Read Biblija - Pe Baltitko Romani čib (Romanes) 2019 Baltic Romani Bible Čysly 25 Bible Online

Čysly 25 - Biblija - Pe Baltitko Romani čib (Romanes) 2019 Baltic Romani Bible bible

Čysly 25

¹I dživdiá Izrailjo ke Sitimo, i lyné manušá te kerén biladžaipén Moavoskire čhajenca,

²i khardé jone manušén ke péskire-devlengiro svénto janybén, i xané manušá léngiro svénto janybén i mangnepe léngire devlorénge.

³I prijacia Izrailjo ke Vaal-Fiegoro. I zahačíia Ráskire-Devléskiri xolý pe Izrailjo.

⁴I phendiá Raj Devél Mojzáske: “Le manušengiren sarén barydyrén, i ublav len angíl Raste-Devléste angíl kham, i otrisjola Izrailjostyr Ráskire-Devléskiri xolý.”

⁵I phendiá Mójza Izrailjoskire sendar'jenge: “Kažno (sváko) te muliakirél péskire manušén, savé pričhudepe ke Vaalo-Fiegoro.”

⁶I ĥáda, vari-kon Izrailjoskire čhavéndyr javdiá, i jandiá ke péskire pšála Madianitianka, pe Mojzáskire jakhá i pe jakhá Izrailjoskire čhavéngiro pe saró skedyibén, kiéli jone rondlé pašýl skedyibnaskiro zagiibén.

⁷O Finiejeso, čhavó Jelizaroskiro, Aaronóskire-rašaskiro čhavéskiro, dykhí davá, ĥazdyjápe skedyibnaskire manušéndyr, i lyjá dro vast péskiro čhurdybnytko bust (kop'jo),

⁸i gijá jov palál pal Izrail'tianoste, kaj jone sys suté, i propusadia len dujén, Izrail'tianos i džuvliá dre lákiro per: i pirijaciá Izrailjoskire-čhavéngiro meribén.

⁹Manušén, savé myné morovostyr, sys biš te štar tysjoncy.

¹⁰I phendiá Raj Devél Mojzáske dasavé lavá:

¹¹“O Finiejeso, čhavó Jelizaroskiro, Aaronóskire-rašaskiro čhavéskiro, otlydžija Mirí xolý Izrailjoskire čhavéndyr, syr lyjá te zevlynel (te čhuinel nakuč) pir Mánde maškír lénde, i Me na xasiakirdjom Izrailjoskire čhavén dro zevlynypén Miro;

¹²paldavá phen léske: Ĥáda, Me dáva léske Miro zavieto pal ramánjo (miro),’

¹³i javéla jov léske i léskire-čhavéskire rodóske pal léste viekoskire phendlé lavésa (zavietosa) pal rašaipen, pal-dová so jov sykadiá zevlynypén pal péskire Devléste i zaterdija pal Izrailjoskire čhavénde.

¹⁴Lav Izrail'tianinoskiro, savés zamardiá Madianitianka, sys Zimri, Saloskiro čhavó, barydyró Simieonoskire rodóstyr;

¹⁵a lav Madianitiankakiro, savjá zamardé, sys Xazva; joj sys Curaskiri čaj, Omofoskire-barydyreskiri, Madiamoskire kheritkoné rodóstyr (pliemjostyr).

¹⁶I phendiá Raj Devél Mojzáske dasavé lavá:

¹⁷“Pritasaven Madianitianen i marén len,

¹⁸paldavá so jone nakuč kerdé tuménca dro péskiro xohaibén, podlyne tumen Fiegorosa i Xazvasa, Madiamoskire-barydyreskire čhasa, péskire pheniasa, savjá zamardé dro maribnaskiro dyvés pal Fiegoro.”