Read Biblija - Pe Baltitko Romani čib (Romanes) 2019 Baltic Romani Bible Čysly 23 Bible Online

Čysly 23 - Biblija - Pe Baltitko Romani čib (Romanes) 2019 Baltic Romani Bible bible

Čysly 23

¹Tén'ci phendiá Valaámo Valakoske: “Ker mánge adáj eftá altári, i jan mánge eftá guruvén (tielianten) i eftá bakrén.”

²O Valáko kerdiá adiáke, syr rakirdiá Valaámo, i jandlé vaš svénto otdyibén Ráske-Devléske pir guruvoreste i pir bakreste pe kažno altárjo.

³I phendiá Valaámo Valakoske: “Terdjov pašýl célo shačkiribén tyró, a me džáva; saštý (moginéla) te javél, so Raj Devél vydžála mánge te dykhelpe gil (pe strieč), i so Jov otčhakirla mánge, dová me phenáva túke.” I gijá jov pe vučó štéto.

⁴I dykhciape Devél Valaamosa, i phendiá léske Valaámo: “Eftá altári kerdjom me, i jandjom dro svénto otdyibén pir guruvoreste (tieliantoste) i pir bakreste pe kažno altárjo.”

⁵I čhudiá Raj Devél dre Valaamoskire uštá lav, i phendiá: “Risjov ke Valáko i adiáke phen.”

⁶I risijá jov ke Valáko, i, ake, jov sys terdó pašýl célo shačkiribén péskiro, jov i saré Moavoskire thagárja (kniázi).

⁷I prorakirdia jov péskiri pritča i phendiá: “Miesopotamijatyr, jandiá man o Valáko, Moavoskiro králi, vastočnone bergendyr: ‘iav, prokoš mánge Jakovós, jav, ker fuipén pe Izrailjo!’

⁸Syr te prokošav me? O Devél na prokošela les. Syr te vyphenav fuipén? O Raj Devél na vyphenela pe léste fuipén.

⁹Bergakire vučipnástyr me dykháva les, i bergicendyr pe léste dykháva: ake, manušá dživéna, kon péske rozdiel'nes, i maškír manušénde na ginelape.

¹⁰Kon piriginela Jakovóskiro práho i piriginela Izrailjoskiro štárto paš? Mek te merél miro di čačipnaskire meribnasa, i mek te javél miro meribén syr léngiro!”

¹¹I phendiá o Valáko Valaamoske: “So tu mánca kerésa? Me lyjom tut, sob (kaj) te prokošes miré vergén, a tu, ĥáda, bahtiakiresa len?”

¹²I otphendiá jov i rakirdiá: Ci bangó me som, lav dro lav, te phenáv dová, so čhuvéla Raj Devél dre miré uštá?

¹³I phendiá léske Valáko: “Jav mánca pe javír štéto, savéstyr tu dykhésa len, ne jekh léngiri paš dykhésa, a sarén len na dykhésa; i prokoš len mánge odothýr.”

¹⁴I lyjá les pe félda Cohim, tén'či, pe bergákiro Fastiakiro vučipén, i kerdiá jov eftá altári, i jandiá pe kažno altárjo svénto otdyibén Ráske-Devléske pir guruvoreste i pir bakreste pe kažno altárjo.

¹⁵I phendiá o Valaámo Valakoske: “Terdjov adáj pašýl tyró célo shačkiribén, a me džáva odorík te streninavpe Rása-Devlésa.”

¹⁶I dykhciape Raj Devél Valaamosa, i čhudiá jov lavá dre léskire uštá, i phendiá: “Risjov ke Valáko i odój rákir.”

¹⁷I javdiá ke jov, i, ake, jov sys terdó pašýl péskiro célo shačkiribén, i lésa Moavoskire thagárja. I phendiá léske o Valáko: “So rakirdiá Raj Devél?”

¹⁸Jov vyphendia péskiro primiéro (pritča) i phendiá: “Uštý, Valáko, Siepforooskiro čhavó, šun i zaripir man.

¹⁹Devél isyn na manúš, sob (kaj) Léske te xohavél, i Jov na Manušéskiro čhavó, sob (kaj) Léske te paruvelpe. Ci Jov phenéla, i na skerela? Javéla te rakirél, i na keréla ke kónco/ke jagóro (na spolninela)?

²⁰Ĥáda, lyjom me te bahtiakirav, pal-dová so Jov bahtiakirdiá, i me naštý (na mogináva) te paruvav davá.

²¹Nane dykhno čoripén dre Jakovoste, i nane bicialy bída dro Izrailjo; léskiro Raj Devél, isyn lésa, i trubitko zan léste, syr kralíste;

²²O Devél vylydžijá len Jegiptóstyr, sygnyma léste sys syr šyngaleste (losjoste);

²³Nane čovahaniakiriben dre Jakovoste, i nane drabakiriben dro Izrailjo. Dro péskiro časo phenéna pal Jakovoste i pal Izrailjo: “Ĥáda, so keréla Devél!”

²⁴Ĥáda, manúš syr ščeriha (lievica) uštéla i syr ščer (liévo) ĥazdélape, na pasjola, paka xála doresybén i na p'jela čalés zamardengiro rat.”

²⁵I phendiá Valáko Valaamoske: “Te košes, na koš les, te bahtiakires, na bahtiakir les.”

²⁶I otphendiá Valaámo, i phendiá Valakoske: “Ci na phendjom me túke, so me javáva te keráv saró dová, so phenéla mánge Devél?”

²⁷I phendiá Valáko Valaamoske: “Džá, me láva tut pe javír štéto; saštý (moginéla) te javél, so javéla lačhó Devléske, i odothýr prokošesa mánge les.”

²⁸I lyjá Valáko Valaamos pe Fiegorakiro vučipén, savó sys riskirdo pe čhučí phuv.

²⁹I phendiá Valaámo Valakoske: “Ker mánge adáj eftá altári, i jan mánge adarík eftá guruvorén i eftá bakrén.”

³⁰I kerdiá o Valáko, syr phendiá Valaámo, i jandiá svénto otdyibén (žértva) Ráske-Devléske pir guruvoreste i bakreste pe kažno altárjo.