Read Biblija - Pe Baltitko Romani čib (Romanes) 2019 Baltic Romani Bible Čysly 36 Bible Online

Čysly 36 - Biblija - Pe Baltitko Romani čib (Romanes) 2019 Baltic Romani Bible bible

Čysly 36

¹Javné phurydyrá dadengíre Galaadóskire-čhavéngire kheritkoné rodóstyr, Mahiroskire čhavéskire, Manasijáskire-čhavéskire Iosifóskire čhavéngire rodycóstyr, i rakirdé angíl Mojzaste i angíl thagar'jende, Izrailjoskire-čhavéngire barydyrende pe stréčy (pokolienii),

²i phendlé: “O Raj Devél priphendiá amaré ráske te des phuv dre mekné-mištypnáskiri miéra Izrailjoskire čhavénge pir žriébijo i amaré ráske phendló Rástyr-Devléstyr te des mištypnáskiri miéra Salpaadoskiri, amaré pšaleskiri, léskire čhajenge;

³kóli jone javéna čhavéngire džuvliénca vari-savé javire Izrailjoskire čhavéngire-rodycóstyr, tedy léngire-mištypnáskiri miéra otlelape amaré dadengíre-mištypnaskire mieratyr i pričhuvelape dolé rodycóske mištypnáskiri miéra, dre saví jone javéna, i otlelape doléstyr, so doiaciape pir žriébijo amaré mištypnaskire mieratyr.

⁴I kiéli javéla Izrailjoskire-čhavénde svénko, tedy léngiri mištypnáskiri miéra pričhuvelape ke dolé-rodycoskiri mištypnáskiri miéra, dre saví jone javéna, i mištypnáskiri miéra amaré-dadengíre rodycóstyr otlelape léngiri mištypnáskiri miéra.”

⁵I dyjá Mójza priphenybén Izrailjoskire čhavénge, pir Ráskire-Devléskiro lav, i phendiá: “Čačipén rakiréla Iosifóskire-(Jozaskiro) čhavéngiro ródyco.

⁶Ĥáda, so rakiréla Raj Devél pal Salpaadoskire čhajende: jone saštý (moginéna) te javén dolengire džuvliénca, kon isyn pir iló léngire jakhenge, jekh (féni) so jone isyn bangé te javén džuvliénca pir ródyco dre péskire dadéskire kherítko ródo (pliemjo), sob (kaj) čhavé Izrailjoskire te prilén meknó mištypén, kažno péskire dadendyr,

⁷sob (kaj) Izrailjoskire-čhavengiri mištypnáskiri miéra mekné mištypnástyr te na piridžal rodycóstyr dro ródyco; pal-dová so kažno (sváko) Izrailjoskire čhavéndyr isyn bangó te javél priphandlo ke péskire-dadengíre rodycoskiri miéra (phuv) mekné mištypnástyr.

⁸I kažno čhaj, savjake trej mištypnáskiri miéra dre Izrailjoskire-čhavéngiro ródyco, isyn bangi te javél džuvliása vari-koneskires péskire dadéskire rodycóstyr pir kherítko ródo, sob (kaj) čhavé Izrailjoskire te prilel meknó mištypén pir kažno (sváko) miéra,

⁹i, sob (kaj) te na piridžal mištypnáskiri miéra rodycóstyr dre javír ródyco; pal-dová so kažno Izrailjoskire čhavéngire rodycóstyr isyn bangó te javél priphandlo ke péskiri mištypnáskiri miéra.”

¹⁰Syr priphendiá Raj Devél Mojzáske, adiáke i kerdé Salpaadoskire čhaja.

¹¹I vyginé Salpaadoskire čhaja Mahla, Firca, Xogla, Milka i Noa paloróm pal léngire-kakengire čhavénde.

¹²Jone sys džuvliá pir kherítko ródo Manasijáskire-čhavéngiro, Iosifóskire čhavéskire, i jaciápe léngiri mištypnáskiri miéra dre léngire-dadéskire rodycoskiro kherítko ródo.

¹³Davá isyn priphenybená i uphenybená, savé dyjá Raj Devél Izrailjoskire čhavénge pir Mojzaste pe Moavitoskire loščyny (ravniny), pašýl Iordáno, proti Jerihóno.