Read Biblija - Pe Baltitko Romani čib (Romanes) 2019 Baltic Romani Bible Čysly 33 Bible Online

Čysly 33 - Biblija - Pe Baltitko Romani čib (Romanes) 2019 Baltic Romani Bible bible

Čysly 33

¹Ĥáda, isyn Izrailjoskire-čhavéngire dromá [stany-r.s.], savénca giné jone Jegiptóskire phuvjátyr pir péskire otriády, tel barydyrende Mojzaste i Aaronoste.

²O Mójza, pir Ráskire-Devléskiro priphenybén, začhindiá léngire dromá, syr giné jone pir léngire dromá stanenca, i, ĥáda, isyn léngiro drom i, kaj jone sys terdé:

³Raamsesostyr giné jone dro pérvo čhon, pe dešupandžto dyvés pervoné čhonéskiro; pe javír dyvés, Patradí, vyginé Izrailjoskire čhavé tel vučó vast angíl saré Jegiptóskire jakhá;

⁴dre dová časo Jegiptiáni ĥaradé sarén anglatunen čhavorén, savén xasiakirdiá lénde Raj Devél, i pe léngire devlorende Raj Devél kerdiá séndo.

⁵I adiáke giné Izrailjoskire čhavé Raamsesostyr i terdiné stanósa (taborosa) dro Sokhofo.

⁶I giné Sokhofostyr, i terdiné stanósa dro Jefamo, so pe čhučé-phuvjákiro jagóro (krajo).

⁷I giné Jefamostyr, i riskirdé ke Pi-Gahirofo, so isyn angíl Vaal-Cefonomo, i terdiné stanósa angíl Migdolomo.

⁸Tén'ci giné jone Pi-Gahirofostyr, proginé maškirál mórjo (derjáv) pe čhučí phuv, i giné trin dyvesá dromésa čhučé phuvjákire Jefamosa, i terdiné stanósa dre Miéra [Mara-ju.o.].

⁹I giné Mieratyr, i javné dro Jelimo; dro Jelimo sys dešudúj štéty ĥanyngenca, katýr džála paní i eftadešá finikitka drevy, i terdiné odój stanósa.

¹⁰I giné Jelimostyr, i terdiné stanósa pašýl Loló mórjo (derjáv).

¹¹I giné jone Lolé morjostyr (derjavestyr), i terdiné stanósa pe čhučí phuv Sin.

¹²I giné čhučé phuvjátyr Sin, i terdiné stanósa dre Dofka.

¹³I giné jone Dofkatyr, i terdiné stanósa dro Alušo.

¹⁴I giné Alušostyr, i terdiné stanósa dro Riefidimo, i na sys odój paní, sob (kaj) te p'jen manušá.

¹⁵I giné Riefidimostyr, i terdiné stanósa pe čhučí phuv Sinajoskiri.

¹⁶I giné Sinajoskire čhučé phuvjátyr i terdiné stanósa dro Kibrot-Gataava.

¹⁷I giné Kibrot-Gataavatyr, i terdiné stanósa dro Asirofo.

¹⁸I giné Asirofostyr, i terdiné stanósa dre Rifma.

¹⁹I giné Rifmatyr, i terdiné stanósa dro Rimnon-Farieco.

²⁰I giné Rimnon-Fariecostyr, i terdiné stanósa dre Livna.

²¹I giné Livnatyr i terdiné stanósa dre Risa.

²²I giné Risatyr, i terdiné stanósa dro Kiegielafo.

²³I giné Kiegielafostyr i terdiné stanósa pe bérga Šafier.

²⁴I giné Šafierostyr i terdiné stanósa dre Xarada.

²⁵I giné Xaradatyr i terdiné stanósa dro Makielofo.

²⁶I giné Makielofostyr i terdiné stanósa dro Tahafo.

²⁷I giné Tahafostyr i terdiné stanósa dro Taraho.

²⁸I giné Tarahostyr i terdiné stanósa dre Mafka.

²⁹I giné Mifkatyr i terdiné stanósa dre Xašmona.

