Read Biblija - Pe Baltitko Romani čib (Romanes) 2019 Baltic Romani Bible Čysly 27 Bible Online

Čysly 27 - Biblija - Pe Baltitko Romani čib (Romanes) 2019 Baltic Romani Bible bible

Čysly 27

¹I javné Salpaadoskire čhaja, Xiefieroskire čhavéskire, Galaadóskire čhavéskire, Mahiroskire čhavéskire, Manasijáskire-čhavéskire strečatyr, Iosifóskire čhavéskiro, i ĥáda, sys léskire-čhajengire lavá: Mahla, Noa, Xogla, Milka i Firca;

²i terdiné jone angíl Mojzaste i angíl Jelizaroste rašaste, i angíl thagar'jende i angíl saró skedyibén, pašýl zagiibén dre skedyibnáskiri šátra, i phendlé:

³“Amaró dad myjá pe čhučí phuv, i jov na sys khetané odolé manušénca, savé skedynépe proti Raste-Devléste khetané Koriejoskire malenca, ne jov pal péskiro grého myjá, i čhavé léste na sys;

⁴pal so te xasjol amaré-dadéskiro lav léskire rodycóstyr, pal-dová so léste nane čhavés? De aménge phuv maškír amaré dadéskire pšalénde.”

⁵I jandiá Mójza léngiro réndo (diélo) angíl Raste-Devléste.

⁶I phendiá Raj Devél Mojzáske:

⁷“Čačipén rakiréna Salpaadoskire čhaja, de lénge mištypnáskiri miéra pir phuv maškír léngire-dadéskire pšalénde i piride lénge léngire dadéskiri phuv, syr meknó mištypén.

⁸I Izrailjoskire čhavénge de te džinén, i phen: ‘Kóli kon meréla, i na sys léste čhavés, tedy piridén léskiri phuv léskire čhake’;

⁹kóli léste nane čha, piridén léskiri phuv léskire pšalénge;

¹⁰kóli nane léste pšalén, otdén léskiri phuv léskire-dadéskire pšalénge;

¹¹kóli nane léskire-dadéskire pšalén, otdén léskiri phuv léskire-pašatuné semencake léskire strečatyr, sob (kaj) joj te javél léste; i mek te javél davá vaš Izrailjoskire čhavénge zalydžino dro Zakóno, syr phendiá Raj Devél Mojzáske.”

¹²I phendiá Raj Devél Mojzáske: “Džá upré pe daja bérga Avarimo, i podykh pe phuv, saví Me dáva Izrailjoskire čhavénge;

¹³i kiéli podykhesa pe láte, prijač ke péskire manušá i tu, syr prijacia Aaróno, tyró pšal;

¹⁴pal-dová so tumé na kandyné Miro rakiribén pe čhučí phuv Sin, dro dová časo, kiéli sys košybén pe skedyibén, sob (kaj) te sykaves angíl léngire jakhá Mirí sventyma pašýl paní Mieriva.”

¹⁵I phendiá Mójza Ráske-Devléske dasavé lavá:

¹⁶“Mek te čhuvél Raj Devél, Savó isyn pe kažno dúho (fáno) dre kažno loč (plot') manušés pe skedyibén;

¹⁷savó vydžála angíl lénde i savó zadžála angíl lénde, savó vylydžala len i savó janéla len, sob (kaj) te na jačélpe Ráskire-Devléskiro skedyibén, syr bakré, savénde nane čhupnaris (pastuhos).”

¹⁸I phendiá Raj Devél Mojzáske: “Le péske Isusós (Johošuas), Navinoskire čhavés, manušés, dre savéste isyn Dúho (Fáno), i čhuv pe léste tyró vast,

¹⁹i čhuv les angíl Jelizaroste, rašaste, i angíl saró skedyibén, i de léske priphenybén angíl léngire jakhá,

²⁰i de léske tyré slavatyr, sob (kaj) te šunél les saró skedyibén Izrailjoskire čhavéndyr;

²¹i javéla jov te terdjol ke Jelizáro rašái, i te phučel léstyr pal léste te del godypén léske, Urimoskire sendosa angíl Raste-Devléste; i pir léskiro lav bangé isyn jone (musinena) te vydžán, i pir léskiro lav bangé te zadžán, jov i saré Izrailjoskire čhavé lésa, i saró skedyibén.”

²²I kerdiá Mójza, syr priphendiá léske Raj Devél, i lyjá Isusós (Johošuas), i čhudiá les angíl Jelizaroste rašaste i angíl saró skedyibén;

²³i čhudiá upré pe léste péskire vastá, i dyjá léske priphenybén, syr rakirdiá Raj Devél pir Mojzaste.