Read Biblija - Pe Baltitko Romani čib (Romanes) 2019 Baltic Romani Bible Čysly 7 Bible Online

Čysly 7 - Biblija - Pe Baltitko Romani čib (Romanes) 2019 Baltic Romani Bible bible

Čysly 7

¹Kiéli Mójza čhudiá šátra (skínija), i pomakhcia la, i obsvencyndia la i altárjo, i saró, so trej vaš léske, i pomakhcia len i obsvencindia len,

²to javné Izrailjoskire barydyrá, šeralé léngire čekar'jendyr (semieistvendyr), barydyrá pe ródycy, savé piriginenas, i jone jandlé svénta dyibená[2],

³i jandlé péskire dáry angíl Raste-Devléste, šov začhakirde ĥliaby (povozki) i dešudúj guruvén, pir jekh ĥliabo dujendyr barydyrendyr i pir jekhe guruveste kažnoné manušéstyr, i čhudé davá saró angíl šátra (skínija).

⁴I phendiá Raj Devél Mojzáske dasavé lavá:

⁵“Le davá léndyr, davá javéla trej, sob (kaj) te kerén butiá pašýl skedyibnáskiri šátra; i otdé davá Lieviténge, dykhí pir léngiri butý.”

⁶I lyjá Mójza ĥliaby i guruvén, i dyjá len Lieviténge:

⁷duj ĥliaby i štaren guruvén dyjá Girsonoskire čhavénge pir léngiri butý:

⁸i štar vurdená i ohtó (bidujéngiro deš) guruvén dyjá Mierariskire čhavénge pir léngiri butý, tel Ifamaróskiro dykhibén, Aaronóskire-čhavéskire, savó sys rašái;

⁹a Kaafoskire čhavénge na dyjá, pal-dová so butý léngiri sys te lydžán svénto štéto — pe psiké jone sys bangé te lydžán.

¹⁰I jandlé barydyrá svénto dyibén vaš altárjo te obsvencynen les dre léskiro makhibnaskiro dyvés, i čhudé barydyrá péskiro janybén angíl altárjo.

¹¹I phendiá Raj Devél Mojzáske: “Pir jekhe barydyreste pe dyvés mek te janén péskire dáry te obsvencynen altárjo.”

¹²Dro pérvo dyvés jandiá péskiro o Naasóno, Aminadavóskiro čhavó, Judáskire rodycóstyr;

¹³ianybén (dáry) léskiro sys: jekh rupuvó baró čaró, važyndia jov šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudo pšeničnone jaržesa, pirimiešyndlo jeliejosa, dro marunó janybén,

¹⁴iekh suvnakuný kadila dre deš šékieli, čhudý pherdés fimiamosa (gudlé smolenca),

¹⁵iekh tielianto, jekh bakro, jekhe-beršytko bakroró, dro célo shačkiribén,

¹⁶iekh buzno dre svénto dyibén pal grého,

¹⁷i dro ramanjono (mírno) svénto dyibén dujén guruvén, pandžé bakrén, pandžé buznen, pandžé jekhe-beršytkone bakrorén; ĥáda, isyn Aminadavoskire-čhavéskiro, Naasonóskiro janybén.

¹⁸Pe javír dyvés jandiá dáry o Nafanailo, Cuaroskiro čhavó, barydyró Isaharoskire rodycóstyr;

¹⁹jov jandiá péskire dáry: jekh rupuvó baró čaró (bliudo), savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudo pšeničnone jaržesa, pieriemiešyndlo jeliejosa, dro marunó janybén,

²⁰iekh suvnakuný kadila dre deš šékieli, savé sys čhudé pherdés fimiamosa (gudlé smolenca),

²¹iekhe tieliantos, jekhe bakrés, jekhés jekhe-beršytkone bakrores, vaš célo shačkiribén,

²²iekhe buznés (kozlos) dro svénto dyibén pal grého,

²³i dro ramanjono (mírno) svénto dyibén duje guruvén, pandžé bakrén, pandžé buznen, pandžé jekhe-beršytkonen bakrorén; ĥáda, sys Cuaroskire-čhavéskiro, Nafanailoskiro janybén.

²⁴Pe tríto dyvés barydyró Zavulonoskire-čhavéngiro, o Jeliavo, Xielonoskiro čhavó, jandiá péskire dáry.

²⁵Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudo pherdés pšeničnone jaržesa, pieriemiešindlo jeliejosa, dro marunó janybén,

²⁶iekh suvnakuný kadila dre deš šékieli, čhudé pherdés fimiamosa (gudlé smolenca),

²⁷iekhe guruvóres, jekhe bakrés, jekhe jekhe-beršytkone bakrores, vaš célo shačkiribén,

²⁸iekhe buznés dro svénto dyibén pal grého,

²⁹i dro ramanjono (mírno) svénto dyibén duje guruvén, pandžé bakrén, pandžé buznen (kozlen), pandžé jekhe-beršytkonen bakrorén; ĥáda, sys Xielonovoskire-čhavéskiro, Jeliavoskiro janybén.

