Read Biblija - Pe Baltitko Romani čib (Romanes) 2019 Baltic Romani Bible Čysly 31 Bible Online

Čysly 31 - Biblija - Pe Baltitko Romani čib (Romanes) 2019 Baltic Romani Bible bible

Čysly 31

¹I phendiá Raj Devél Mojzáske, rakirí:

²“Otha pale Madianitianenge pal Izrailjoskire čhavénde, i paló (poslie) dová otdžasa ke tyré manušá.”

³I phendiá Mójza manušénge: “Skedén péstyr manušén pe maribén, sob (kaj) jone te džán pe Madianitianende, te kerén séndo Ráskiro-Devléskiro pe Madianitianende;

⁴pir tysjonco rodycóstyr, kažnoné Izrailjoskire rodycendyr bičhaven pe maribén.

⁵I sys vykedyno Izrailjoskire tysjoncendyr, pir tysjonco rodycóstyr, dešudúj tysjoncy skedyné manušén pe maribén.

⁶I bičhadiá len Mójza pe maribén, pir tysjonco rodycóstyr, len i Finiejesos, rašaskire Jelizaroskire čhavés pe maribén, i dre léskiro vast sys svénta khoré (sasúdy) i rógi (truby) vaš signalo.

⁷I giné maribnása pe Madianitianende, syr priphendiá Raj Devél Mojzáske, i domardé saré muršén;

⁸i khetané léngire zamardenca jone muliakikirde Madiamoskire kral'jén: Jevijos, Riekiemas, Curas, Xuras i Rievas, pandžé Madiamoskire kral'jén, i Valaamos, Vieoroskire čhavés, zamardé kurtalása;

⁹a Madiamoskire džuvlién i léngire čhavén lyné dro pliéno, i saré léngire kheritkoné murdalén (skoto), i saré léngire stády i saró léngiro majonko lyné dro doresybén,

¹⁰i saré léngire fórja i saré léngire foricy shačkirdé jagása;

¹¹i lyné saró, so zakedyne i saró barvalypén, manušéstyr ke kherítka murdalá (skoto);

¹²i jandlé plienonen i doresybén i saró, so zakedyne ke Mójza i ke rašáj Jelizáro i ke Izrailjoskire-čhavéngiro skedyibén, ke stáno, pe Moavitoskire loščyny (ravniny), so isyn pašýl Iordáno proti Jerihóno.

¹³I vyginé Mójza, i rašáj Jelizáro, i saré thagárja skedyibnástyr te pirilen len stanostyr.

¹⁴I xoliásyja Mójza pe xaladéngire barydyrende, tysjoncengire barydyrende i šelengire barydyrende, savé javné maribnastyr,

¹⁵i phendiá lénge Mójza: “Vaš so tumé mekné džiden sarén džuvlién?

¹⁶Ake, jone, pir Valaamoskiro godypén, sys vaš Izrailjoskire čhavénge lydžaibnasa te otdžan Rástyr-Devléstyr pir Fiegoroste, pal so i xasiakiriben sys dro Ráskire-Devléskiro skedyibén;

¹⁷i adiáke zamarén sarén čhavorén, i sarén džuvlién, savé udžindlé muršés pe romeskiro čhuibén, zamarén (muliakirén);

¹⁸a sarén patyvalé tyrne džuvlién, savé na udžindlé muršeskiro čhuibén, jačkiren vaš péske;

¹⁹i javén pal stáno eftá dyvesá; kažno (sváko), kon zamarela manušés i lélape pal zamardeste, te žužakirelpe pe tríto dyvés i pe eftáto dyvés, tumé i tumaré manušá dro pliéno;

²⁰i saré uribená, i saré cypitka rizy, i saró, so isyn kerdó buzniengire vylnátyr, i saré kaštune khoré (sasúdy) vyžužakiren.”

²¹I phendiá rašáj Jelizáro xaladenge, savé psirdé pe maribén: “Ĥáda, isyn Zakonoskiro uphenybén, savó priphendiá Raj Devél Mojzáske:

²²Suvnakái, rup, xarkóma (mied'), sastýr, muslovi (volyvo) i molovi (svinco),

²³i saró, so prodžála pir jag, prolydžan pir jag, sob (kaj) jov te vyžužakirelpe, a apríč davá žužakiribnaskire paniésa tumé san bangé (musinena) te vyžužakiren; saró, so na prodžála pir jag, prolydžan pir paní;

²⁴i tumaré uribená vymoren pe eftáto dyvés, i vyžužakirenpe, i paló davá zadžán dro stáno.”