³⁰I giné Xašmonatyr i terdiné stanósa dro Masierofo.

³¹I giné Masierofostyr i terdiné stanósa dre Bienie-Jaakana.

³²I giné Bienie-Jaakanatyr i terdiné stanósa dro Xor-Agidgado.

³³I giné Xor-Agidgadostyr i terdiné stanósa dre Iotvafa.

³⁴I giné Iotvafatyr i terdiné stanósa dro Avrono.

³⁵I giné Avronostyr i terdiné stanósa dro Jecyon-Gaviero.

³⁶I giné Jecion-Gavierostyr i terdiné stanósa pe čhučí phuv Sin, joj adiáke-pac' kharélape Kadieso.

³⁷I giné Kadiesostyr i terdiné stanósa pe bérga Oro, pašýl Edomoskire-phuvjákiro jagóro (miéža).

³⁸I gijá upré rašáj Aaróno pe bérga pir Ráskire-Devléskiro priphenybén, i myjá odój dro štardešytko berš paló davá, syr Izrailjoskire čhavé javné Jegiptóskire phuvjátyr, dro pándžto čhon, dro pérvo-čhonéskiro dyvés;

³⁹Aaronóske sys šel te biš te trin berš, kiéli myjá jov pe bérga Or.

⁴⁰Hanaanoskiro králi Arada, savó dživdiá ke paš-dyvés (jugo) Xanaanskone phuvjátyr, šundiá, so džána Izrailjoskire čhavé.

⁴¹I giné jone bergátyr Or i terdiné stanósa dre Salmona.

⁴²I giné Salmonatyr i terdiné stanósa dro Punono.

⁴³I giné Punonostyr i terdiné stanósa dro Ovofo.

⁴⁴I giné Ovofostyr i terdiné stanósa dre Iie Avarimo [Iimo-r.s.], pe Moavoskiro jagóro (miéža).

⁴⁵I giné Iimostyr i terdiné stanósa dro Divon-Gado.

⁴⁶I giné Divon-Gadostyr i terdiné stanósa dro Almon-Divlafaimo.

⁴⁷I giné Almon-Divlafaimostyr i terdiné stanósa pe Avarimoskire bérgi angíl Nievo.

⁴⁸I giné Avarimoskire bergendyr i terdiné stanósa pe Moavitoskire loščyny (ravniny) pašýl Iordáno, proti Jerihóno;

⁴⁹jone terdiné stanósa pašýl Iordáno Bief-Ješimofostyr ke Avie-Sitimo pe Moavitoskire loščyny.

⁵⁰I phendiá Raj Devél Mojzáske pe Moavitoskire loščyny pašýl Iordáno, proti Jerihóno dasavé lavá:

⁵¹“Rákir Izrailjoskire čhavénge i phen lénge: ‘Kiéli piridžana tumé pir Iordáno pe Xanaanóskiri phuv,

⁵²tedy tradén krig péstyr sarén adalé-phuvjákire manušén, i xasiakirén saré léngire vyčhindlé muiá, i xasiakirén saré léngire vyčhudé ídoly, i saré léngire vučipená rosphagiren.

⁵³I len péske daja phuv, i dživén pe láte, pal-dová so Me dáva tuménge daja phuv;

⁵⁴i rozden phuv pir žriébijo syr meknó mištypén tumaré kheritkoné rodénge: kóli baredýr, to ródo den butýr mištypnáskiri miéra, a tyknedýr ródo, to de tyknedýr mištypnáskiri miéra; konéske kaj vydžála, odój léske i javéla mištypnáskiri miéra; pir tumaré-dadéngiro ródo len péske mištypnáskiri miéra;

⁵⁵kóli tumé na vytradena krig péstyr adalé-phuvjákire manušén, to tedy, savé jačénape léndyr manušá, javéna syr phusadé xrústy vaš tumaré jakhá i suv'jenca vaš tumaré pašvare i javéna te stasaven tumen pe phuv, pe saví tumé javéna te dživén,

⁵⁶i tedy, so Me skedyjompe lénge te keráv, keráva tuménge.”