³⁰Pe štárto dyvés barydyró Ruvimóskire-čhavéngiro, o Jelicuro, Šedieuroskiro čhavó, jandiá péskire dáry.

³¹Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén,

³²iekh suvnakuný kadila dre deš šékieli, saví sys čhudý pherdés fimiamosa (gudlé smolenca),

³³iekh guruvoro, jekh bakro, jekh jekhe-beršytko bakroró, vaš célo shačkiribén,

³⁴iekh buzno dro svénto dyibén pal grého,

³⁵i dro ramanjono (mírno) svénto dyibén dujén guruvén, pandžé bakrén, pandžé buznien i pandžé jekhe-beršytkone bakrorén; ĥáda, sys Šedieuroskire-čhavéskiro, Jelicuroskiro janybén.

³⁶Pe pándžto dyvés barydyró Simieonoskire-čhavéngiro, o Šelumiilo, čhavó Curišadoskiro.

³⁷Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén,

³⁸iekh suvnakuný kadila dre deš šékieli, čhudý pherdés fimiamosa (gudlé smolenca),

³⁹iekh guruvoro (tielianto), jekh bakro, jekh jekhe-beršytko bakroró, vaš célo shačkiribén;

⁴⁰iekh buzno dro svénto dyibén pal grého,

⁴¹i dro ramanjono svénto dyibén duje guruvén, pandžé bakrén, pandžé buznen, i pandžé jekhe-beršytkonen bakrorén; ĥáda, sys Curišadoskire-čhavéskiro, Šelumiiloskiro janybén.

⁴²Pe šóvto dyvés barydyró Gadóskire-čhavéngiro, o Jeliasafo, Rieguiloskiro čhavó jandiá.

⁴³Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir šékieljo svénto, čhudé pherdés pšeničnone jaržesa, pieriemiešyndla aliejosa, dro marunó janybén,

⁴⁴iekh suvnakuný kadila dre deš šékieli, čhudý pherdés fimiamosa (gudlé smolenca),

⁴⁵iekh guruvoro (tielianto), jekh bakro, jekh jekhe-beršytko bakro, dro célo shačkiribén,

⁴⁶iekh buzno (kozlo) dro svénto dyibén pal grého,

⁴⁷i dro ramanjono (mírno) svénto dyibén: duje guruvén, pandžé bakrén, pandžé buznen i pandžé jekhe-beršytkonen bakrorén; ĥáda, sys Rieguiloskire-čhavéskiro, Jeliasafoskiro janybén.

⁴⁸Pe eftáto dyvés barydyró Jefriemóskire-čhavéngiro, o Jelišamo, Amiudoskiro čhavó.

⁴⁹Janybén léskiro sys: jekh rupuvó baró čaró, savó važyndia šel te trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pirimiešyndlo jeliejosa dro marunó janybén,

⁵⁰iekh suvnakuný kadila dre deš šékieli, čhudý pherdés fimiamosa (gudlé smolenca),

⁵¹iekh guruvoro (tielianto), jekh bakro, jekh jekhe-beršytko bakroró vaš célo shačkiribén,

⁵²iekh buzno dro svénto dyibén pal grého,

⁵³i dro ramanjono (mírno) svénto dyibén duje guruvén, pandžé bakrén, pandžé buznen, pandžé jekhe-beršytkone bakrorén; ĥáda, sys Amiudoskire-čhavéskiro, Jelišamoskiro janybén.

⁵⁴Pe ohtóto dyvés barydyró Manasijáskire-čhavéngiro, o Gamaliilo, Piedacuroskiro čhavó.

⁵⁵Janybén léskiro sys: jekh rupuvó baró čaró, savó važyndia šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén,

⁵⁶iekh suvnakuný kadila dre deš šékieli, čhudý pherdés fimiamosa (gudlé smolenca),

⁵⁷iekh guruvoro (tielianto), jekh bakro, jekh jekhe-beršytko bakrore, vaš célo shačkiribén,

⁵⁸iekh buzno dro svénto dyibén pal grého,

⁵⁹i dro ramanjono svénto dyibén duje guruvén, pandžé bakrén, pandžé buznen, pandžé jekhe-beršytkonen bakrorén; ĥáda, sys Piedacuroskire-čhavéskiro, Gamaliiloskiro janybén.

⁶⁰Pe jeniáto (bijekhéskiro déšto) dyvés barydyró Vieniaminovoskire-čhavéngiro, o Avidano, Gidieonijoskiro čhavó.

⁶¹Janybén léskiro sys: jekh rupuvé baró čaró, savó važyndia šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pirimiešyndlo jeliejosa, dro marunó janybén,

⁶²iekh suvnakuný kadila dre deš šékieli, čhudý pherdés fimiamosa (gudlé smolenca),

⁶³iekh guruvoro (tielianto), jekh bakro, jekh jekhe-beršytko bakroró, vaš célo shačkiribén,

⁶⁴iekh buzno dro svénto dyibén pal grého,

⁶⁵i dro ramanjono (mírno) svénto dyibén duje guruvén, pandžé bakrén, pandžé buznen, pandžé jekhe-beršytkone bakrorén; ĥáda sys Gidieonijoskire-čhavéskiro, Avidanoskiro janybén.

