Read Biblija - Pe Baltitko Romani čib (Romanes) 2019 Baltic Romani Bible Čysly 22 Bible Online

Čysly 22 - Biblija - Pe Baltitko Romani čib (Romanes) 2019 Baltic Romani Bible bible

Čysly 22

¹Tén'ci giné Izrailjoskire čhavé, i terdiné pe Moavoskire loščyny (ravniny), pašýl Iordáno, proti Jerihóno.

²I dykhciá o Valáko, Siepforoskiro čhavó saró, so kerdiá Izrailjo Amoriejenge;

³i drieván dardepe (darándyne) Moavitiani adalé manušéndyr, pal-dová so len sys but, i strahádyne Moavitiani Izrailjoskire čhavéndyr.

⁴I phendlé Moavitiani Madiamoskire phurydyrenge: “Adalé manušá akaná xána saró, so isyn pašýl aménde, syr guruv xála feldytko čar.” O Valáko[5], Siepforoskiro čhavó, sys Moavitianengiro králi dre dolé dyvesá.

⁵I bičhadiá jov manušén ke Valaámo, Vieoroskiro čhavó, dro Pieforo, savó isyn pe reka (len') Jevfrato, pe phuv léskire manušéngire-čhavengiri, sob (kaj) te kharel les i te phenél. “Ĥáda, manušá, savé vyginé Jegiptóstyr, i začhakirde phuvjákiro muj, i dživéna jone nádur mándyr;

⁶i adiáke, jav, prokoš mánge adalé manušén, pal-dová so jone isyn zoraledýr mándyr: saštý (moginéla) te javél, so me tedy javáva dre zor te domarav len, i te vytradav len phuvjátyr, me džinóm, so konés tu bahtiakiresa, odová javéla bahtiakirdó, i konés tu prokošesa, odová javéla prokošnó.”

⁷I giné Moavitianengire phurydyrá i Madiamoskire phurydyrá počastunkenca (darenca) dre vastá pal drabakiriben (magitko butý), i javné ke Valaámo, i piriphendle léske Valakoskire lavá.

⁸I phendiá jov lénge: “Rat'kiren adáj rat, i me dáva tuménge otphenybén, syr phenéla mánge Raj Devél.” I jačnépe Moavitianengiro phurydyrá Valaamoste.

⁹I javdiá Raj Devél ke Valaámo, i phendiá: “Save isyn adalé manušá túte?”

¹⁰O Valaámo phendiá Ráske-Devléske: “O Valáko, Siepforoskiro čhavó, Moavitianengiro králi, bičhadiá len ke me te phenén:

¹¹“Ĥáda, isyn manušá, savé vyginé Jegiptóstyr i začhakirde phuvjákiro muj; i adiáke, jav, prokoš len mánge, saštý (moginéla) te javél, so me tedy javáva dre zor te maravpe lénca i te vytradav len.”

¹²I phendiá Raj Devél Valaamoske: “Na džá lénca, na koš odolé manušén; pal-dová so jone isyn bahtiakirde.”

¹³I uštyjá Valaámo pe ránko, i phendiá Valakoskire thagar'jenge: “Džán pe tumarí phuv; pal-dová so Raj Devél na mekéla man te džav tuménca.”

¹⁴I uštyné Moavitoskire thagárja, i javné ke Valáko, i phendlé léske: “Valaámo na zakamdiá te džal aménca.”

¹⁵Tén'ci Valáko bičhadiá butýr thagar'jen, butýr i slavutnedyr odoléndyr.

¹⁶I javné jone ke Valaámo, i phendlé léske: “Adiáke rakiréla Valáko, Siepforoskiro čhavó: ‘Na otphen te javes ke me;

¹⁷me sykaváva túke bari patýv i keráva túke saró, so tu phenésa mánge. Jav, prokoš mánge adalé manušén.”

¹⁸I otphendiá Valaámo, i phendiá Valakoskire pishar'jénge: “Mek Valáko te del mánge pherdó péskiro kher rup i suvnakái, me naštý (na mogináva) te na kandav miré Ráskire-Devléskiro uphenybén, i te keráv vari-so tyknó, ci baró [pir péskiri godý-r.s.].

¹⁹Akaná, kamen, jačénpe daj i tumé pe rat, i me udžinava, so javír mólo phenéla mánge Raj Devél.”

²⁰I javdiá Devél ratý ke Valaámo, i phendiá léske: “Kóli adalé manušá javné te kharén tut, uštý, džá lénca; ne jekh ker dová, so Me javáva te rakiráv túke.”

