Read Biblija - Pe Baltitko Romani čib (Romanes) 2019 Baltic Romani Bible Čysly 28 Bible Online

Čysly 28 - Biblija - Pe Baltitko Romani čib (Romanes) 2019 Baltic Romani Bible bible

Čysly 28

¹I phendiá Raj Devél Mojzáske, rakirí:

²“Priphen Izrailjoskire čhavénge i phen lénge: ‘Dykhén, sob (kaj) Miro janybén, maró Miro syr svénto janybén Mánge, dro gudló thuv Mánge, te janén Mánge dro péskiro časo.’”

³I phen lénge: “Davá isyn svénto janybén vaš jag, saví tumé san bangé te janén Ráske Devléske: duj bakré jekhe-beršýtka bi došakire pe dyvés, dro célo shačkiribén kažno dyvés.

⁴Jekhe bakrés jan rankosa (zlokosa), a javire bakrés jan bel'velié;

⁵i dro marunó janybén jan déšto paš jefa pšeničnone jaržestyr, pieriemiešyndlo jekhe štartone ginasa vymarde jeliejostyr;

⁶davá-célo shačkiribén pe kažno dyvés, savó kerdó sys pašýl bérga Sinajo, dro gudló thuv, svénto janybén Ráske-Devléske;

⁷i vaš thaduno svénto dyibén pašýl láte te javél jekh štárto gino pe jekhe bakreste: pe svénto štéto ker vyčhuiben, mol (vino) Ráske-Devléske.

⁸Javirés bakrés bel'velié, dasavé marune janybnasa, syr zlokostyr (rankostyr), i dasavé vyčhuibnasa pašýl léste jan les dre svénto janybén, dro gudló thuv, lačhó Ráske-Devléske.

⁹A dro sávato (subóta) janén dujén jekhe-beršytkonen bakrén bi došakiro, i vaš marunó dyibén janén duj-dešengire pašá efatyr pšeničnone jaržestyr, pirimiešyndlo jeliejosa i vyčhuiben pašýl léste:

¹⁰davá-savatoskiro célo shačkiribén dro kažno sávato, butýr kažnoné-dyveseskire celoné shačkiribnastyr i vyčhuiben pašýl léste.

¹¹I dro nevó čhon tumaró, janén célo shačkiribén Ráske-Devléske: baré kheritkoné murdalestyr (skotóstyr) dujén ternen guruvorén, jekhés bakrés i eftá jekhe-beršytkonen bakrén bi došakiro,

¹²i trin dešta pašá efatyr pšeničnone jaržestyr, pirimiešyndlo jeliejosa, dro marunó janybén pe jekhéste guruveste, i duj dešta pašá efatyr pšieničnone jaržestyr, pieriemiešandlo jeliejosa, dro marunó janybén pe bakreste,

¹³i pir déšto paš efatyr pšeničnone jaržestyr, pieriemiešyndlo jeliejosa, dro marunó janybén pe kažnoné bakreste; davá-célo shačkiribén, gudló thuv, svénto janybén, lačhó Ráske-Devléske;

¹⁴i vyčhuiben khetané lénca bangó te javél paš gino mol (vino) pe guruvoreste, jekh tríto paš ginostyr pe bakreste, i jekh štárto paš ginostyr pe bakreste; davá-célo shačkiribén dro kažno nevó čhon dre saré beršýtka čhoná.

¹⁵I jekhés buznés janén Ráske-Devléske dre svénto janybén pal grého: butýr celoné shačkiribnastyr, so pe kažno dyvés tumé san bangé te janén les vyčhuibnasa leskiresa.

¹⁶Dro pérvo čhon, pe dešuštarto čhonéskiro dyvés-Patradí Ráskire-Devléskiri.

¹⁷I pe dešupandžto dyvés dalé-čhonéskiro te javél svénko; eftá (bitrinéngiro deš) dyvesá jone isyn bangé te xan opriesnoki.

¹⁸Pe pérvo dyvés mek te javél tuménde svénto skedyibén, nisaví butý te na kerén;

¹⁹i janén svénto janybén, célo shačkiribén Ráske-Devléske: baré kheritkoné murdalestyr (skotóstyr) duje guruvén, jekhe bakrés i eftá jekhe-beršytkone bakrén; bi došakiro bangé jone te javén tuménde.

²⁰I khetané lénca dro marunó janybén janén pšenično jaržó, pirimiešindlo jeliejosa, trin dešta pašá efatyr pe kažnoné guruveste, i duj dešta pašá efatyr pe bakreste,

²¹i pir déšto paš efatyr jan pe kažnonéste eftá bakréndyr,

²²i jekhe buznés dro svénto dyibén Ráske-Devléske pal grého, vaš žužakiriben tumaró;

²³apríč célo shačkiribén pe ránko (pe zlóko), savó isyn célo shačkiribén kažnoné dyveseskiro.

²⁴Adiáke janén i dro kažno eftá dyveséndyr, davá isyn maró, svénto dyibén, gudló thuv, lačhó Ráske-Devléske; apríč kažnoné-dyveseskiro célo shačkiribén i léskire vyčhuibnastyr, trej te janén davá.

²⁵I pe eftáto dyvés mek te javél tuménde svénto skedyibén; na kerén nisaví butý.

²⁶I dro dyvés, kiéli janéna pérva barjakirdé (plódy) i kiéli janéna Ráske-Devléske nevó marunó janybén dre eftangirja (siedmicy) tumaré, mek te javél tuménde svénto skedyibén; nisaví butý te na kerén;

²⁷i janén célo shačkiribén dro gudló thuv Ráske-Devléske: kheritkoné murdalestyr (baré skotóstyr) dujén guruvorén, jekhe bakrés i eftá jekhe-beršytkone bakrén,

²⁸i vaš lénge dro marunó janybén pšenično jaržó, pieriemiešyndlo jeliejosa, trin dešta pašá efatyr pe kažnoné guruvoreste, duj dešta pašá efatyr pe bakreste,

²⁹i pir déšto paš efatyr pe kažnonéste eftá bakréndyr,

³⁰i jekhe bakrés dre svénto dyibén Ráske-Devléske pal grého, vaš žužakiriben tumaró;

³¹Apríč kažnoné-dyvesytkoneskiro célo shačkiribén i marunó janybén vaš lénge, janén davá Mánge léngire vyčhuibnasa: bi došakiro jone isyn bangé te javén jone tuménde.