⁶⁶Pe déšto dyvés barydyró Danóskire-čhavéngiro, o Ahiiezero, Amišadajoskiro čhavó.

⁶⁷Janybén léskiro sys: jekh rupuvé baró čaró, savó važyndia šel trijánda šékieli, jekh rupuvó tahtái, eftá deša šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén,

⁶⁸iekh suvnakuný kadila dre deš šékieli, čhudý pherdés fimiamosa (gudlé smolenca),

⁶⁹iekh guruvoro (tielianto), jekh bakro, jekh jekhe-beršytko bakroró, vaš célo shačkiribén,

⁷⁰iekh buzno dro svénto dyibén pal grého,

⁷¹i dro ramanjono (mírno) svénto dyibén mírno duje guruvén, pandžé bakrén, pandžé buznen, pandžé jekhe-beršytkonen bakrorén; ĥáda, sys Amišadajoskire-čhavéskiro, Ahiiezeroskiro janybén.

⁷²Pe dešupervo dyvés barydyró Asiroskire-čhavéngiro, o Pagiilo, Ohranoskiro čhavó jandiá.

⁷³Janybén léskiro sys: jekh rupuvó baró čaró, savó važyndia šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pirimiešyndlo jeliejosa, dro marunó janybén,

⁷⁴iekh suvnakuný kadila dre deš šékieli, čhudý pherdés fimiamosa (gudlé smolenca),

⁷⁵iekh guruvoro (tielianto), jekh bakro, jekh jekhe-beršytko bakroró, dro célo shačkiribén,

⁷⁶iekh buzno dro svénto dyibén pal grého,

⁷⁷i dro ramanjono svénto dyibén duje guruvén, pandžé bakrén, pandžé buznen (kozlen), pandžé jekhe-beršytkone bakrorén; ĥáda, sys Pagiiloskiro, Ohranoskire-čhavéskiro janybén.

⁷⁸Pe dešuiavir dyvés barydyró Niefalimoskire-čhavéngiro, o Ahiro, Enanoskiro čhavó.

⁷⁹Janybén léskiro sys: jekh rupuvó baró čaró, savó važynela šel trijánda šékieli, jekh rupuvó tahtáj dre eftadešá šékieli, pir svénto šékieljo, čhudé pherdés pšeničnone jaržesa, pieriemiešyndlo jeliejosa, dro marunó janybén,

⁸⁰iekh suvnakuný kadila dre deš šékieli, čhudý pherdés fimiamosa (gudlé smolenca),

⁸¹iekh guruvoro (tielianto), jekh bakro, jekh jekhe-beršytko bakroró, vaš célo shačkiribén,

⁸²iekh buzno dro svénto dyibén pal grého,

⁸³i dro ramanjono svénto dyibén duje guruvén, pandžé bakrén, pandžé buznen, pandžé jekhe-beršytkone bakrorén; ĥáda, sys Enanoskire-čhavéskiro, Ahiroskiro janybén.

⁸⁴Ake, sys Izrailjoskire barydyrendyr janybén te obsvencynen altárjo dro dyvés, kiéli pomakhne les: dešudúj baré čaré, dešudúj rupuvé tahtaja, dešudúj suvnakuné kadily;

⁸⁵pir šel te trijánda šékieli rup dro kažno čaró, i pir eftadešá dro kažno tahtái: i adiáke saró rup dre dalé khoré (sasúdy) sys duj tysjoncy štaršelá šékieli, pir svénto šékieljo;

⁸⁶suvnakuné kadily, čhudé pherdés fimiamosa (gudlé smolenca), dešudúi, dre kažno kadila pir deš šékieli, pir svénto šékieljo: saró suvnakáj dre kadily sys šel te biš šékieli.

⁸⁷Dro célo shačkiribén sys dešudúj guruvore (tielianty), baré kheritkoné murdalestyr (skotóstyr), dešudúj bakré, dešudúj iekhe-beršytkonen bakrore i pašýl lénde marunó janybén, i dro svénto dyibén pal grého dešudúj buznen,

⁸⁸i dro ramanjono (mírno) svénto dyibén saró kheritkoné murdaléndyr (baré skotóstyr) sys biš te štar guruvore (tielianty), šovdešá bakré, šovdešá buzne, šovdešá jekhe-beršytkone bakrore. Ake, savó sys janybén te žužakirel altárjo paló léskiro makhiben.

⁸⁹Kiéli Mójza zadžalas dre skedyibnáskiri šátra, sob (kaj) te rakirél Rása-Devlésa, to jov šundiá zan (glos), saví léske rakirdiá denkostyr (kryškatyr), savó sys pe kovčego sykadyibnasa (otkrovienijosa) maškír duj xieruvimy, i Jov rakirdiá léske.