Read Biblija - Pe Baltitko Romani čib (Romanes) 2019 Baltic Romani Bible Čysly 30 Bible Online

Čysly 30 - Biblija - Pe Baltitko Romani čib (Romanes) 2019 Baltic Romani Bible bible

Čysly 30

¹I piriphendia Mójza Izrailjoskire čhavénge saró, so rakirdiá Raj Devél Mojzáske.

²I phendiá Mójza barydyrénge pe ródycy Izrailjoskire čhavéndyr: “Ĥáda, so priphendiá Raj Devél:

³‘Kóli vari-kon déla sovél Ráske-Devléske ci sovlahala košybnasa, čhuvi otphenybén pal péskiro di, tedy jov naštý (na musinela) te paruvel péskiro lav, ne jov isyn bangó te kerél saró, so vygijá léskire uštendyr.

⁴Kóli džuvlý déla sovél Ráske-Devléske, i čhuvéla pe péste otphenybén dre péskire-dadéskiro kher, dro péskiro ternypen,

⁵i šunéla dad lákiri sovél i otphenybén, savó joj čhudiá pe péskiro iló, i na phenéla pal dová lákiro dad, tedy saré lákire sovela javéna te terdjon pal láte, i kažno lákiro otphenybén, savó joj čhudiá pe péskiro iló, javéla;

⁶kóli lákiro dad, šundiá, i priphenela láke te na rikirél sovél duredýr, tedy saré lákire sovela i otphenybena, savé joj čhudiá pe péskiro iló, na javéna dre zor, i Raj Devél otmekéla láke, pal-davá so láke zaphendia lákiro dad.

⁷Kóli joj vydžála paloróm, a pe láte lákiri sovél, ci lav lákire uštendyr, savésa joj sphandia pes,

⁸i šunéla lákiro rom, i šuny, ničí na phenéla: tedy lákiri sovél javéla, i lákire otphenybena, savé joj čhudiá pe péskiro iló, javéna;

⁹kóli lákiro rom, šuny, zaphenela láke, i otlydžala lákiri sovél, saví sys pe láte, i lav lákire uštendyr, savénca joj sphandia pes, tedy jone na javéna, i Raj Devél otmekéla láke.

¹⁰Sovél pivliakiri (udovakiri) i džuvliakiri, saví rozlydžijape romesa, savó b joj te na čhuvél otphenybén pe péskiro iló, javéla te rikirelpe.

¹¹Kóli romný dre péskire-romeskiro kher dyjá sovél, ci čhudiá otphenybén pe péskiro iló sovlahasa,

¹²i lákiro rom šundiá, i jov sys štyl pal dová, i na zaphendia láke, tedy saré lákire sovela javéna, i kažno otphenybén, savó joj čhudiá pe péskiro iló, javéla dre zor;

¹³kóli lákiro rom, šuny, otlydžala len, tedy saré, savé vyginé lákire uštendyr lákire sovela i otphenybena lákire iléskire na javéna: lákiro rom otlyja zor léndyr, i Raj Devél otmekéla láke.

¹⁴Kažno sovél i kažno sovláh košybnasa, sob (kaj) te čhuvél teledýr péskiro di, lákiro rom saštý (moginéla) te zoraliakirel, i lákiro rom saštý (moginéla) te otlydžal;

¹⁵kóli lákiro rom na rakirdiá ničý pal dová dyvés, tedy jov dolesa zoraliakirdia saré lákire sovela, i saré lákire sovlahá košybnasa, savé sys pe láte, jov zoraliakirdia, pal-dová so jov, šuny, na rakirdiá pal dová;

¹⁶a kóli otlydžija len, to paló (poslie) dová, syr šundiá, tedy jov lyjá pe péste lákiro grého.

¹⁷Ĥáda, isyn uphenybená, savé Raj Devél priphendiá Mojzáske pal otlydžaiben maškír romeste i léskire romniáte, maškír dadéste i lákire čhate dre lákire terné beršá, dro lákire-dadéskiro kher.