Read Biblija - Pe Baltitko Romani čib (Romanes) 2019 Baltic Romani Bible Čysly 24 Bible Online

Čysly 24 - Biblija - Pe Baltitko Romani čib (Romanes) 2019 Baltic Romani Bible bible

Čysly 24

¹Valaámo dykhciá, so Ráske-Devléske isyn lačhó te bahtiakirél Izrailjo, i jov na gijá, syr angledýr, vaš čovahaniakiriben, ne risijá péskire mósa ke čhučí phuv.

²I podykhciá Valaámo, i dykhciá Izrailjo, savó sys terdó pir péskire ródycy (čangá), i sys pe léste Devléskiro Dúho (Fáno).

³I vyphendia jov péskiri pritča, i phendiá: “Rakiréla Valaámo, Vieoroskiro čhavó, rakiréla murš otčhakirde jakhasa,

⁴rakiréla o manúš, savó šundiá Devléskire lavá, savó dykhéla Sarezorjakire-Ráskiro Devléskiro sykaibén, peréla, ne jakhá léskire otčhakirde:

⁵savé goža isyn tyré šátry, Jakovo, tyré kherá, Izrailjo!

⁶dind'kirenape jone syr loščyny, syr unty pašýl reka (len'), syr aloitka vešá, savé Raj Devél počhudia, syr kiedry pašýl paní;

⁷čhuvélape paní léskire vedrendyr, i siemjo léskiri javéla syr baré paniá, léskiro králi javéla vučedýr Agagostyr, i javéla slavútno léskiro kralipén.

⁸O Devél vylydžijá les Jegiptóstyr, sygnyma léste syr jekhe šyngaleskireste, jov xála manušén, savé javéna te džán pe léste, rostasavela jov léngire kokalý i péskire maribnytkoné bustienca (strielenca) domarela vergén.

⁹Jov pribandija, isyn paštó syr ščer (liévo) i syr ščeriha, kon ĥazdéla les? Kon bahtiakiréla tut, javéla bahtiakirdó, i kon košela tut, javéla prokošnó!”

¹⁰I zahačíia xolý Valakoskiri pe Valaamoste, i pekadiá jov pes dre vastá, i phendiá Valáko Valaamoske: “Me khardjom tut te prokošes miré vergén, dykh, a tu bahtiakiresa len, dykh, davá isyn tríto mólo;

¹¹i adiáke, prasta tu pe péskiro štéto, me kamdjom túke te sykavav patýv, ne, ake, Raj Devél otkedyja tútyr patýv.”

¹²I phendiá Valaámo Valakoske: “Ci na phendjom me tyré manušénge, savén tu pribičhadian ke me:

¹³“Mek te del mánge Valáko pherdó péskiro kher rup i suvnakái, Me naštý (na mogináva) te piriuštavav Ráskire-Devléskiro priphenybén, sob (kaj) te keráv vari-so lačhipén ci čoripén pir péskiro iló: ne so phenéla Raj Devél, dová i Me javáva te rakiráv?”

¹⁴I adiáke akaná, ĥáda, me džáva ke péskire manušá. Tu džá, me phenáva túke, so keréna adalé manušá tyré manušénca dre palatuné (posliednia) dyvesá.”

¹⁵I rosphendiá péskiri pritča, i phendiá: “Rakiréla Valaámo, Vieoroskiro čhavó, rakiréla murš otčhakirde jakhasa,

¹⁶rakiréla o manúš, savó šunéla Devléskire lavá, savéste isyn dykhibén Naj Vučedyreskire Rástyr-Devléstyr, savó dykhéla Sarezorjakire-Ráskire-Devléskiro sykaibén, peréla, ne léskire jakhá isyn otčhakirde.

¹⁷Me dykháva Les, ne akaná, xaj, les nane, ake, dykháva Les, ne nane Les pašýl. Džála čergen Jakovostyr i ĥazdélape khieningoskiro destó Izrailjostyr, i rozmarela Moavoskiro thagar'jen i xasiakiréla sarén Sifoskire čhavén.

¹⁸Edomosa javéna te xulainen javír manušá, Sieirosa javéna te xulainen léngire vérgi, a Izrailjo sykavéla péskiri zor.

¹⁹Kon bijandjola Jakovostyr, odová zauhtylela i xasiakiréla, so jaciápe foróstyr.”

²⁰I dykhciá jov Amalikos, i prorakirdia péskiri pritča i phendiá: “Anglatunó (pérvo) manušéndyr isyn Amaliko, ne kónco (jagóro) léskiro avela meribén.”

²¹I dykhciá jov Kieniejen, i prorakirdia péskiri pritča, i phendiá: “Zoraló isyn tyró kher, i pe bérga čhudý tyrí gniázda (kúfo);

²²Kaino javéla čororó, i nadluges (naĥara) ke dová, so Asuro zalela tut dro pliéno.”

²³I prorakirdia péskiri pritča, i phendiá: “Bida, kon jačélape džidó, kiéli janéla davá Devél!

²⁴Javéna pármy (korabli) Kitimostyr, i pritasavéna Asuros, i pritasavéna Jevieros; ne i léske [lénge-r.s.] javéla meribén!”

²⁵I uštyjá Valaámo, i gijá pale pe péskiro štéto, a Valáko adiáke-pac' gijá péskire dromésa.