Read Biblija - Pe Baltitko Romani čib (Romanes) 2019 Baltic Romani Bible Čysly 35 Bible Online

Čysly 35 - Biblija - Pe Baltitko Romani čib (Romanes) 2019 Baltic Romani Bible bible

Čysly 35

¹I phendiá Raj Devél Mojzáske pe Moavitoskire loščyny (ravniny) pašýl Iordáno proti Jerihóno, rakirí:

²“Priphen Izrailjoskire čhavénge, sob (kaj) jone péskire mištypnaskire mieratyr te den Lieviténge fórja, sob (kaj) jone odój te dživén, i féldy pašýl fórja saré rigéndyr te den Lieviténge:

³fórja lénge javéna vaš džiibén, i féldy javéna vaš léngire kheritkoné murdalénge (vaš skoto), i vaš léngiro majonko, i vaš saró, so lénge trej vaš džiibén;

⁴féldy pašýl fórja, savé tumé san bangé te den Lieviténge, foróskire vantatyr bangé te javén pe duj tysjoncy kuniá, dre saré rigá;

⁵i otmierinen paló fóro ke vastokoskiri rig duj tysjoncy kuniá, i ke paš-dyvesýtko (južno) rig duj tysjoncy kuniá, i ke zapado duj tysjoncy kuniá, i ke paš-ratítko (sievierno) rig duj tysjoncy kuniá, a maškirál te javél fóro: dasavé javéna lénde féldy pašýl fórja.

⁶For'jéndyr, savé tumé déna Lieviténge, javéna šov fórja vaš zrakhibén, dre savé tumé déna saštypen (šanso) te našél zamaribnariske; i butýr léndyr den štardešá duj fórja:

⁷saré fórja, savé tumé bangé te den Lieviténge, javéla štardešá ohtó fórja, feldenca, savé javéna pašeyl lénde.

⁸I kiéli javéna te den fórja Izrailjoskire čhavéngire mištypnaskire mieratyr, tedy barestyr den butýr, tyknestyr tyknedýr; kažno ródyco, dykhí pir mištypnáskiri miéra, saví doreséna, isyn bangé (musinena) te den fórja péskire for'jéndyr Lieviténge.”

⁹I phendiá Raj Devél Mojzáske dasavé lavá:

¹⁰“De te džinén Izrailjoskire čhavénge i phen lénge: ‘Kiéli tumé piridžana pir Iordáno pe Xanaanóskiri phuv,

¹¹vykeden péske fórja, savé javéna tuménde for'jenca vaš zrakhibén, karik moginéla te našél zamaribnari, savó muliakirdiá manušés nakami;

¹²i javéna lénde [tuménde-r.s.] dalé fórja vaš zrakhibén manušénge, savé tuménde kamenas te othan pale (te otomstinen), sob (kaj) te na javél zamaribnari-manúš, savó muliakirdiá, angledýr, syr jov javéla angíl manušénde pe séndo.

¹³Fórja, savé tuménge trej te den, fórja vaš zrakhibén, isyn bangé te javél tuménde šov:

¹⁴trin fórja den pir daja Iordanoskiri rig i trin fórja den pe Xanaanóskiri phuv; znašybnaskire for'jenca vaš našaiben bangé te javén jone;

¹⁵vaš Izrailjoskire čhavénge, i vaš manušéske, savó javdiá javire rigátyr, i vaš manušéske, savó dživéla maškír tuménde, javéna dalé šov fórja vaš zrakhibén, sob (kaj) te našél odorík kažno (sváko) manúš, savó zamardiá (muliakirdiá) manušés nakami.