²¹Valaámo uštyjá pe zlóko (pe ránko) i gijá Moavitianengire thagar'jenca.

²²I zahačíia Devléskiri xolý pal davá, so jov gijá, i terdijá Ráskire-Devléskiro Jangólo pe drom, sob (kaj) te na domekel les. Jov tradyjá pe peskirjate oslicate, i khetané lésa sys duj léskire dynárja.

²³I dykhciá oslica Ráskire-Devléskire Jangolós, Savó sys terdó pe drom nange kurtalása dro vast, i gijá dre rig oslica droméstyr, i gijá pe félda; a Valaámo lyjá te marel oslica, sob (kaj) te riskirél la pe drom.

²⁴I terdijá Ráskire-Devléskire Jangólo pe venzko (pe tango) drom, maškír vinagradniki, kaj sys jekhe rigátyr vánta i javire rigátyr vánta.

²⁵Oslica, syr dykhciá Ráskire-Devléskire Jangolós, to pritasadiape joj ke vánta, i pritasadia Valaamoskiri ĥerój ke vánta; i jov nevéstyr lyjá te marel la.

²⁶Ráskire-Devléskiro Jangólo nevéstyr pirigija, i terdijá dro tyknó štéto, kaj na sys karik te zdžal, ni pe (čačó) pravo, ni pe (zérvo) liévo rig.

²⁷Oslica, dykhí Ráskire-Devléskire Jangolós, pasijá tel Valaamoste. I zahačíia xolý Valamoskiri, i lyjá jov te marel oslica kaštesa.

²⁸I otphandia Raj Devél uštá oslicake, i joj phendiá Valaamoske: “So me túke kerdjom, so tu marésa man, ĥáda, akaná tríto mólo?”

²⁹Valaámo phendiá oslicake: “Pal-dová, so tu vysandian man; kóli mánde dre vast te javél kurtála, tedy me akaná zamaravas tut.”

³⁰Oslica phendiá Valaamoske: “Ci na me som tyrí oslica, pe savjate tu tradesa anglypnástyr i ke/žýko davá dyvés? Ci kerdjom me adiáke túke? Jov phendiá: “Nad.”

³¹I otčhakirdiá Raj Devél jakhá Valaamoske, i dykhciá jov Ráskire-Devléskire Jangolós, savó sys terdó pe drom kurtalása dre vastá, i poklonindiape, i pyjá pe péskiro muj.

³²I phendiá léske Ráskire-Devléskiro Jangólo: “Pal so tu mardian tyrja oslica, ĥáda, trin móly? Me vygijom, sob (kaj) te terdjovav pe drom túke, pal-dová so drom tyró isyn načačuno angíl Mánde.

³³I oslica, dykhí Man, riskirdiá dre rig Mándyr, ĥáda, trin móly; kóli b joj te na risjol Mándyr, tedy Me zamaravas tut, a la jačkiravas džidia.”

³⁴I phendiá Valaámo Ráskire-Devléskire Jangoloske: “Me kerdjom grého, pal-dová so Me na džindjom, so Tu terdó proti mánde pe drom; i adiáke, kóli davat isyn nakuč dre Tyré jakhá, tedy me risjováva.”

³⁵I phendiá Ráskire-Devléskiro Jangólo Valaamoske: “Džá adalé manušénca, jekh rákir dová, so Me javáva te rakiráv túke.” I gijá Valaámo Valakoskire thagar'jenca.”

³⁶O Valáko, šundiá, so džála Valaámo, vygijá te pirilel les dro Moavitoskiro fóro, savó isyn pe miéža paš Arnono, so isyn pašýl sama štéty pe jagóro (pe krajo).

³⁷I phendiá Valáko Valaamoske: “Ci na bičhadjom me ke tu, te kharén tut? Sóske tu na gíian ke me? Naúšto me pe čačipén naštý (na mogináva) te sykavav patýv túke?”

³⁸I phendiá Valaámo Valakoske: “Dykh, me i javdjom ke tu, ne ci mogináva me vari-so péstyr te phenáv? So čhuvéla Devél dre miré uštá, dová i me javáva te rakiráv.”

³⁹I gijá Valaámo Valakosa, i javné jone dro Kiríaf-Xucofo.

⁴⁰I začhindiá Valáko guruvén i bakrén, i bičhadiá ke Valaámo i ke thagárja, savé sys lésa.

⁴¹Pe javír dyvés pe ránko Valáko lyjá Valaamos i lydžijá les upré pe Vaaloskire vučipená, sob (kaj) jov te dykhél odothýr but manušén trusciál.