Read Biblija - Pe Baltitko Romani čib (Romanes) 2019 Baltic Romani Bible Čysly 2 Bible Online

Čysly 2 - Biblija - Pe Baltitko Romani čib (Romanes) 2019 Baltic Romani Bible bible

Čysly 2

¹I phendiá Raj Devél Mojzáske i Aaronóske dasavé lavá:

²“Izrailjoskire čhavé, kažno (sváko) isyn bangó te čhuvél péskiro stáno pašýl péskiro sciago (znamia), pašýl péskire-čekarjakire špery (znaki); angíl skedyibnáskiri šátra isyn bangé te čhuvén péskiro stáno.

³Anglatuné rigátyr ke vastóko čhuvéna stáno: Judáskire-stanoskiro sciago pir léngire otriády, i barydyró Judáskire čhavéngiro, Naasóno Aminadavóskiro čhavó,

⁴i léskire xaladé, savé zaginé dro léskiro piriginybén, sys eftadešá štar tysjoncy šovšelá;

⁵paló léste čhuvéla stáno Isaharoskiro ródyco, o barydyró čhavéngiro Isaharo Nafanailo, Cuaraskiro čhavó,

⁶i léskire xaladé, savé zaginé dro léskiro piriginybén sys pandždešá štar tysjoncy štaršelá;

⁷duredýr čhuvéla stáno Zavulonoskiro ródyco (čang), i o barydyró Zavulonoskire-čhavéngiro Jeliavo, Xielonoskiro čhavó,

⁸i léskire xaladé, savé zaginé dre léskiro piriginybén, sys pandždešá eftá tysjoncy štaršelá;

⁹saré, savé zaginé dro piriginybén ke Judáskiro stáno sys šel te ohtodešá šov tysjoncy štaršelá, pir léngire otriády; angíl jone sys bangé (musindle) te džán maribnása.

¹⁰Ruvimóskire-stanoskiro sciago sys ke paš-dyvés (jugo) pir léngire otriády, i o barydyró Ruvimóskire-čhavéngiro Jelicuro, Šedeuraskiro čhavó,

¹¹i léskire xaladé, savé zaginé dro léskiro piriginybén, sys štardešá šov tysjoncy pandžšelá;

¹²nádur léstyr čhuvéla stáno Simjoonoskiro (Siemjonoskiro) ródyco, i o barydyró čhavéngiro-Šelumiilo, Curišadoskiro čhavó,

¹³i léskire xaladé, savé zaginé dro léskiro piriginybén, sys pandždešá jeniá tysjoncy trinšelá;

¹⁴Pal lénde javéla Gadoskiro ródyco, i o barydyró Gadóskire-čhavéngiro o Jeliasafo, Rieguiloskiro čhavó,

¹⁵i léskire xaladé, savé zaginé dro léskiro piriginybén, sys štardešá pandž tysjoncy šovšelá pandždešá;

¹⁶saré, savé zaginé dro piriginybén ke Ruvimoskiro stáno, sys šel pandždešá jekh tysjonco štaršelá pandždešá, pir léngire otriády; javír (vtora) jone sys bangé te džán maribnása.

¹⁷Kiéli džála skedyibnáskiri šátra, to Lievitengiro stáno javéla maškirál dre stany. Syr sys terdé, adiáke i sys bangé te džán, kažno pe péskiro štéto pašýl péskire sciagi (znami).

¹⁸Jefriemóskire-stanoskiro sciago sys pir léngire otriády ke zapado, i Jefriemóskire-čhavéngiro barydyró o Jelišamo, Amiudoskiro čhavó,

¹⁹i léskire xaladé, savé zaginé dro léskiro piriginybén, sys štardešá tysjoncy pandžšelá;

²⁰nádur léstyr Manasijáskiro sys ródyco (čang), i Manasijáskire-čhavéngiro barydyró Gamaliilo, Piedacuroskiro čhavó,

²¹i léskire xaladé, savé zaginé dro léskiro piriginybén, sys trijánda duj tysjoncy dujšelá;

²²paló davá Vieniaminoskiro ródyco, i Vieniaminóskire-čhavéngiro barydyró Avidano, Gidieonoskiro čhavó,

²³i léskire xaladé, savé zaginé dro léskiro piriginybén, sys trijánda pandž tysjoncy štaršelá;

²⁴sarén manušén, savé zaginé dro piriginybén ke Jefriemoskiro stáno, sys šel te ohtó (bidujéngiro deš) tysjoncy šelá, pir léngire otriády; trita jone sys bangé te džán maribnása.

²⁵Danóskire-stanoskiro sciago sys ke paš-rat (sieviero) pir léngire otriády, i Danóskire-čhavéngiro barydyró Ahiieziero, Amišadajoskiro čhavó,

²⁶i léskire xaladé, savé zaginé dro léngiro piriginybén, sys šovdešaduj tysjoncy eftašelá;

²⁷nádur léstyr čhuvéla stáno Asiroskiro ródyco, i Asiroskire-čhavéngiro barydyró o Pagiilo, Ohranoskiro čhavó,

²⁸i léskire xaladé, savé zaginé dro léskiro piriginybén, sys štardešá jekh tysjoncy pandžšelá;

²⁹durydyr sys Niefalimoskiro ródyco, i Niefalimoskire-čhavéngiro barydyró o Ahiro, Jenanoskiro čhavó,

³⁰i léskire xaladé, savé zaginé dro léskiro piriginybén, sys pandždešá trin tysjoncy štaršelá;

³¹sarén manušén, savé zaginé dro piriginybén dre Danoskiro stáno, sys šel pandždešá eftá tysjoncy šovšelá; jone sys bangé te džán palatuné (posliednia) pašýl péskire sciagi.

³²Ake, isyn manušá, savé zaginé dre Izrailjoskire-čhavéngiro piriginybén, kažno pir léngire čékarja (siemieistvy). Sarén, kon zagijá dro piriginybén dre stany, pir léngiro otriády, sys šovšelá trin tysency pandžšelá pandždešá.”

³³A Lievíty na zaginé dro piriginybén khetané Izrailjoskire čhavénca, syr phendiá Raj Devél Mojzáske.

³⁴I kerdé saró Izrailjoskire čhavé, so priphendiá Raj Devél Mojzáske: adiáke jone terdjonas stanenca (taborenca) pašýl péskire sciagi, i adiáke giné kažno angíl pir péskiro kher, pir péskire-dadéskire čékarja.