¹⁶Kóli kon pekavela vari-konés sastruné strumientosa, adiáke, so odová manúš meréla, — tedy jov isyn zamaribnari: les isyn bangé (musinena) te otdén pe meribén;

¹⁷i kóli vari-kon pekavela javirés baresa dro vast, sóstyr saštý te meres adiáke, so odová manúš meréla, — tedy jov isyn zamaribnari: les bangé te otdén pe meribén;

¹⁸cji, kóli vari-kon kaštune strumientosa pekavela javirés, savéstyr saštý te meres, i pekavela vastésa adiáke, so odová manúš meréla, — tedy jov isyn zamaribnari: les bangé te otdén pe meribén;

¹⁹manúš, savó kaméla te othal pale pal rat, kokoró saštý (moginéla) te muliakirél zamaribnaris: syr les féni (tóka) pirilela, kokoró saštý (moginéla) te muliakirél les;

²⁰kóli vari-kon pihninela (špulela) vari-konés pir xolý, ci kami čhurdéla pe léste vari-so adiáke, so odová manúš meréla,

²¹ci dro košybén pekavela les vastésa adiáke, so odová manúš meréla: tedy odolés manušés, savó pekadiá, manušá isyn bangé (musinena) te otdén pe meribén, — jov isyn zamaribnari; manúš, savó othala pale pal rat saštý (moginéla) te muliakirél zamaribnaris, syr les pirilela.

²²Kóli jov pihninela (špulela) les nakami, bi košybnaskiro, ci čhurdéla pe léste vari-so, nakami,

²³ci vari-savó bar, savéstyr saštý te meres, nadykhi čhurdéla pe léste adiáke, so odová meréla, ne jov na sys léskire vergosa i na kamdiá léske fuipén,

²⁴to tedy manušéngiro skedyibén isyn bangó (musinela) te kerél séndo maškír zamaribnariste i manušéste, savó kaméla te othal pale pal rat pir saró uphenybén.

²⁵I manušéngire skedyibnaske trej te zrakhél zamaribnaris manušytkoné vastéstyr, savó kaméla te othal pale pal rat, i skedyibén isyn bangó les te riskirél dro léskiro fóro, kaj jov sys dro našyben, karik jov nastiá, sob (kaj) jov odój te dživél ke baré-rašaskiro meribén, savó sys makhno sventoné jeliejosa;

²⁶kóli manúš, savó zamardiá, vydžála pal fóro, dre savó jov sys dro našyben, dro savó jov nastiá,

²⁷i lathéla les manúš, savó kaméla te othal pale pal rat na dro léskiro fóro, kaj jov sys dro našyben, i muliakiréla adales manušés, kon zamardiá kodolé zamaribnaris, tedy na javéla pe léste bang pal rateskiro pročhuiben,

²⁸pal-dová so odová sys bangó (léske treindiá) te dživél dro péskiro fóro, kaj jov sys dro našyben ke baré-rašaskiro meribén, a kiéli meréla baró rašái, to manúš, savó zamardiá, sys bangó te risjol pe péskiri phuv.

²⁹Mek davá mek te javél tuménde čhudé zakonosa (statutosa) dre tumaré ródy, dre saré tumaré kherá.

³⁰Kóli vari-kon zamarela manušés, tedy odolé manušés, isyn bangé te zamares pir manušéngire lavá, savé dykhné; ne jekhe jakhitkones (svidietieljos) nauhtylla (nadósi), sob (kaj) te sendiakiren les pe meribén.

³¹I na len vykinybén pal zamaribnaskiro di, savó isyn bangó te merél, ne les trej te otdes meribnáske;

³²i na len vykinybén pal manušéste, savó nastiá dro zrakhibnaskiro fóro, sob (kaj) léske te des saštypen te dživél pe péskiri phuv angledýr, syr meréla baró rašái.

³³Na magirén phuv, pe saví tumé javéna te dživén; pal-dová so rat magirela phuv, i phuv na žužakirelape pe javír (javirčanes) ratestyr, savó sys pročhudo pe láte, syr ratésa, savó pročhudia les.

³⁴Tumé naštý te magirén phuv, pe saví tumé dživéna, maškír saví som Me: pal-dová so Me Raj Devél dživáva maškír Izrailjoskire čhavénde.’”