tríto dyvés i pe eftáto dyvés, tén'či jov javéla žužó. Ne kóli jov na žužakirela pes pe tríto i pe eftáto dyvés, tedy jov na javéla žužó.

¹³Kažno, kon lélape pal saveskire-manušéskiro trúpo, savó myjá i na vyžužakirdiá pes, magirela Ráskire-Devléskiri šátra; i xasjola odová manúš Izrailjoskire manušéndyr. Pal-dová so jov na sys občhudo žužakiribnaskire paniésa, jov isyn nažužo, isyn léskiri mel pe léste.

¹⁴Ĥáda, isyn zakóno: kóli manúš meréla dre šátra, tedy kažno (sváko), kon javéla dre šátra, i saró, so dre šátra, javéla nažužo eftá dyvesá.

¹⁵Kažno otčhakirdo khoró (sasudo), savó sys nazaphandlo i naučhakirdo denkosa (kryškasa), isyn nažužo.

¹⁶Kažno, kon pe félda lélape pal zamardé-manušeskiri kurtála (miečo), ci pal manušéskire kokalý, ci pal mulykano (grobo), javéla nažužo eftá dyvesá;

¹⁷Vaš nažužeske mek te len zola (práska) dolé shačkirdé sventoné janybnastyr (recatyr) Ráske-Devléske pal grého, i čhuvéna pe léste džidó paní dro khoró,

¹⁸i mek vari-kon te lel žužó isopo, i obmakninela les dro paní, i počhuvela lésa šátra i saré khoré i manušén, savé isyn dre léste, i manušés, savó lyjape pal manušéskiro kokalo, ci ke zamardo, ci ke muló, ci ke mulykanó;

¹⁹i mek te občhuvel žužó manúš nažužes pe tríto dyvés i pe eftáto dyvés, i vyžužakiréla les pe eftáto dyvés; i vymorela jov péskire ídi, i obmorela péskire masá paniésa, i ke bel'vél' javéla žužó.

²⁰Ne kóli vari-kon manušéndyr javéla nažužo i na vyžužakiréla pes, tedy xasjola odová manúš péskire manušéndyr, pal-dová so jov magirdia Ráskire-Devléskiro svénto štéto; žužakiribnaskire paniésa jov na občhudo, jov isyn nažužo.

²¹I mek te javél davá vaš lénge viekoskire uphenybnasa. I manúš, savó občhuvela žužakiribnaskire paniésa, mek te vymorel péskiro ídi i uribén; i kon lélape ke žužakiribnaskiro paní, odová javéla nažužo ke bel'vél'.

²²I saró, ke so lélape nažužo manúš, javéla nažužo; i manúš, savó lélape, javéla nažužo ke bel'vél'.”