²⁵I phendiá Raj Devél Mojzáske, rakirí:

²⁶“Pirigin čordo doresybén, savó lyné dro pliéno, manušéstyr ke kherítko murdál, tu i rašáj Jelizáro [Jelieazaro-r.s.] i barydyrá skedyibnástyr;

²⁷i roskeren čordo doresybén pe duj pašá maškír manušénde, savé mardépe, psirdé pe maribén, i maškír saró skedyibén;

²⁸i xaladendyr, savé psirdé pe maribén, le dan' Ráske-Devléske, pir jekh di pandžešelendyr, manušéndyr i baré kheritkoné murdaléndyr (skotóstyr), i oslendyr i tykné kheritkoné murdaléndyr;

²⁹le davá léngire pašatyr i otdé rašáske Jelizaroske dre svénto otdyibén ĥazdypnasa Ráske-Devléske;

³⁰i Izrailjoskire čhavéngire pašatyr le pir jekhe manušéste (miéra) pandždeše manušéndyr, baré murdaléndyr, pir jekh šeró oslendyr i tykné kheritkoné murdaléndyr, i otdé davá Lieviténge, savé dynarinena pašýl Ráskire-Devléskiri šátra.”

³¹I kerdé Mójza i Jelizáro, rašái, syr priphendiá Raj Devél Mojzáske.

³²I sys čordo doresybén, savó jaciápe doresybnastyr, so zakedyne manuše, savé sys pe maribén: tykné kherítka murdalá šovšelá eftadešá pandž tysjoncy,

³³baré kherítka murdalá eftadešá duj tysjoncy,

³⁴oslen šovdešá jekh tysjonco,

³⁵manušén, džuvlién, savé na džindlé muršeskiro čhuibén, sarengire dijá sys trijánda duj tysjoncy.

³⁶Paš bažyn manušéngiri, savé psirdé pe maribén, pir rozginyben sys: tykné kheritkoné murdalén trinšelá trijánda eftá tysjoncy pandžšelá,

³⁷i dan' Ráske-Devléske tykné kheritkoné murdaléndyr sys šovšelá eftadešá pandž;

³⁸baré kheritkoné murdalén trijánda šov tysjoncy, i léndyr dan' Ráske-Devléske eftadešá duj;

³⁹oslen trijánda tysjoncy pandžšelá, i léndyr dan' Ráske-Devléske šovdešá jekh;

⁴⁰manušén dešušov tysjoncy, i léndyr dan' Ráske-Devléske trijánda duj dijá.

⁴¹I otdyjá Mójza dan', svénto otdyibén Ĥazdypnasa Ráske-Devléske, rašáske Jelizaroske, syr priphendiá Raj Devél Mojzáske.

⁴²I Izrailjoskire-čhavéngire pašatyr, savó roskerdiá Mójza manušéndyr, savé sys pe maribén;

⁴³paš, saví sys pe skedyibnáskiri bažyn: tykné kherítka murdalá sys trinšelá trijandaefta tysjoncy pandžšelá,

⁴⁴baré kherítka murdalá sys trijánda šov tysjoncy,

⁴⁵oslen trijánda tysjoncy pandžšelá,

⁴⁶manušén dešušov tysjoncy.

⁴⁷Izrailjoskire-čhavéngire pašatyr Mójza lyjá jekh pandždeštona paš manušéndyr i kheritkoné murdaléndyr, i otdyjá davá Lieviténge, savé dynarinénas (služynénas) pašýl Ráskire-Devléskiri šátra, syr priphendiá Raj Devél Mojzáske.

⁴⁸I javné ke Mójza tysjoncengire barydyrá pe xaladénde, tysjoncengire barydyrá i šelengire barydyrá,

⁴⁹i phendlé Mojzáske: “Tyré pishárja pirigindle xaladén, savén aménge otdyné, i na gijá krig nijékh améndyr [léndyr — r.s];

⁵⁰i ĥáda, ame jandiam [ianasa-ju.o.] svénto dyibén Ráske-Devléske, kon so doresciá suvnakuné darendyr: zandirorja (lancužki), vastytka (kore), angrustiá, čenia i kulony te žužakiras dijá amaré angíl Raste-Devléste.”

⁵¹I lyné léndyr Mójza i rašáj Jelizáro suvnakáj dre saré dalé dróga priedmiety;

⁵²i sys saró suvnakái, savó jandlé dre svénto dyibén ĥazdypnasa Ráske-Devléske, dešušov tysjoncy eftašelá pandždešá šékieli, tysjoncengire barydyrendyr i šelengire barydyrendyr.

⁵³Haladé čorde, kažno (sváko) vaš péske.

⁵⁴I lyné Mójza i rašáj Jelizáro suvnakáj tysjoncengire barydyrendyr i šelengire barydyrendyr, i jandlé les dre skedyibnáskiri šátra, dro ripiribén Izrailjoskire-čhavéngiro, angíl Raste-Devléste.