Read Biblija - Pe Baltitko Romani čib (Romanes) 2019 Baltic Romani Bible Čysly 20 Bible Online

Čysly 20 - Biblija - Pe Baltitko Romani čib (Romanes) 2019 Baltic Romani Bible bible

Čysly 20

¹I javné Izrailjoskire čhavé, saró skedyibén, pe čhučí phuv Sin dro pérvo čhon, i terdiné manušá dro Kadieso, i odój myjá Mariam, i odój la garadé.

²I na sys paní vaš manušénge, i skedynépe jone pe Mojzaste i Aaronoste;

³i manušá lyné xoliása te žalinenpe pe Mojzaste i phendlé: “Kóli féni (jekh) te meras tedy i ame, kiéli myné amaré pšála fransendyr angíl Raste-Devléste!

⁴sóske tumé jandlé Ráskire-Devléskiro skedyibén pe daja čhučí phuv, sob (kaj) te meras adáj aménge i amaré kheritkoné murdaleske (skotoske)?

⁵I vaš so tumé vylydžiné amen Jegiptóstyr, sob (kaj) te janén amen pe davá čhučó štéto, kaj naštý ziárki te počhuves dre phuv, nane inžyro, ni vinagrado (drakh), ni granatytka phabá, i adiáke-pac' nane paní vaš pibén?”

⁶I gijá Mójza i Aaróno manušéndyr ke zagiibén dre skedyibnáskiri šátra, i pyné pe péskire muiá, i javdiá lénge Ráskire-Devléskiri sláva.

⁷I phendiá Raj Devél Mojzáske, rakirí:

⁸“Le destó khieningoskiro (žezlo) i skéde manušén, tu i Aaróno, tyró pšal, i phenén dre léngire jakhá bergake, i joj déla péstyr paní: i adiáke tu kerésa lénge paní bergátyr, i paniakiresa manušén i léngire kheritkoné murdalén.”

⁹I lyjá Mójza khieningoskiro destó Ráskire-Devléskire móstyr, syr Jov priphendiá léske.

¹⁰I skedyné Mójza i Aaróno manušén ke bérga, i phendiá jov lénge: “Šunén, manušále, savé na kandéna, naúšto aménge dalé bergátyr te doreses vaš tuménge paní?”

¹¹I ĥazdyjá Mójza péskiro vast i pekadiá dre bérga péskire khieningoskire destesa duj móly, i thadyja zorjása but paní, i piné manušá i léngire kherítka murdalá.

¹²I phendiá Raj Devél Mojzáske i Aaronóske: “Pal dová, so tumé na patiandyné Mánge, sob (kaj) te sykavav Mirí sventyma angíl jakhá Izrailjoskire čhavéngire, tumé na zalydžana adalé manušén pe phuv, saví Me dáva lénge.”

¹³Davá sys paní Mierivakiro, pašýl saví zaginé dre čingárd Izrailjoskire čhavé Rása-Devlésa, i Jov sykadiá lénge Péskiri sventyma.

¹⁴I bičhadiá Mójza Kadiesostyr manušén ke Jedomoskiro králi te phenén: “Adiáke rakiréla tyró pšal, Izrailjo: tu džinésa saró pharipén, savó pyjá pe aménde;

¹⁵dadá amaré piriginé dro Jegípto, i ame dživdiam ke Jegípto baró časo, i fujes kerdé Jegiptiáni aménge i amaré dadénge;

¹⁶i dyjam gódla mangipnasa ke Raj Devél, i šundiá Jov amarí zan (glos), i bičhadiá Jangolós, i Jov vylydžijá amen Jegiptóstyr; i ĥáda, ame som dro Kadieso, fóro pašýl tyró jagóro (krajo).

¹⁷Ame mangasa te mekes amen te prodžas pir tyrí phuv: ame na džása pir féldy i na pir vinagradniki, i ame na javása te pjas paní tyré ĥanyngendyr; ne džása kralískire dromésa, na riskirasa ni pe pravo (čačó), ni pe liévo (zérvo) rig, paka piridžasa miéžy pe tyrí phuv.”

¹⁸Ne Edómo phendiá léske: “Na džá pir mirí phuv, a to me kurtalása (miečosa) vydžava pe túte.”

¹⁹I phendlé gil léske Izrailjoskire čhavé: “Ame džása baré dromésa, i, kóli javása te pjas tyró paní, me i miré kherítka murdalá (miró skoto), tedy me javáva te pleskirav pal léste; jekhe ĥerénca mirenca prodžava, so ničí na mol.”

²⁰Ne jov phendiá: “Tu na prodžasa.” I vygijá pe léste o Edómo buté manušénca i zoralé vastésa.

²¹I adiáke na zakamdiá Edómo te del vólia Izrailjoske te prodžal pir léskiri phuv, i Izrailjo gijá dre rig léstyr.

²²I giné krig Izrailjoskire čhavé Kadiesostyr, i javné saré manušá ke bérga Or.

²³I phendiá Raj Devél Mojzáske i Aaronóske pe bérga Or, pašýl jagóro Edomoskire-phuvjátyr:

²⁴“Mek te pričhuvelpe Aaróno ke péskire manušá; pal-dová so jov na zadžála pe phuv, saví Me dáva Izrailjoskire čhavénge, pal-dová, so tumé na šundlé Miro priphenybén pašýl Mierivakiro paní;

²⁵i le Aaronós i Jelizaros, léskire čhavés, i zalydža len pe bérga Or;

²⁶i le Aaronostyr léskiro uribén i uri dre léste Jelizaros, léskire čhavés, i mek Aaróno te otdžal i jov meréla odój.”

²⁷I kerdiá Mójza adiáke, syr priphendiá Raj Devél. Giné jone pe bérga Oro angíl saré manušéngire jakhá,

²⁸i zlyjá Mójza Aaronostyr léskiro uribén, i uridia dre léste Jelizaros, léskire čhavés. I myjá odój Aaróno pe bergákiro vučipén. A Mójza i Jelizáro giné telé bergátyr.

²⁹I dykhné saré manušá, so Aaróno myjá, i obrovenas Aaronós saró Izrailjoskiro kher trijánda dyvesá.